కోల్కతాలోని RG Kar మెడికల్ కాలేజీ మరోసారి విషాద ఘటనకు వేదికైంది. ఇటీవల వైద్య విద్యార్థినిపై హత్యాచారం ఘటనతో వార్తల్లో నిలిచిన ఈ కాలేజీలో, ఇప్పుడు మరో MBBS విద్యార్థిని ఆత్మహత్య చేసుకోవడం కలకలం రేపింది. ఈ ఘటన ESI క్వార్టర్స్లో చోటుచేసుకుంది.
పోలీసుల సమాచారం ప్రకారం, బాధిత విద్యార్థిని రాత్రి గదిలో ఉండగా తలుపు తీయలేదు. అనుమానం వచ్చిన తల్లి, బలవంతంగా డోర్ను తెరిచి చూడగా, ఆమె ఉరివేసుకుని వేలాడుతున్న దృశ్యం కనిపించింది. కుటుంబ సభ్యులు వెంటనే ఆస్పత్రికి తరలించినా, అప్పటికే ఆమె మరణించిందని వైద్యులు ధృవీకరించారు.
పోలీసులు విద్యార్థిని గదిని పరిశీలించారు. అయితే, అక్కడ ఎటువంటి సూసైడ్ నోట్ లభించలేదని తెలిపారు. ఇది ఆత్మహత్యా కేసుగా భావిస్తున్నప్పటికీ, దీని వెనుక మరే కారణాలున్నాయా అనే కోణంలో విచారణ కొనసాగిస్తున్నారు. విద్యార్థిని గత కొంతకాలంగా మానసిక ఒత్తిడికి లోనై ఉండొచ్చని అనుమానాలు వ్యక్తమవుతున్నాయి. అత్యంత ప్రతిష్టాత్మకమైన మెడికల్ కాలేజీలో చదువుతున్న విద్యార్థులు తీవ్ర ఒత్తిడిని ఎదుర్కొంటున్నారని, ఇది వారిపై ప్రతికూల ప్రభావం చూపిస్తుందని నిపుణులు చెబుతున్నారు.
ఈ ఘటన RG Kar మెడికల్ కాలేజీలో ఆందోళన రేపింది. విద్యార్థులు, వారి తల్లిదండ్రులు భయాందోళనకు గురవుతున్నారు. తరచుగా ఇలాంటి సంఘటనలు జరగటం ఆందోళన కలిగించే అంశమని విశ్లేషకులు అభిప్రాయపడుతున్నారు. దీనిపై కాలేజీ యాజమాన్యం, ప్రభుత్వం కఠిన చర్యలు తీసుకోవాలని విద్యార్థులు డిమాండ్ చేస్తున్నారు.
