తెలంగాణలో గద్దర్ పేరిట అందజేసిన అవార్డులు (Gaddar Awards) ఇప్పుడు వివాదాస్పదంగా మారాయి. ప్రముఖ నటుడు అల్లు అర్జున్(Allu Arjun)కు ఉత్తమ నటుడిగా, ‘కల్కి 2898 ఏ.డి.’ సినిమాకు దర్శకత్వం వహించిన నాగ్ అశ్విన్కు ఉత్తమ దర్శకుడిగా గద్దర్ అవార్డు ప్రకటించడాన్ని పలువురు విమర్శిస్తున్నారు. ఈ అవార్డుల ఎంపిక గద్దర్ ఆశయాలకు వ్యతిరేకంగా ఉందంటూ, తెలంగాణ ప్రజా సాంస్కృతిక వేదిక తీవ్ర ఆగ్రహం వ్యక్తం చేసింది.
రజాకార్ సినిమాపై అభ్యంతరం
వేదిక అధ్యక్షుడు భూపతి వెంకటేశ్వర్లు మాట్లాడుతూ, ‘రజాకార్’ చిత్రాన్ని ఉత్తమ చారిత్రక చిత్రంగా ఎంపిక చేయడం ద్వారా తెలంగాణ చరిత్రను తిప్పిచూసే ప్రయత్నం జరుగుతోందని విమర్శించారు. ఈ చిత్రం తెలంగాణ సమాజాన్ని కించపరిచేలా ఉందని, ఇటువంటి సినిమాలకు గద్దర్ పేరిట అవార్డులు ఇవ్వడం దారుణమన్నారు. గద్దర్ ఉద్యమాల ఆత్మను అవమానించేలా ఇవన్నీ ఉన్నాయని ఆరోపించారు.
సీఎం రేవంత్ స్పందించాలంటూ డిమాండ్
వేదిక వారు ఈ అవార్డులపై రాష్ట్ర ప్రభుత్వం, ముఖ్యంగా సీఎం రేవంత్ రెడ్డి తక్షణం స్పందించాలని డిమాండ్ చేస్తున్నారు. గద్దర్ ఆశయాలను కాపాడే విధంగా అవార్డుల ఎంపిక జరిగి ఉండాలని, కమర్షియల్ సినిమాలకు గద్దర్ పేరిట గుర్తింపు ఇవ్వడం తగదని వారు స్పష్టం చేశారు. ప్రజా ఉద్యమాల్లో గద్దర్ పోషించిన పాత్రను గుర్తించి, ఆ విలువలకు తగినవారికే అవార్డులు ఇవ్వాలన్నది వేదిక అభిప్రాయం.
Read Also : Gaddar awards : తెలంగాణ ప్రభుత్వానికి కృతజ్ఞతలు తెలిపిన ఎన్టీఆర్