US – Iran War : అమెరికా, ఇరాన్ దేశాల మధ్య తాత్కాలికంగా కుదిరిన సవరణ ఒప్పందాలు, కాల్పుల విరమణ ముగిసిందని యూఎస్ ప్రెసిడెంట్ డోనాల్డ్ ట్రంప్ ప్రకటించిన నేపథ్యంలో.. మధ్యప్రాచ్యంలో మరోసారి యుద్ధం తీవ్రరూపం దాల్చింది. ఇటీవల మరణించిన ఇరాన్ సుప్రీం లీడర్ అయతుల్లా అలీ ఖమేనీ అంత్యక్రియలు పవిత్ర నగరమైన మషద్ (Mashhad) లో జరగడానికి కొన్ని గంటల ముందే అమెరికా ఆ నగరానికి వెళ్లే కీలక రవాణా మార్గాలపై విరుచుకుపడింది. ఉత్తర ఇరాన్ పరిధిలోని గొలెస్తాన్ ప్రాంతంలో ఉన్న వ్యూహాత్మక ‘ఒగ్తాయ్ ఖాన్’ రైల్వే వంతెనను అమెరికా క్రూయిజ్ క్షిపణులతో ధ్వంసం చేసింది. ఈ రైల్వే లైన్ ఇరాన్‌కు రష్యా మరియు చైనాలతో ఉన్న అంతర్జాతీయ వాణిజ్యానికి అత్యంత కీలకమైనది. ఈ దాడి కారణంగా టెహ్రాన్ – మషద్ నగరాల మధ్య రైల్వే సర్వీసులు పూర్తిగా నిలిచిపోవడంతో, ఖమేనీ అంత్యక్రియలకు వెళ్లే వేలాది మంది ప్రయాణికులు, మద్దతుదారులు దారిలోనే చిక్కుకుపోయారు.
Read Also : భారత్-పాకిస్థాన్ ఘర్షణలో 11 యుద్ధ విమానాలు కూల్చివేయబడ్డాయి : ట్రంప్
బుషెహర్ అణు ప్లాంట్ సరిహద్దులే లక్ష్యంగా బాంబుల వర్షం
రైల్వే నెట్‌వర్క్‌తో పాటు ఇరాన్ పశ్చిమ తీరంలో ఉన్న ‘బుషెహర్ న్యూక్లియర్ పవర్ ప్లాంట్’ (Bushehr Nuclear Power Plant) పరిసరాలను లక్ష్యంగా చేసుకుని అమెరికా దళాలు భారీ దాడులు జరిపాయి. బుషెహర్ అణు విద్యుత్ కేంద్రం సరిహద్దు గోడలు, చోగదక్ సైనిక స్థావరం మరియు స్థానిక ఫిషింగ్ రేవుపై అమెరికా ప్రక్షేపకాలు పడ్డాయని ఇరాన్ అధికారికంగా ప్రకటించింది. ఈ దాడుల వల్ల స్థానిక మత్స్యకారుల పడవలు తగలబడ్డాయని, అయితే అణు ప్లాంట్ లోపల ఎలాంటి నష్టం జరగలేదని మరియు ప్రాణనష్టం తప్పిందని ఇరాన్ అంతర్గత భద్రతా వర్గాలు తెలిపాయి. గల్ఫ్ ప్రాంతంలో నౌకాయాన స్వేచ్ఛను అడ్డుకుంటున్న ఇరాన్ సైనిక సామర్థ్యాన్ని దెబ్బతీసేందుకే ఈ అదనపు దాడులు చేసినట్లు అమెరికా సెంట్రల్ కమాండ్ (CENTCOM) స్పష్టం చేయడంతో ఇరు దేశాల మధ్య ఉద్రిక్తతలు అత్యున్నత స్థాయికి చేరాయి.
Read Also hindi news: hindi.vaartha.com
Read Also Epaper : epaper.vaartha.com
Read Also :