తెలంగాణ రాష్ట్ర అభివృద్ధి దిశగా మరో కీలకమైన అడుగును ప్రభుత్వం వేయనుంది. ముఖ్యమంత్రి రేవంత్ రెడ్డి రేపు రంగారెడ్డి జిల్లా మీఠ్ఖాన్పేటలో ఫ్యూచర్ సిటీ (Future City) డెవలప్మెంట్ అథారిటీ భవన నిర్మాణానికి శంకుస్థాపన చేయనున్నారు. ఉదయం 11 గంటలకు జరిగే ఈ కార్యక్రమంలో సీఎం పునాదిరాయి వేస్తారని అధికార వర్గాలు ప్రకటించాయి. రాష్ట్రంలో వేగంగా పెరుగుతున్న పట్టణీకరణకు సమాధానంగా, ఆధునిక సదుపాయాలతో కూడిన ఈ ఫ్యూచర్ సిటీని అభివృద్ధి చేయాలని ప్రభుత్వం లక్ష్యంగా పెట్టుకుంది.
ఫ్యూచర్ సిటీ ప్రాజెక్టు పరిధిలో మౌలిక సదుపాయాల అభివృద్ధి అత్యంత ప్రాధాన్యతగా ఉండనుంది. ఈ క్రమంలో రావిర్యాల నుంచి ఆమనగల్ వరకు గ్రీన్ఫీల్డ్ రేడియల్ రోడ్–1 నిర్మాణానికి కూడా సీఎం రేవంత్ రెడ్డి భూమిపూజ చేస్తారు. ఈ రహదారి ప్రాజెక్టు పూర్తయిన తర్వాత హైదరాబాద్ నగరాన్ని పరిసర ప్రాంతాలతో మరింత వేగంగా అనుసంధానించడమే కాకుండా, రవాణా సౌకర్యాలు సులభతరం కానున్నాయి. ఈ ప్రాజెక్టు తెలంగాణలో రవాణా, వాణిజ్య, నివాస రంగాల అభివృద్ధికి పునాదిరాయి వేయనుందని నిపుణులు భావిస్తున్నారు.
News telugu: Heavy rains in Hyderabad-తెలంగాణలో పలు జిల్లాల్లో ఎడతెరిపి లేకుండా భారీ వర్షాలు
ఫ్యూచర్ సిటీ ప్రాజెక్టు మొదటి దశలోనే 30వేల ఎకరాల్లో నిర్మాణం చేపట్టనున్నారు. ఈ దశలో తొమ్మిది జోన్లను ఏర్పాటు చేసే అవకాశం ఉన్నట్లు సమాచారం. నివాస, వాణిజ్య, పారిశ్రామిక, వినోద, విద్యా రంగాలకు ప్రత్యేక జోన్లు ఉండేలా ప్రణాళికలు సిద్ధమవుతున్నాయి. ఈ ప్రాజెక్టు పూర్తయిన తర్వాత తెలంగాణలో ఆధునిక స్మార్ట్ సిటీ కాన్సెప్ట్ను ప్రతిబింబించే ప్రధాన మౌలిక సదుపాయ కేంద్రంగా ఇది మారనుంది. రాష్ట్రానికి కొత్త పెట్టుబడులు, ఉపాధి అవకాశాలు రానున్నాయని ప్రభుత్వం నమ్మకం వ్యక్తం చేస్తోంది.
