ఇరాన్ (Iran) అణ్వాయుధ అభివృద్ధిపై మరోసారి అమెరికా అధ్యక్షుడు డొనాల్డ్ ట్రంప్ (Donald Trump) ఘాటుగా స్పందించారు. తాజాగా సోషల్ మీడియా ప్లాట్ఫామ్ ‘ట్రూత్’లో పోస్టు చేసిన ట్రంప్, టెహ్రాన్లో ఉన్న ప్రజలంతా తక్షణమే నగరాన్ని ఖాళీ చేయాలని సూచించారు. ‘‘ఇరాన్ డీల్పై వారు సంతకం చేయాల్సిందే. నేను అప్పుడే వారిని హెచ్చరించాను. వారు నా మాట వినలేకపోయారు. ఇప్పుడు దాని మూలంగా ఎంతోమంది ప్రాణాలు పోతున్నాయి’’ అంటూ తీవ్ర స్థాయిలో విమర్శలు గుప్పించారు.
అణ్వాయుధాలపై అభియోగాలు
ట్రంప్ వ్యాఖ్యల ప్రకారం, ఇరాన్ అణ్వాయుధాలను సేకరించలేదని తాను ఇప్పటికే అనేకసార్లు స్పష్టంగా చెప్పానని అన్నారు. అయినా ఇరాన్ సరిహద్దుల్లో ఉద్రిక్తతలు పెరుగుతుండడం, అణు కార్యక్రమాలను కొనసాగిస్తుండడంపై ఆయన ఆందోళన వ్యక్తం చేశారు. ఆయన మాటల్లో దాగున్న అర్థం ప్రకారం, అమెరికా చర్యలు తీసుకునే అవకాశాన్ని ఉద్దేశపూర్వకంగా పేర్కొన్నట్టు అనిపిస్తోంది.
ప్రపంచం ఉలిక్కిపడేలా ట్రంప్ వ్యాఖ్యలు
టెహ్రాన్ (Tehran ) నగరాన్ని ఖాళీ చేయాలన్న ట్రంప్ పిలుపు ప్రపంచాన్ని ఉలిక్కిపడేలా చేసింది. ఇప్పటికే ఇజ్రాయెల్-ఇరాన్ మధ్య ఉద్రిక్తతలు తీవ్రమవుతున్న వేళ, ట్రంప్ చేసిన ఈ వ్యాఖ్యలు మరింత దూకుడుగా మారే సంకేతాలుగా భావిస్తున్నారు. అమెరికా అధికారికంగా ఎలాంటి చర్యలు తీసుకుంటుందనే విషయంలో స్పష్టత రానప్పటికీ, ట్రంప్ వ్యాఖ్యలతో మిడిల్ ఈస్ట్ లో భయంకర పరిణామాలు చోటుచేసుకునే అవకాశం కనిపిస్తోంది.
Read Also : Modi : ‘మోదీని చంపేయాలి’ అంటూ ఖలిస్థానీల నినాదాలు