H1B Visa News : అమెరికాలో వృత్తి నిపుణులకు, ముఖ్యంగా భారతీయ ఐటి ఉద్యోగులకు వరంగా భావించే హెచ్–1బీ వీసా పథకం పూర్తిగా రద్దు చేయాలని అక్కడి ఒక ప్రజా ప్రతినిధి ముందుకు వచ్చిన విషయం సంచలనం సృష్టించింది. సాధారణంగా హెచ్–1బీ వీసా పొందిన వారికి తర్వాత అమెరికా పౌరసత్వం పొందే అవకాశం ఏర్పడుతుంది. అయితే తాజా ప్రతిపాదన అమల్లోకి వస్తే ఈ వెసులుబాటు అంతం కానుంది. వీసా గడువు ముగిసిన వెంటనే విదేశీయులు తమ దేశాలకు తిరిగి వెళ్లాల్సిందేనని ఆ బిల్లు సూచిస్తోంది.
కాంగ్రెస్ సభ్యురాలు మార్జొరీ టేలర్ గ్రీన్ ఎక్స్లో చేసిన పోస్ట్లో—“హెచ్–1బీ(H1B Visa News) ప్రోగ్రామ్లో సంవత్సరాలుగా అవకతవకలు జరుగుతున్నాయి. అమెరికా పౌరులకు దక్కాల్సిన ఉద్యోగాలను విదేశీయులు దోచుకుంటున్నారు. అందుకే ఈ పథకాన్ని పూర్తిగా రద్దు చేసే బిల్లును ప్రవేశపెట్టాలనుకుంటున్నాను” అని పేర్కొన్నారు. అయితే వైద్య రంగానికి అవసరమైన డాక్టర్లు, నర్సుల కోసం సంవత్సరానికి 10,000 వీసాలు మాత్రమే ఇవ్వాలన్న ప్రతిపాదనను కూడా ఆమె చేర్చారు.
Read also: Naveen yadav: ఖర్గే, రాహుల్ గాంధీలకు నవీన్ యాదవ్ను పరిచయం చేసిన రేవంత్
ఈ ప్రత్యేక వీసాలు కూడా పది సంవత్సరాల తర్వాత రద్దు చేయబడతాయని గ్రీన్ వెల్లడించారు. విదేశీయుల బదులు అమెరికా పౌరులనే వైద్యులు మరియు నర్సులుగా తీర్చిదిద్దేందుకు ప్రభుత్వం చర్యలు తీసుకోవాలని ఆమె అభిప్రాయం వ్యక్తం చేశారు. ఏ వీసా మీద వచ్చినా, వారి గడువు పూర్తయ్యాక స్వదేశానికి వెళ్లాల్సిందే తప్ప, అమెరికాలో శాశ్వత నివాసం ఉండే హక్కు ఇవ్వకూడదని ఆమె చెప్పింది.
అమెరికా వెలుపల పుట్టిన వైద్య విద్యార్థులకు ప్రస్తుతం అమల్లో ఉన్న మెడికేర్ ప్రయోజనాలను కూడా రద్దు చేయాలని గ్రీన్ డిమాండ్ చేశారు. 2023లోనే విదేశాల నుంచి వచ్చిన 5,000 మందికి పైగా డాక్టర్లు అమెరికాలో ఉద్యోగాలు పొందగా, 2024లో అమెరికాలోనే చదివిన 9,000 మంది వైద్య విద్యార్థులు అవకాశాలు లేక విదేశాలకు వెళ్ళిపోయారని ఆమె వివరించారు. ఇది అమెరికా యువతకు అన్యాయం అవుతోందని గ్రీన్ ఆరోపించారు.
ప్రస్తుతం కాంగ్రెస్ అనుమతించిన విధంగా, సంవత్సరానికి 65,000 మంది ప్రొఫెషనల్స్, మరో 20,000 మంది అడ్వాన్స్డ్ డిగ్రీ హోల్డర్లకు హెచ్–1బీ వీసాలు మంజూరు అవుతున్నాయి. ఈ అవకాశాన్ని పెద్ద ప్రైవేట్ కంపెనీలు భారీ ఎత్తున ఉపయోగించుకుని, విదేశీ నిపుణులను అమెరికాకు రప్పిస్తున్నాయి. హెచ్–1బీ వీసాల లబ్ధిదారుల్లో భారతీయులు, ముఖ్యంగా సాఫ్ట్వేర్ ఇంజనీర్లు మరియు వైద్యులు, అత్యధిక శాతం ఉన్నారు.
అమెరికా మాజీ అధ్యక్షుడు డొనాల్డ్ ట్రంప్ అధికారంలోకి వచ్చినప్పటి నుంచి హెచ్–1బీపై పలు ఆంక్షలు విధించిన విషయం తెలిసిందే. అర్హులైన దరఖాస్తుదారులు $100,000 (సుమారు 83 లక్షలు) చెల్లించాలి అనే కొత్త నిబంధన కూడా ట్రంప్ తీసుకొచ్చారు, దీని వల్ల విదేశీ ఉద్యోగులపై భారము మరింత పెరిగింది.
Read hindi news : hindi.vaartha.com
Epaper : epapervaartha.com
Read also :
