నాని ప్రధాన పాత్రలో నటించిన హిట్ 3 చిత్రం ఘనవిజయం సాధించిన సందర్భంగా ప్రముఖ నిర్మాత దిల్ రాజు ప్రశంసలు కురిపించారు. హైదరాబాద్లో జరిగిన ప్రెస్మీట్లో మాట్లాడుతూ, ఈ సినిమా విజయం తెలుగు చిత్ర పరిశ్రమకు మళ్లీ ఊపిరి పోసిందని అన్నారు. గత నెలలో విడుదలైన చిత్రాలకు ప్రేక్షకుల స్పందన ఆశించిన స్థాయిలో లేకపోవడంతో పరిశ్రమలో నిరాశ వాతావరణం నెలకొంది. అలాంటి సమయంలో హిట్ 3 విజయవంతమవడం అందరికీ ఉత్సాహాన్నిచ్చిందని తెలిపారు.
చివరి అరగంట అద్భుతం
ప్రేక్షకుల నుంచి సినిమాకు వచ్చిన స్పందన అద్భుతంగా ఉందని, ముఖ్యంగా చివరి అరగంట ప్రేక్షకులను ఆ థ్రిల్లో ముంచెత్తిందని దిల్ రాజు పేర్కొన్నారు. ఆన్లైన్ బుకింగ్స్ మొదటి మూడు రోజుల్లోనే అద్భుతంగా ఉండటంతో సినిమా సక్సెస్ ఖాయమని అర్థమైందన్నారు. మంచి కంటెంట్ ఉంటే ప్రేక్షకులు ఎప్పటికీ ఆదరిస్తారని ఈ సినిమా మరోసారి నిరూపించిందని పేర్కొన్నారు. ఇదే సమయంలో, నిర్మాతలుగా తమపై మంచి కథల ఎంపికకు బాధ్యత మరింత పెరిగిందని వ్యాఖ్యానించారు.
విజయోత్సవ వేడుకలు ఘనంగా నిర్వహిస్తాం
ఈ సందర్భంగా హీరో నాని మాట్లాడుతూ, హిట్ 3 ప్రయాణం ఇప్పుడే మొదలైందని తెలిపారు. రానున్న రోజుల్లో ఈ సినిమా మరింత మంది ప్రేక్షకుల దృష్టికి చేరుతుందని ఆశాభావం వ్యక్తం చేశారు. ప్రస్తుతం అమెరికా లో ప్రమోషన్ టూర్కి వెళ్తున్నట్లు తెలిపారు. తిరిగి వచ్చిన తర్వాత విజయోత్సవ వేడుకలు ఘనంగా నిర్వహిస్తామని చెప్పారు. దర్శకుడు శైలేష్ కొలను ఈ సినిమాతో మరోసారి తన ప్రతిభను నిరూపించారని కొనియాడారు.
Read Also : Pahalgam Terror Attack : ఇది ప్రతి ఒక్క భారతీయుడిపై చేసిన దాడి – సోనూ సూద్
