గత యాభై ఏళ్లలో ఎన్నడూ లేని విధంగా, అమెరికాలో వలసదారుల సంఖ్య (Number of immigrants in America) గణనీయంగా తగ్గిపోయింది. ఈ మార్పుకు ప్రధాన కారణంగా, ట్రంప్ ప్రభుత్వం చేపట్టిన కఠిన వలస విధానాలు పేర్కొంటున్నారు నిపుణులు. తాజా సమాచారం ప్రకారం, వలసదారుల జనం అమోఘంగా తగ్గిన దాఖలాలు బయటపడ్డాయి.2025 మొదటి ఆరు నెలల్లోనే దేశంలో వలసదారుల సంఖ్య ఏకంగా 14 లక్షల మేర తగ్గింది. ట్రంప్ (Trump) రెండోసారి అధ్యక్షుడిగా బాధ్యతలు చేపట్టే సమయానికి వలసదారుల సంఖ్య 5.33 కోట్లుగా ఉండగా, ఇప్పుడు అది 5.19 కోట్లకు పడిపోయిందని న్యూయార్క్ పోస్ట్ నివేదిక వెల్లడించింది. ఇది అమెరికా వలస చరిత్రలో అనూహ్యమైన పరిణామంగా నిలిచింది.
స్వచ్ఛందంగా వెళ్లిపోయినవారు, బలవంతంగా పంపించినవారు
డిపార్ట్మెంట్ ఆఫ్ హోమ్ల్యాండ్ సెక్యూరిటీ (DHS) సమాచారం ప్రకారం, దాదాపు 16 లక్షల మంది వలసదారులు స్వచ్ఛందంగా అమెరికాను విడిచివేశారు. మరోవైపు, ఇమ్మిగ్రేషన్ అండ్ కస్టమ్స్ ఎన్ఫోర్స్మెంట్ (ICE) అధికారులు కేవలం 200 రోజుల్లో 3.3 లక్షల మందిని బలవంతంగా దేశం నుంచి పంపించారు.న్యూయార్క్, లాస్ ఏంజిల్స్, చికాగో వంటి ప్రధాన నగరాల్లో 3.59 లక్షల మంది అక్రమ వలసదారులను అదుపులోకి తీసుకున్నారు. ఈ దాడులు దేశవ్యాప్తంగా వలసదారుల్లో భయాన్ని కలిగించాయి. వలస జీవితం ఇకపై సాఫీగా సాగదు అన్న భయంతో కొంతమంది ముందుగానే వెనుదిరిగారు.
అక్రమ చొరబాట్లకు చెక్ వేసిన ట్రంప్ పాలన
ట్రంప్ ప్రభుత్వం సరిహద్దు భద్రతను కఠినంగా అమలు చేసింది. నెలకు 5,000 కన్నా తక్కువ చొరబాట్లే నమోదయ్యాయి. వీసా గడువు ముగిసిన తరువాత దేశంలో ఉండే వారిపై, నిబంధనలు ఉల్లంఘించే విదేశీయులపై, అధికార యంత్రాంగం కఠినంగా వ్యవహరించింది.విదేశీ విద్యార్థులు, వీసా దారులపై కొత్త నియమాలు విధించారు. ఓవర్ స్టే చేసే వారిపై కఠిన చర్యలు తీసుకుంటున్నారు. ఆశ్రయం కోరేవారికి కూడా ప్రక్రియ కఠినమైంది. ఉల్లంఘనలు చేసే వారిని వెంటనే దేశం నుంచి తరిమివేస్తున్నారు.
వలసదారుల వాటా ఇప్పటికీ 15.4 శాతం
ఇన్ని మార్పులు జరిగినా, ప్రస్తుతం అమెరికా జనాభాలో వలసదారుల వాటా 15.4 శాతంగా ఉంది. కానీ ఈ గణాంకాలు మరింత తగ్గే అవకాశం ఉందని నిపుణులు చెబుతున్నారు. ICE ప్రతినిధులు ఏటా 10 లక్షల మందిని దేశ బహిష్కరణ చేయాలని లక్ష్యంగా పెట్టుకున్నారు.ప్రభుత్వం లక్ష్యం బలమైనదే అయినా, రోజుకు 3,000 మందిని అదుపులోకి తీసుకోవడం సవాలుగా మారింది. సాంకేతిక వనరుల లోపం, చట్టపరమైన పరిమితులు, మానవ హక్కుల అంశాలు ఈ లక్ష్యాన్ని కష్టతరంగా మారుస్తున్నాయి.
ట్రంప్ స్పందన – ఇది విజయం!
ఈ అభివృద్ధిని అధ్యక్షుడు ట్రంప్ స్వాగతించారు. “50 ఏళ్లలో మొదటిసారిగా నెగటివ్ నెట్ మైగ్రేషన్ నమోదు కావడం గర్వకారణం” అని ఆయన పేర్కొన్నారు. వలసల మార్పుతో దేశ భద్రత పెరిగిందని ట్రంప్ భావిస్తున్నారు.
Read Also :
