“భారత్ మళ్లీ అంతరిక్షంలోకి వస్తోంది, జై హింద్!” అంటూ భారత వ్యోమగామి శుభాంశు శుక్లా (Shubhanshu Shukla)తన చారిత్రక అంతరిక్ష యాత్రకు ముందు ఉద్వేగభరితంగా పేర్కొన్నారు. అంతర్జాతీయ అంతరిక్ష కేంద్రానికి (ఐఎస్ఎస్) వెళ్లనున్న తొలి భారతీయుడిగా, అంతరిక్షంలో అడుగుపెట్టనున్న రెండో భారతీయుడిగా ఆయన చరిత్ర సృష్టించనున్నారు. పలుమార్లు వాయిదా పడిన ఈ ప్రయోగం, ఈరోజు భారత కాలమానం ప్రకారం మధ్యాహ్నం 12 గంటలకు (అమెరికా కాలమానం ప్రకారం ఉదయం 2:31 గంటలకు ఈడీటీ) ఫ్లోరిడాలోని నాసా కెన్నడీ స్పేస్ సెంటర్లోని లాంచ్ కాంప్లెక్స్ 39ఏ నుంచి జరిగింది. స్పేస్ఎక్స్ కంపెనీకి చెందిన ఫాల్కన్ 9 రాకెట్ ద్వారా, కొత్త స్పేస్ఎక్స్ డ్రాగన్ వ్యోమనౌకలో శుక్లా తన ప్రయాణాన్ని ప్రారంభించారు.
అంతరిక్ష యాత్రకు ముందు గర్వభరిత సందేశం
ఈ కీలక ప్రయోగానికి కొద్ది క్షణాల ముందు, శుభాంశు శుక్లా (Shubhanshu Shukla) తన ఎక్స్ (గతంలో ట్విట్టర్) ఖాతాలో “భారత్ మళ్లీ అంతరిక్షంలోకి, జై హింద్” అని పోస్ట్ చేశారు. అంతకుముందు “డ్రాగన్ వ్యోమనౌక తలుపులు మూసుకున్నాయి. అన్ని కమ్యూనికేషన్, సూట్ తనిఖీలు పూర్తయ్యాయి. సీట్లు సరిచేయబడ్డాయి. యాక్సియమ్-4 సిబ్బంది ప్రయోగానికి సిద్ధంగా ఉన్నారు!” అని కూడా ఆయన తెలిపారు.
“నువ్వు లేకుండా ఇదంతా సాధ్యమయ్యేది కాదు” – శుక్లా
ఈ సందర్భంగా శుక్లా తన భార్య కామ్నా(Kamna)కు ఇన్స్టాగ్రామ్లో ఒక భావోద్వేగ సందేశాన్ని పంచుకున్నారు. “నా అద్భుతమైన భాగస్వామి కామ్నాకు ప్రత్యేక ధన్యవాదాలు. నువ్వు లేకుండా ఇదంతా సాధ్యమయ్యేది కాదు. అంతకన్నా ముఖ్యంగా దీనికి ఏ విలువా ఉండేది కాదు” అని ఆయన పేర్కొన్నారు. గాజు గోడకు చెరోవైపు ఉండి వీడ్కోలు చెప్పుకుంటున్న ఫొటోను కూడా ఆయన పంచుకున్నారు. ఈ యాత్రలో పాలుపంచుకున్న ప్రతి ఒక్కరికీ శుక్లా కృతజ్ఞతలు తెలిపారు.
అంతర్జాతీయ బృందం – శాస్త్రీయ, వాణిజ్య ప్రయోజనాలు
యాక్సియమ్ స్పేస్ సంస్థ, నాసా, స్పేస్ఎక్స్ల సహకారంతో ఈ యాత్రను నిర్వహిస్తోంది. ఈ యాత్రలో విభిన్న దేశాలకు చెందిన అంతర్జాతీయ సిబ్బంది పాలుపంచుకుంటున్నారు. వాణిజ్య, ప్రపంచ అంతరిక్ష పరిశోధనలో ఇది ఒక ముఖ్యమైన ముందడుగుగా భావిస్తున్నారు. ఈ యాత్రలో శుభాంశు శుక్లా (Shubhanshu Shukla) పైలట్గా
వ్యవహరించనుండగా, అమెరికాకు చెందిన పెగ్గీ విట్సన్ కమాండర్గా బాధ్యతలు నిర్వర్తిస్తారు. 1984లో రాకేశ్ శర్మ తర్వాత అంతరిక్షంలోకి వెళ్తున్న రెండో భారతీయుడిగా శుక్లా (Shubhanshu Shukla) నిలవనున్నారు. పోలాండ్కు చెందిన స్లావోస్జ్ ఉజ్నాన్స్కి-విస్నియెస్కి, హంగేరీకి చెందిన టిబోర్ కాపు మిషన్ స్పెషలిస్టులుగా ఈ బృందంలో ఉన్నారు.
సామాజిక మాధ్యమాల్లో శుభాంశు సందేశం వైరల్
X (Twitter), Instagram, Facebook, YouTube వేదికలపై శుభాంశు ట్వీట్ మరియు వీడ్కోలు ఫోటోలు విస్తృతంగా షేర్ అయ్యాయి. “India is back in space!” అనే నినాదం గ్లోబల్ మీడియా హెడ్లైన్లలో మారింది.
Read Also: Axiom-4 : నేడు అంతరిక్షంలోకి శుభాంశు శుక్లా