బారామతి సమీపంలో జరిగిన హెలికాప్టర్ ప్రమాదంలో, దివంగత ఉప ముఖ్యమంత్రి అజిత్ పవార్ మరణించిన సంగతి తెలిసిందే. అయితే మహారాష్ట్ర (Maharashtra) ఉప ముఖ్యమంత్రి పదవి ఎవరికి దక్కుతుందనే అంశంపై తీవ్ర ఉత్కంఠ నెలకొంది. అజిత్ పవార్ స్థానంలో ఆయన భార్య, రాజ్యసభ సభ్యురాలు సునేత్రా పవార్ను నియమించేందుకు నేషనలిస్ట్ కాంగ్రెస్ పార్టీ (ఎన్సీపీ) రంగం సిద్ధం చేసింది. శనివారం ఆమె కొత్త ఉప ముఖ్యమంత్రిగా ప్రమాణ స్వీకారం చేసే అవకాశాలున్నాయి.
Read Also: Vijay: MGR, జయలలితలే నాకు రాజకీయ స్ఫూర్తి
విధాన భవన్లో ఎన్సీపీ శాసనసభాపక్ష సమావేశం
ఈ నియామకంతో సునేత్రా పవార్ మహారాష్ట్రకు తొలి మహిళా ఉప ముఖ్యమంత్రిగా చరిత్ర సృష్టించనున్నారు. ఈ నియామకాన్ని లాంఛనంగా ఖరారు చేసేందుకు నేటి మధ్యాహ్నం 2 గంటలకు ముంబైలోని విధాన భవన్లో ఎన్సీపీ శాసనసభాపక్ష సమావేశం జరగనుంది. ఈ సమావేశంలో సునేత్రను శాసనసభాపక్ష నేతగా ఎన్నుకున్న తర్వాత, సాయంత్రం రాజ్ భవన్లో గవర్నర్ ఆమెతో ప్రమాణం చేయిస్తారని పార్టీ వర్గాలు తెలిపాయి. ఈ నేపథ్యంలో పార్టీలో నాయకత్వ కొనసాగింపు, పాలనలో స్థిరత్వం కోసం ఎన్సీపీ ఈ నిర్ణయం తీసుకుంది.
ఎన్సీపీ నిర్ణయానికి తాము పూర్తిగా కట్టుబడి ఉంటామని ముఖ్యమంత్రి దేవేంద్ర ఫడ్నవీస్ స్పష్టం చేశారు. “ఈ కష్టకాలంలో పవార్ కుటుంబానికి, ఎన్సీపీకి బీజేపీ అండగా నిలుస్తుంది” అని ఆయన తెలిపారు. ఈ బాధ్యతను సునేత్రా పవార్కు అప్పగించాలని పార్టీలో ఎక్కువ మంది అభిప్రాయపడుతున్నారని, అది సమంజసమైన డిమాండేనని ఎన్సీపీ సీనియర్ నేత ఛగన్ భుజ్బల్ అన్నారు.
Read hindi news : hindi.vaartha.com
Epaper : epapervaartha.com
Read Also: