జపాన్ దేశం ప్రపంచంలోనే ఎక్కువ కాలం జీవించే ప్రజలు ఉన్న దేశంగా గుర్తింపు పొందింది. ప్రత్యేకంగా వందేళ్లకు పైగా జీవించే వృద్ధుల సంఖ్య రోజురోజుకూ పెరుగుతోంది. ఇది కేవలం జన్యుపరమైన విషయం మాత్రమే కాదు, వారి జీవనశైలి, ఆహారపు అలవాట్లు(Eating habits), భావోద్వేగ దృఢత, కుటుంబ సంస్కృతుల మేళవింపే దీనికి ప్రధాన కారణం. ఇప్పుడు ఈ అంశాలను ఒక్కొక్కటిగా తెలుసుకుందాం.
హరా హచ్ బున్ మీ – తినే పద్ధతిలో మితి
జపనీయులు “హరా హచ్ బున్ మీ” అనే సిద్ధాంతాన్ని పాటిస్తారు. దీని అర్థం: కడుపు పూర్తిగా నిండే వరకు కాకుండా, దాదాపు 80 శాతం తినగానే ఆగిపోవాలి. ఇది జీర్ణవ్యవస్థపై ఒత్తిడిని తగ్గిస్తుంది మరియు మానవ శరీరాన్ని అధిక ఆహారానికి అలవాటు కాకుండా చేస్తుంది. దీని వల్ల మెటబాలిజం మెరుగవుతుంది, శరీర బరువు నియంత్రణలో ఉంటుంది.
చిన్న ప్లేట్లలో భోజనం – తిన్నదానిపై మితి నియంత్రణ
జపనీయులు పెద్ద ప్లేట్లలో కాకుండా చిన్న, భాగాలుగా వడ్డించుకుంటారు. ఆహారాన్ని అందంగా అలంకరించడమే కాకుండా, తినే మొత్తాన్ని కూడా సరిచూసుకునే అలవాటు ఉంది. కుటుంబంతో కలిసి నేలపై కూర్చొని తినడం, తినేటప్పుడు టీవీ లేదా మొబైల్ చూడకపోవడం, ఆహారాన్ని నములుతూ నెమ్మదిగా తినడం – ఇవన్నీ జీర్ణక్రియను మెరుగుపరచడంలో సహాయపడతాయి.
తక్కువ ఉప్పు, పంచదార వినియోగం
జపనీయులు ఎక్కువగా ప్రకృతిసిద్ధమైన పదార్థాలను తీసుకుంటారు. ఉప్పు, పంచదార వంటి ప్రాసెస్డ్ పదార్థాలను తక్కువగా తీసుకోవడం ద్వారా హై బీపీ, డయాబెటిస్ వంటి దీర్ఘకాలిక వ్యాధులను దూరంగా ఉంచగలుగుతున్నారు. చిన్ననాటి నుంచే అన్ని టీకాలు వేసుకునే పద్ధతి ఉండటం కూడా ఈ దేశంలో అనారోగ్య సమస్యలు తక్కువగా ఉండటానికి కారణం.
సమృద్ధిగా పోషకాహారం
జపనీయుల ఆహారంలో సముద్రపు ఆహారం, తృణధాన్యాలు, పండ్లు, సోయా, మిసో సూప్, ముడి కూరగాయలు ముఖ్యంగా ఉంటాయి. వీటిలో ఒమెగా-3 ఫ్యాటీ యాసిడ్లు, ఫైబర్, యాంటీ ఆక్సిడెంట్లు ఎక్కువగా ఉండడం వల్ల గుండె సంబంధిత వ్యాధులు, క్యాన్సర్ వంటి సమస్యల రిస్క్ తక్కువగా ఉంటుంది.
నిత్య వ్యాయామం
వాకింగ్, సైక్లింగ్, యోగా, మెడిటేషన్ – ఇవన్నీ జపనీయుల దైనందిన జీవితంలో భాగమే. వయస్సు ఎంత ఉన్నా వారు శారీరకంగా యాక్టివ్గా ఉంటారు. ఇది ఒత్తిడి నియంత్రణతో పాటు మంచి రక్తప్రసరణకు, శక్తివంతమైన కండరాలకు తోడ్పడుతుంది.
కుటుంబ సంబంధాలు – మానసిక ఆరోగ్యానికి శక్తివంతమైన మూలం
జపనీయులు కుటుంబ విలువలను గొప్పగా గౌరవిస్తారు. కుటుంబంతో గడిపే సమయం, సహజంగా వచ్చే మానసిక ఆనందం, ఒంటరితనాన్ని తగ్గించడంలో సహాయపడతాయి. ఈ మానసిక స్థిరత్వం కూడా ఆయుష్షు పెరగడానికి ముఖ్యమైన అంశం.
ఇకిగాయ్ – జీవన తాత్త్విక దృక్పథం
“ఇకిగాయ్” అనేది జపనీయుల జీవిత తత్వం – జీవితం మీద ఆశ, దానిలో అర్థం కనుగొనడం. వ్యక్తులు ప్రతిరోజూ ఓ ఉద్దేశంతో మెలకువగా లేవడం, తమ పని పట్ల ప్రేమను కలిగి ఉండడం, ఆనందంగా జీవించాలనే లక్ష్యాన్ని పొందడం – ఇవన్నీ వారిని మానసికంగా స్థిరంగా ఉంచుతాయి. దీని వల్ల ఆరోగ్యానికి ఎలాంటి ముప్పూ లేకుండా ఉంటుంది.
Read hindi news: hindi.vaartha.com
Read also: