జనవరిలో అమెరికా అధ్యక్షుడుగా ప్రమాణం చేయనున్న డొనాల్డ్ ట్రంప్ పాలనలో కీలక భాగస్వామి కాబోతున్న బిలియనీర్, టెస్లా అధినేత ఎలాన్ మస్క్ హెచ్-1బీ వీసాపై మరోసారి ఆసక్తికరమైన వ్యాఖ్యలు చేశారు. ప్రపంచంలో అత్యుత్తమ ప్రతిభావంతులకు అమెరికా ఒక గమ్యస్థానంగా ఉండాలని, నైపుణ్యమున్న విదేశీ ఉద్యోగులను అమెరికాకు తీసుకురావడానికి ఉపయోగిస్తున్న హెచ్-1బీ వీసా విధానం విచ్ఛిన్నమైందని, భారీ సంస్కరణలు తీసుకురావాల్సిన అవసరం ఉందని ఆయన వ్యాఖ్యానించారు.
కనిష్ఠ వేతనం
‘‘కనిష్ఠ వేతనాన్ని గణనీయంగా పెంచడం, హెచ్-1బీ వీసా నిర్వహణ వార్షిక వ్యయాన్ని జోడించడం ద్వారా సమస్యను పరిష్కరించవచ్చు. ఇలా చేస్తే దేశీయులను కాదని విదేశీయులను రిక్రూట్ చేసుకోవడం మరింత ఖరీదైనదిగా మారిపోతుంది’’ అని ఎలాన్ మస్క్ వ్యాఖ్యానించారు.
అయితే హెచ్-1బీ వీసా ప్రోగ్రామ్ అందుకు ఒక మార్గం కాకూడదంటూ ‘ఎక్స్’ వేదికగా ఓ నెటిజన్ వ్యాఖ్యానించాడు. ఈ ట్వీట్పై ఎలాన్ మస్క్ స్పందిస్తూ ఈ వ్యాఖ్యలు చేశారు. కాగా, హెచ్-1బీ వీసాలను రక్షించడానికి యుద్ధానికి వెళతానంటూ ఎలాన్ మస్క్ ఈ మధ్యే వ్యాఖ్యానించారు. ఈ విషయమై డొనాల్డ్ ట్రంప్ మద్దతుదారులతో కూడా ఇటీవల ఆయన గొడవకు దిగారు.
భారీ సంస్కరణాలు
ట్రంప్ ప్రభుత్వంలో భాగస్వాములు కాబోతున్న ఎలాన్ మస్క్తో పాటు భారతీయ-అమెరికన్ టెక్ వ్యవస్థాపకుడు వివేక్ రామస్వామి కూడా హెచ్-1బీ వీసా ప్రోగ్రామ్కు మద్దతు తెలుపుతున్నారు. అయితే, భారీ సంస్కరణాలు తీసుకురావాల్సి ఉందని అంటున్నారు. ఎలాన్ మస్క్ హెచ్-1బీ వీసా ద్వారానే దక్షిణాఫ్రికా నుంచి అమెరికాకు వలస వెళ్లారు.