అహ్మదాబాద్లో చోటుచేసుకున్న ఘోర ఎయిర్ ఇండియా విమాన ప్రమాదం దేశవ్యాప్తంగా విషాదాన్ని నింపగా, మణిపూర్ రాష్ట్రానికి చెందిన రెండు కుటుంబాలు మాత్రం అసాధ్యమైన బాధను ఎదుర్కొంటున్నాయి. ఈ ప్రమాదంలో ఫ్లైట్ అటెండెంట్లుగా విధులు నిర్వర్తిస్తున్న నంగ్థోయ్ శర్మ కొంగ్బ్రైలత్పమ్ (21), లామ్నుంథెమ్ సింగ్సన్ (23) అనే యువతులు మృత్యువాత పడ్డారు.
చిన్ననాటి కలల్ని నిజం చేసుకున్న నంగ్థోయ్ శర్మ
ఇంఫాల్లోని డీఎం కాలేజ్ ఆఫ్ కామర్స్లో చదువుతున్న నంగ్థోయ్ శర్మ ఇటీవలే క్యాంపస్ రిక్రూట్మెంట్లో ఎయిర్ ఇండియాలో ఉద్యోగం పొందింది. ముగ్గురు ఆడపిల్లల్లో రెండోదైన నంగ్థోయ్, టీనేజ్లోనే ఎయిర్ ఇండియాలో ఉద్యోగం సంపాదించి కుటుంబానికి ఆసరాగా నిలిచారు. ఆమె తండ్రి నందేశ్ కుమార్ శర్మ మాట్లాడుతూ “12న ఉదయం 11:30 గంటలకు నంగ్థోయ్ తన సోదరికి చివరిసారిగా ఫోన్ చేసింది. తాను లండన్ వెళ్తున్నానని, కొన్ని రోజులు మాట్లాడలేనని చెప్పింది. జూన్ 15న తిరిగి రావాల్సి ఉంది. అదే మాకు ఆమె చివరి మాటలవుతాయని ఊహించలేదు” అని కన్నీటిపర్యంతమయ్యారు.
ఇంటర్నెట్ లేదు, వార్తలు అందలేదు – నంగ్థోయ్ కుటుంబ బాధ
దురదృష్టవశాత్తు, మణిపూర్లో గతంలో జరిగిన అరామ్బాయ్ టెంగ్గోల్ అరెస్టు కారణంగా ఇంటర్నెట్ సేవలు నిలిచిపోయినందున వార్తలు ఆలస్యంగా తెలిసాయి. ఆమె కాల్ చేసిన మూడు గంటల తర్వాత విమాన ప్రమాదం గురించి ఓ బంధువు ఫోన్లో చెప్పడంతో నంగ్థోయ్ సోదరి తీవ్ర ఆందోళనకు గురైంది. నంగ్థోయ్ మొదటి సెమిస్టర్ పరీక్షలు రాసిన వెంటనే స్నేహితులతో కలిసి ఎయిర్ హోస్టెస్ ఇంటర్వ్యూకు హాజరై ఉద్యోగం సాధించిందని, ముంబైలో మణిపూర్కు చెందిన ఇతర ఎయిర్ ఇండియా ఉద్యోగినులతో కలిసి ఉండేదని ఆమె తండ్రి గుర్తుచేసుకున్నారు. ఎప్పటికైనా మణిపూర్లో స్థిరమైన ఉద్యోగం చేస్తుందని ఆశించామని తెలిపారు.
కుటుంబంతో కలిసే జీవితాన్ని ఆశించిన లామ్నుంథెమ్ సింగ్సన్
ఇంకో మణిపుర్ యువతి లామ్నుంథెమ్ సింగ్సన్ కుటుంబం మాత్రం ముందే కొన్ని కష్టాలను ఎదుర్కొంది. లామ్నుంథెమ్ సింగ్సన్ కుటుంబం 2023లో జరిగిన జాతి ఘర్షణల కారణంగా ఇంఫాల్లోని ఓల్డ్ లంబులేన్లో ఉన్న తమ సర్వస్వాన్నీ వదిలేసి వచ్చింది. ప్రస్తుతం వారు కాంగ్పోక్పి జిల్లాలో అంతర్గతంగా నిరాశ్రయులైన వ్యక్తులుగా (ఐడీపీలు) ఓ చిన్న అద్దె ఇంట్లో నివసిస్తున్నారు. లామ్నుంథెమ్ తండ్రి కొన్నేళ్ల క్రితం మరణించగా, ఆమె తల్లి నెమ్నెయిల్హింగ్ సింగ్సన్ ముగ్గురు పిల్లలను ఒంటరిగా పెంచారు. లామ్నుంథెమ్ ఆమెకు ఏకైక కుమార్తె.
ప్రమాద వార్త తెలిసినప్పటి నుంచి స్థానికులు వారి ఇంటికి చేరుకుని ధైర్యం చెబుతున్నారు. తన కుమార్తె క్షేమంగా ఉందని ఏదైనా అధికారిక సమాచారం వస్తుందేమోనని తల్లి నెమ్నెయిల్హింగ్ ఇంకా ఆశతో ఎదురుచూస్తున్నారు. చివరిసారిగా తన తల్లికి ఫోన్ చేసినప్పుడు, తాను డ్యూటీ మీద అహ్మదాబాద్ వెళ్తున్నట్టు లామ్నుంథెమ్ చెప్పారని కుటుంబ సభ్యులు తెలిపారు.
చిన్న వయస్సులోనే బాధ్యత తీసుకున్న యువతులు
ఈ ఇద్దరు యువతులూ చిన్న వయస్సులోనే తమ కుటుంబాలను ఆదుకునే ఆరాటంతో ఉద్యోగాలు చేపట్టారు. చిన్న వయసులో పెద్ద బాధ్యతలు తీసుకుని తమ కుటుంబాలను నిలబెట్టే ప్రయత్నంలో ఉన్న ఇద్దరు ప్రతిభావంతుల జీవితాలు ఒక్కసారిగా మూసి పోయాయి. వారి కుటుంబ సభ్యులు, బంధుమిత్రులు తీవ్ర ఆవేదనకు గురయ్యారు.
Read also: Britain: ప్రమాదంలో ప్రాణాలతో బయటపడిన బ్రిటన్ జాతీయుడు