అమెరికా(America)లో వలసదారులే లక్ష్యంగా ఫెడరల్ ఏజెంట్లు చేపట్టిన దాడులు తీవ్ర ఉద్రిక్తతకు దారితీశాయి. లాస్ ఏంజెలెస్లోని పలు ప్రాంతాల్లో రెండు హోం డిపో ప్రాంగణాలు సహా, ఇమిగ్రేషన్ అండ్ కస్టమ్స్ ఎన్ఫోర్స్మెంట్ (ICE) ఏజెంట్లు లాస్ ఏంజెలెస్ నగరంలోని పలు ప్రాంతాల్లో అకస్మాత్తుగా దాడులు జరపడం వలసదారుల మధ్య భయాన్ని, ఆందోళనను కలిగించింది. ఈ దాడులకు వ్యతిరేకంగా వందలాది మంది ప్రజలు, వలసదారుల హక్కుల కార్యకర్తలు పెద్ద ఎత్తున నిరసన ప్రదర్శనలు చేపట్టారు. దీంతో అధికారులు, ప్రదర్శనకారుల మధ్య తీవ్ర ఉద్రిక్త పరిస్థితులు నెలకొన్నాయి. ప్రముఖ కార్మిక సంఘ నాయకుడితో సహా 45 మందికి పైగా అరెస్టు అయ్యారు.
కార్మిక సంఘం నాయకుడిపై శారీరక దాడి ఆరోపణలు
కోయలిషన్ ఫర్ హ్యూమన్ ఇమిగ్రెంట్ రైట్స్ (సీహెచ్ఐఆర్ఎల్ఏ) ఆధ్వర్యంలో లాస్ ఏంజెలెస్ స్ట్రీట్లోని ఫెడరల్ భవనం సమీపంలో సుమారు 500 మంది ప్రదర్శనకారులు వలసదారులకు మద్దతుగా ప్లకార్డులు, జెండాలు ప్రదర్శిస్తూ ర్యాలీ నిర్వహించారు. సాయంత్రం 7 గంటల ప్రాంతంలో లాస్ ఏంజెలెస్ పోలీస్ డిపార్ట్మెంట్ (ఎల్ఏపీడీ) ఈ నిరసనను చట్టవిరుద్ధమైన సమావేశంగా ప్రకటించి, వెంటనే ఖాళీ చేయాలని, లేకపోతే అరెస్టులు తప్పవని హెచ్చరించింది. రెండు హోం డిపోలు, ఒక ఫ్యాషన్ డిస్ట్రిక్ట్ సంస్థ, ఒక డోనట్ షాపుతో పాటు మొత్తం ఏడు వేర్వేరు ప్రాంతాల్లో ఎలాంటి వారెంట్లు లేకుండా కనీసం 45 మందిని అదుపులోకి తీసుకున్నారని సీహెచ్ఐఆర్ఎల్ఏ ఎగ్జిక్యూటివ్ డైరెక్టర్ ఏంజెలికా సలాస్ మధ్యాహ్నం ఏర్పాటు చేసిన విలేకరుల సమావేశంలో తెలిపారు. “మన రాజ్యాంగ హక్కులు, చట్టపరమైన ప్రక్రియ ఉల్లంఘనకు గురైతే, ఎవరి హక్కులైనా ఉల్లంఘించబడవచ్చు” అని ఆమె ఆందోళన వ్యక్తం చేశారు. “మీరు వలసదారు కానందున సురక్షితంగా ఉన్నారని అనుకుంటే, మన దేశంలో జరుగుతున్నది అపూర్వమైనదని నేను మీకు చెప్పాలనుకుంటున్నాను” అని ఆమె హెచ్చరించారు.
శాన్ డియాగో, మిన్నియాపాలిస్, ఇతర నగరాల్లో సైతం ఉద్రిక్తత
శాన్ డియాగోలోని ఓ రెస్టారెంట్లో జరిగిన ఇమిగ్రేషన్ ఎన్ఫోర్స్మెంట్ ఘటన తర్వాత ఈ నిరసనలు చెలరేగాయి. అలాగే, మిన్నియాపాలిస్లో ఫెడరల్ ఏజెంట్లు లాటినో కమ్యూనిటీలోకి ప్రవేశించినప్పుడు కూడా ప్రదర్శనలు జరిగాయి. అయితే, తాము ఇమిగ్రేషన్ ఎన్ఫోర్స్మెంట్ కోసం కాకుండా, క్రిమినల్ దర్యాప్తునకు సంబంధించిన విషయమై వచ్చామని అధికారులు అప్పుడు స్పష్టం చేశారు. లాస్ ఏంజెలెస్లోని నిరసనల సమయంలో, కొందరు ఆందోళనకారులు ఫెడరల్ భవనంపై గ్రాఫిటీ వేశారని, దీనికి ప్రతిగా పోలీసులు పొగ బాంబులు ప్రయోగించారని లాస్ ఏంజెలెస్ టైమ్స్ నివేదించింది.
రాజ్యాంగ ఉల్లంఘనపై తీవ్ర విమర్శ
సర్వీస్ ఎంప్లాయీస్ ఇంటర్నేషనల్ యూనియన్ (ఎస్ఈఐయూ) కాలిఫోర్నియా ప్రెసిడెంట్ డేవిడ్ హ్యుయెర్టా (David Huerta) అరెస్టుతో నిరసనలు మరింత తీవ్రరూపం దాల్చాయి. లాస్ ఏంజెలెస్ ఫెడరల్ భవనం వద్ద పెద్ద సంఖ్యలో ప్రజలు గుమిగూడి, ఐస్ దాడులను ఖండిస్తూ, హ్యుయెర్టా (David Huerta) విడుదలను డిమాండ్ చేశారు. దాడులను రికార్డు చేస్తున్న సమయంలో హ్యుయెర్టా గాయపడ్డారని, ఫెడరల్ ఏజెంట్ల విధులకు ఆటంకం కలిగించారనే ఆరోపణలతో ఆయనను అరెస్టు చేశారని కార్మిక సంఘం ఒక ప్రకటనలో తెలిపింది. 58 ఏళ్ల హ్యుయెర్టాకు ఆసుపత్రిలో వైద్య చికిత్స అందించిన అనంతరం సెంట్రల్ ఎల్ఏలోని మెట్రోపాలిటన్ డిటెన్షన్ సెంటర్కు తరలించారు. “నాకు జరిగింది నా గురించి కాదు, ఇది చాలా పెద్ద విషయం” అని ఆసుపత్రి నుంచి విడుదల చేసిన ఒక ప్రకటనలో హ్యుయెర్టా (David Huerta) పేర్కొన్నారు. “కష్టపడి పనిచేసే ప్రజలు, మన కుటుంబ సభ్యులు, మన సమాజ సభ్యులను నేరస్థులుగా పరిగణిస్తున్నారు. ఈ అన్యాయాన్ని మనం అందరం కలిసికట్టుగా వ్యతిరేకించాలి” అని ఆయన పిలుపునిచ్చారు. ఈ పరిణామాలు అమెరికాలో ప్రజాస్వామ్యం, న్యాయబద్ధత పట్ల అనేక ప్రశ్నలు రేపుతున్నాయి. వలసదారులు మానవ హక్కుల కోసం చేసే పోరాటం రాజకీయంగా ప్రభావితమవుతోందా? అన్నది ప్రధాన చర్చాంశంగా మారింది.
Read Also: Donald Trump: అమెరికా వలస విధానాల్లో కఠినతరం