Trump U Turn : విదేశీ విద్యార్థుల‌ విషయంలో ట్రంప్ వెనకడుగు

అమెరికా అధ్యక్షుడు డొనాల్డ్ ట్రంప్ విదేశీ విద్యార్థుల విషయంలో తీసుకున్న వీసా రద్దు నిర్ణయంపై చివరికి వెనక్కి తగ్గారు. వీసాలు రద్దు చేసిన ట్రంప్ చర్యను వ్యతిరేకిస్తూ విద్యార్థులు న్యాయస్థానాలను ఆశ్రయించడంతో, కోర్టులు విద్యార్థుల పక్షాన తీర్పులు వెలువరించాయి. ఈ నేపథ్యంలో ట్రంప్ సర్కారు విదేశీ విద్యార్థుల వీసాల రద్దును తాత్కాలికంగా నిలిపివేసి, వారి చట్టబద్ధ హోదాను పునరుద్ధరించినట్లు అధికారిక వర్గాలు వెల్లడించాయి.

న్యాయస్థానాల ఆదేశాలతో ట్రంప్ వెనకడుగు

ట్రంప్ ప్రభుత్వం తీసుకున్న వీసా రద్దు నిర్ణయంతో 187 కాలేజీలకు చెందిన 1200 మందికి పైగా విదేశీ విద్యార్థులు బహిష్కరణ ముప్పును ఎదుర్కొన్నారు. తమ భవిష్యత్తు ప్రమాదంలో పడిపోయిన విద్యార్థులు కాలిఫోర్నియా, బోస్టన్ కోర్టుల్లో పిటిషన్లు దాఖలు చేశారు. విచారణలో న్యాయస్థానాలు విద్యార్థుల పక్షాన నిలిచి, ప్రభుత్వాన్ని కఠినంగా మందలించాయి.

విదేశీ విద్యార్థుల్లో ఆనందం

వీసా రద్దుతో అమెరికాలోని అనేక మంది విదేశీ విద్యార్థులు ఆందోళనకు గురై, కొందరు దేశం విడిచిపెట్టగా, మరికొందరు రహస్య ప్రదేశాల్లో తలదాచుకోవాల్సి వచ్చింది. తాజా కోర్టు తీర్పుతో ట్రంప్ వెనక్కి తగ్గిన వార్త విదేశీ విద్యార్థుల్లో భారీగా ఆనందం కలిగించింది. చట్టబద్ధ హోదా తిరిగి లభించడంతో వారి భవిష్యత్‌పై నెలకొన్న అనిశ్చితి కొంతవరకు తొలగింది. ప్రస్తుతం ఈ పరిణామాలతో అమెరికాలో ఉన్నత విద్య అభ్యసిస్తున్న విదేశీ విద్యార్థులకు ఊరట లభించినట్టైంది.