భారత్ ‘ఆపరేషన్ సింధూర్’ దాడులతో పాకిస్థాన్ ఉగ్రవాదానికి గట్టి బదులు
ఏప్రిల్ 22న పహల్గాంలో జరిగిన భయంకర ఉగ్రదాడిలో 26 మంది అమాయకులు ప్రాణాలు కోల్పోవడం దేశవ్యాప్తంగా తీవ్ర ఆవేదన కలిగించింది. ఈ దారుణ ఘటనకు ప్రతీకారంగా భారత ప్రభుత్వం అత్యంత కీలకంగా స్పందించింది. ఉగ్రవాదాన్ని ప్రోత్సహిస్తున్న పాకిస్థాన్ భూభాగంలోని శిబిరాలపై గాలి దాడులకు శ్రీకారం చుట్టింది. బుధవారం తెల్లవారుజామున ప్రారంభమైన ఈ క్షిపణి దాడులు “ఆపరేషన్ సింధూర్” పేరుతో నిర్వహించబడ్డాయి. ప్రధానంగా పాకిస్థాన్ ఆక్రమిత కాశ్మీర్ (పీఓకే) లోని కోట్లి, ముజఫరాబాద్, బాగ్ ప్రాంతాలపై, అలాగే పంజాబ్ ప్రావిన్స్లోని బహవల్పూర్, మురిద్కే వంటి ప్రాంతాలపై భారత్ దాడులు జరిపింది. భారత వైమానిక దళాల సమాచారంతో ఉగ్ర స్థావరాలను లక్ష్యంగా చేసుకొని ఈ దాడులు చేపట్టాయి. ఇందులో కొన్ని ప్రదేశాలలో సుభానుల్లా మసీదు వంటి ప్రాంతాలు ఉగ్ర కార్యకలాపాలకు కేంద్రంగా ఉపయోగపడుతున్నాయని సమాచారం ఉంది. ఈ దాడులు తీవ్ర స్థాయిలో విధ్వంసం కలిగించాయని పాక్ వర్గాలు పేర్కొన్నాయి.
పాక్ నుండి తీవ్ర ప్రతిస్పందన – “ఇది యుద్ధ చర్యే”
భారత దాడులపై పాకిస్థాన్ ప్రభుత్వం ఆశించని తీవ్రతతో స్పందించింది. ప్రధాన మంత్రి షెహబాజ్ షరీఫ్ ఈ దాడులను ఏకంగా “యుద్ధ చర్య”గా అభివర్ణించారు. భారత్ పాక్ భూభాగంలోని ఐదు ప్రాంతాలపై దాడులు చేయడాన్ని తీవ్రంగా ఖండించిన ఆయన, “శత్రువు తన దుర్మార్గపు లక్ష్యాలలో ఎప్పటికీ విజయం సాధించలేడు దేశమంతా తమ సాయుధ బలగాల వెనుక ఉంది” అంటూ ప్రకటించారు. మరోవైపు పాక్ రక్షణ మంత్రి ఖవాజా ఆసిఫ్ కూడా తీవ్ర హెచ్చరికలు జారీ చేస్తూ, “మేము పూర్తి బలంతో ప్రతీకారం తీర్చుకుంటాం. ఇది కేవలం మొదటిపదం మాత్రమే” అని వ్యాఖ్యానించారు. అంతర్జాతీయ మీడియాను పీఓకే మరియు పంజాబ్ ప్రాంతాల్లో పరిశీలన కోసం ఆహ్వానించడం ద్వారా పాక్ తమ వైఖరిని నైతికంగా న్యాయపరంగా ప్రదర్శించే ప్రయత్నం చేస్తోంది.
సరిహద్దుల్లో ఉద్రిక్తతల మేఘాలు – గగనతలాన్ని మూసేసిన పాక్
ఈ దాడుల తర్వాత పాకిస్థాన్ సైన్యం తీవ్రంగా స్పందించింది. అధికార ప్రతినిధి లెఫ్టినెంట్ జనరల్ అహ్మద్ షరీఫ్ చౌదరి ప్రకారం, పీఓకేలోని కీలక ప్రాంతాలు, ముఖ్యంగా ముజఫరాబాద్, కోట్లి, బహవల్పూర్ వంటి ప్రాంతాల్లో క్షిపణులు పడటంతో ముగ్గురు పాకిస్థానీలు మరణించగా, 12 మంది తీవ్రంగా గాయపడ్డారు. భారత్ చేసిన ఈ దాడులపై ఇంకా నష్టం అంచనాలు జరుగుతున్నాయని ఆయన తెలిపారు. అంతేకాదు, “భారత్కి తాత్కాలికంగా వచ్చిన ఈ సంతృప్తి, శాశ్వతంగా బాధను తెస్తుంది” అంటూ తీవ్ర హెచ్చరికలు జారీ చేశారు. తాజా పరిణామాల నేపథ్యంలో పాకిస్థాన్ తన గగనతలాన్ని అన్ని విమాన సేవలకు 48 గంటల పాటు మూసివేసింది.