ఒకప్పుడు బలమైన బంధంతో కనిపించిన ట్రంప్, మస్క్ మధ్య పరిచయం బీటలైంది. అమెరికా అధ్యక్షుడు డొనాల్డ్ ట్రంప్ (Donald Trump) మరియు టెక్ మిలియనీర్ ఎలాన్ మస్క్ (Elon Musk) మధ్య ఇప్పుడు మాటల యుద్ధం చెలరేగింది. ఈ సంచలన వివాదం అమెరికా రాజధాని వాషింగ్టన్తోపాటు వాల్ స్ట్రీట్లోనూ చర్చనీయాంశంగా మారింది.ఈ వివాదం నేపథ్యంలో మస్క్ తండ్రి ఎర్రోల్ మస్క్ మీడియాతో స్పందించారు. ‘‘ఈ గొడవను మానేయమని ఎలాన్కు చెప్పాను’’ అని తెలిపారు. కుమారుడు ఒత్తిడిలో ఉన్నట్టు పేర్కొంటూ, ‘‘ట్రంప్ విజయం సాధిస్తారు’’ అనే అభిప్రాయాన్ని వ్యక్తం చేశారు.
రిపబ్లికన్ల బడ్జెట్పై మస్క్ విమర్శలే వివాదానికి మౌలికం
గత వారం మస్క్ చేసిన వ్యాఖ్యలే వివాదానికి దారితీశాయి. రిపబ్లికన్ పార్టీ తీసుకొచ్చిన పన్ను బిల్లుపై మస్క్ తీవ్ర విమర్శలు చేశారు. గురువారం నాటికి పరిస్థితి మరింత వేడెక్కింది. ఇద్దరూ సోషల్ మీడియాలో ఒకరిపై ఒకరు ఘాటు వ్యాఖ్యలు చేశారు.ట్రంప్ తనకు అప్పట్లో మద్దతు పొందారని, తన వల్లే ఎన్నికల్లో గెలిచారని మస్క్ వ్యాఖ్యానించారు. అంతేకాకుండా జెఫ్రీ ఎప్స్టీన్ కేసులో ట్రంప్ పేరు ఉన్నట్టు ఆరోపించారు. దీనిపై ట్రంప్ తీవ్రంగా మండిపడ్డారు.
“మస్క్ పిచ్చివాడు” అంటూ ట్రంప్ ప్రతికూల స్పందన
టెస్లా, స్పేస్ఎక్స్ వంటి సంస్థలకు ఉన్న ప్రభుత్వ కాంట్రాక్టులను రద్దు చేస్తామని ట్రంప్ హెచ్చరించారు. మస్క్ మానసిక స్థితి సరిగాలేదని వ్యాఖ్యానించారు. ఈ మాటల యుద్ధం టెస్లా షేర్లపై తీవ్ర ప్రభావం చూపింది.ఈ వివాదం తీవ్రంగా మారుతుండటంతో, వైట్హౌస్ పరిస్థితిని సానుకూలంగా పరిష్కరించేందుకు ప్రయత్నిస్తోంది. దీంతో శుక్రవారం టెస్లా షేర్ల విలువ కొంతమేర కోలుకుంది.
వ్యాపార సామ్రాజ్యంపై రాజకీయ ప్రభావం
మస్క్ ట్రంప్తో గతంలో 130 రోజులు ప్రభుత్వ సలహాదారుగా పని చేశారు. అప్పటి నుంచి స్పేస్ఎక్స్కు కాంట్రాక్టులు, టెస్లాకు గవర్నమెంట్ మద్దతు లభించింది. ఇప్పుడు జరుగుతున్న మాటల యుద్ధం వాటి భవిష్యత్పై ప్రభావం చూపవచ్చు.
Read Also : Mukesh Ambani : విమానాల ఆధునీకరణ రంగంలోకి అడుగుపెట్టిన అంబానీ
