Mojtaba khamenei : ఇరాన్ రాజకీయాల్లో ఒక అనూహ్య పరిణామం చోటుచేసుకుంది. దేశ అత్యున్నత నాయకుడిగా (సుప్రీం లీడర్) మోజ్తబా ఖమేనీ (56) బాధ్యతలు చేపట్టారు. ఎలాంటి అధికారిక పదవి లేకుండానే ఆయన ఈ అత్యున్నత పీఠాన్ని అధిరోహించడం ప్రపంచవ్యాప్తంగా చర్చనీయాంశంగా మారింది.
మోజ్తబా ఎదుగుదలకు బీజం 1986లో ఇరాన్-ఇరాక్ యుద్ధ సమయంలో పడింది. అప్పటికి కేవలం 17 ఏళ్ల వయసున్న ఆయన ‘హబీబ్ బెటాలియన్’లో ఒక సాధారణ వాలంటీర్గా చేరారు. అక్కడే ఇరాన్ రివల్యూషనరీ గార్డ్ కార్ప్స్ (IRGC)లో కీలక స్థానాలకు ఎదిగిన హొస్సేన్ తాయెబ్, హొస్సేన్ నెజాత్ వంటి కమాండర్లతో బలమైన సంబంధాలు ఏర్పరచుకున్నారు.
ఈ సైనిక నెట్వర్కే ఆయన ఎదుగుదలకు పునాది వేసిందని విశ్లేషకులు చెబుతున్నారు. కాలక్రమంలో అదే నెట్వర్క్ మోజ్తబాను ఇరాన్లో అత్యంత ప్రభావవంతమైన వ్యక్తిగా మార్చింది.
గత కొన్నేళ్లుగా మోజ్తబా తన తండ్రి, మాజీ సుప్రీం లీడర్ అలీ ఖమేనీకి బయటి ప్రపంచానికి మధ్య ఒక ‘గేట్ కీపర్’గా వ్యవహరించారు. కీలక నియామకాలు, విదేశాంగ విధానాలు, నిఘా సంస్థల కార్యకలాపాల్లో ఆయన తెర వెనుక నుంచి కీలక పాత్ర పోషించారు. అందుకే అమెరికా దౌత్యవేత్తలు ఆయన్ను ‘తెర వెనుక పాలకుడు’గా అభివర్ణించారు.
Read Also: Nellore Crime: లారీ ఢీకొని ఆటో మెకానిక్ మృతి
అయితే 1979 ఇరాన్ విప్లవం రాజరిక పాలనను అంతం చేసినప్పటికీ, ఇప్పుడు మోజ్తబా నియామకం వారసత్వ రాజకీయాల్లా కనిపిస్తోందనే విమర్శలు వినిపిస్తున్నాయి. సైన్యం (IRGC) ఒత్తిడితోనే అసెంబ్లీ ఆఫ్ ఎక్స్పర్ట్స్ ఈ నిర్ణయం తీసుకుందని పలు అంతర్జాతీయ మీడియా కథనాలు పేర్కొంటున్నాయి.
ప్రస్తుతం అంతర్గత నిరసనలు, ఆర్థిక సంక్షోభం ఎదుర్కొంటున్న ఇరాన్ను మోజ్తబా తన సైనిక నేపథ్యంతో ఎలా నడిపిస్తారన్నది ప్రపంచవ్యాప్తంగా ఆసక్తికరంగా మారింది.
Read hindi news: hindi.vaartha.com
Epaper : epaper.vaartha.com
Read Also: