జమ్మూ కశ్మీర్లో సుదీర్ఘ కాలంగా కొనసాగుతున్న ఉద్రిక్త పరిస్థితులు శనివారం మరింత ఉద్రిక్తతకు దారితీసాయి. శ్రీనగర్ సమీపంలోని గగనతలంలోకి ప్రవేశించిన పాకిస్తాన్కు చెందిన రెండు యుద్ధ విమానాలను భారత వైమానిక రక్షణ వ్యవస్థ కూల్చివేసింది. పాకిస్తాన్ నియంత్రణ రేఖ వెంబడి డ్రోన్ దాడులకు పాల్పడిన వెంటనే భారత వైమానిక దళాలు అప్రమత్తమయ్యాయి. ఈ ఘటనతో శ్రీనగర్తో పాటు మొత్తం జమ్మూ కశ్మీర్లో హై అలర్ట్ ప్రకటించడమే కాకుండా, అన్ని ముఖ్య విమానాశ్రయాల్లో అప్రమత్తత నెలకొంది.
ఇప్పటి వరకు ప్రధానంగా ఎస్-400 రక్షణ వ్యవస్థ గురించి చర్చ జరిగింది. అయితే, ఈసారి ఉపయోగించబడినది ‘ఆకాశ్’ స్వదేశీ వ్యూహాత్మక వ్యతిరేక క్షిపణి వ్యవస్థ. ఈ ఆధునిక వ్యవస్థ భారత భద్రతా శక్తిని మరోసారి ప్రపంచానికి చాటిచెప్పింది. డ్రోన్ల ముసుగులో పాక్ నిర్వహించిన దాడులను సైతం గగనతలంలోనే అడ్డుకుని, భారత వైమానిక నిపుణులు అత్యుత్తమ మానవీయ, సాంకేతిక నైపుణ్యం చూపారు.
పాకిస్తాన్ స్థావరాలపై భారత ప్రతీకార దాడులు – ఉగ్రవాదానికి గట్టి సమాధానం
పాకిస్తాన్ గత రెండు రోజులుగా భారత పౌర ప్రాంతాలను లక్ష్యంగా చేసుకుని డ్రోన్లు, మిసైళ్లు ప్రయోగిస్తున్న నేపథ్యంలో భారత సైన్యం కూడా ఊరుకోలేదు. శనివారం ఉదయం భారత దళాలు పాకిస్తాన్ లోని నాలుగు ప్రధాన వైమానిక స్థావరాలపై గట్టి ప్రతీకార దాడులు నిర్వహించాయి. ఇవి ముల్తాన్, సియాల్కోట్, మిర్పూర్, బహావల్పూర్ ప్రాంతాల్లో ఉన్నట్లు సమాచారం. ఇండియాలోని 26 ప్రదేశాలపై పాకిస్తాన్ చేసిన దాడికి తక్షణ ప్రతీకారంగా ఈ భారత సైన్యం దాడి చేపట్టింది.
ఉధంపూర్లో పేలుడు – రాజౌరిలో ఆస్తుల నష్టం
ఈ ఉద్రిక్త వాతావరణం మధ్యే జమ్మూ కశ్మీర్లోని ఉధంపూర్ జిల్లాలోని దిబ్బర్ ప్రాంతంలో ఒక భారీ పేలుడు సంభవించింది. దీంతో చుట్టుపక్కల ప్రాంతాల్లో పొగలు కమ్ముకున్నాయి. వరుస పేలుళ్ల ధ్వనితో రాజౌరి ప్రాంతంలోని అనేక ఇళ్లకు గణనీయమైన నష్టం జరిగింది. ప్రజలలో భయాందోళనలు నెలకొన్నాయి. పౌరుల రక్షణ దృష్ట్యా అక్కడ భద్రతా దళాలు పెద్ద ఎత్తున మోహరించబడ్డాయి. మొత్తం రాజౌరి జిల్లాలో శాంతి భద్రతల పర్యవేక్షణ పెంపొందించడంపై దృష్టి పెట్టారు.
పహల్గామ్ దాడి తర్వాత పెరిగిన ఉద్రిక్తత – ద్వైపాక్షిక సంబంధాలు పతన మార్గంలో
ఏప్రిల్ 22న పహల్గామ్లో జరిగిన ఉగ్రవాద దాడి తర్వాత ఇండియా, పాకిస్తాన్ మధ్య దౌత్య సంబంధాలు తీవ్రంగా దెబ్బతిన్నాయి. సరిహద్దు ఉగ్రవాదానికి మద్దతు ఇచ్చినందుకు పాకిస్తాన్ను భారత ప్రభుత్వం కార్నర్ చేసింది. అలాగే మే 7న పాకిస్తాన్, పాకిస్తాన్ ఆక్రమిత కశ్మీర్లోని ఉగ్రవాద శిబిరాలపై దాడులు చేసింది భారత్. ప్రతీకారంగా పాకిస్తాన్ గత రెండు రోజులుగా సైనిక, పౌర మౌలిక సదుపాయాలను లక్ష్యంగా చేసుకుని అనేక భారతీయ నగరాలపై డ్రోన్లు, క్షిపణులను ప్రయోగించి యుద్ధానికి కాలుదువ్వుతోంది.
Read also: Vladimir Putin : పక్కపక్కనే కూర్చుని వీక్షించిన పుతిన్, జిన్ పింగ్