ప్రపంచంలోని అత్యంత జనాభా గల దేశాల్లో ఒకటైన చైనాలో, గత కొన్ని దశాబ్దాలుగా అమలులో ఉన్న “ఒకే బిడ్డ విధానం” ఫలితంగా ప్రస్తుతం తీవ్రమైన లింగ అసమానత ఏర్పడింది. ముఖ్యంగా పురుషుల సంఖ్య గణనీయంగా ఎక్కువ కావడం వల్ల వివాహ సంబంధాలు కలుపుకోవడం కొంతమందికి అసాధ్యంగా మారింది. దీనిని అవకాశంగా మలుచుకుంటూ వివాహ మోసాల ముఠాలు యాక్టివ్ అవుతున్నాయి. ఇటీవలి పరిణామాల్లో, చైనా పౌరులు బంగ్లాదేశ్ వంటి దేశాల్లోకి అక్రమంగా వివాహాలు చేసుకుంటున్నారన్న ఆరోపణల నేపథ్యంలో, చైనా రాయబార కార్యాలయం (Embassy in Bangladesh) కీలక హెచ్చరికలు జారీ చేసింది.
ఆన్లైన్ మోసాల పట్ల అప్రమత్తత
అక్రమ పద్ధతుల్లో సరిహద్దులు దాటి వివాహాలు చేసుకోవద్దని, ఆన్లైన్ వేదికగా జరిగే పెళ్లిళ్ల మోసాల పట్ల అప్రమత్తంగా ఉండాలని హెచ్చరించింది. ఈ మేరకు చైనా ప్రభుత్వ నియంత్రణలోని గ్లోబల్ టైమ్స్ పత్రిక ఈ విషయాన్ని వెల్లడించింది. సరిహద్దు డేటింగ్ వంటి మోసపూరిత ప్రకటనలను నమ్మవద్దని ఎంబసీ సూచించింది. సుమారు 30 మిలియన్ల మంది చైనా పురుషులకు వివాహ వయసు వచ్చినా జీవిత భాగస్వామి దొరకడం లేదు. అనధికారిక మార్గాల్లో లేదా వాణిజ్య మ్యాచ్మేకింగ్ ఏజెన్సీల ద్వారా విదేశీ వధువులను వెతకడం చైనా చట్టాల ప్రకారం నిషేధమని గుర్తుచేసింది. విదేశీ వధువును కొనడం అనే ఆలోచనను పూర్తిగా విడనాడాలని, బంగ్లాదేశ్లో వివాహం చేసుకునే ముందు అన్ని విషయాలను క్షుణ్ణంగా పరిశీలించాలని చైనా పౌరులను కోరింది.
చట్టపరమైన ఆంక్షలు
చైనా చట్టాల ప్రకారం, అక్రమ వివాహాలు తీవ్రమైన, చట్టపరమైన చిక్కులకు దారితీస్తాయని చైనా రాయబార కార్యాలయం హెచ్చరించింది. చైనా చట్టాల ప్రకారం, సరిహద్దు దాటి వివాహ సేవలు అందించే ఏజెన్సీలపై నిషేధం ఉంది. ఎవరైనా లాభాపేక్షతో లేదా మోసపూరితంగా ఇలాంటి కార్యకలాపాలకు పాల్పడితే కఠిన చర్యలు తప్పవని స్పష్టం చేసింది. ప్రేమ లేదా వివాహ మోసాల బారిన పడిన బాధితులు వెంటనే చైనాలోని ప్రజా భద్రతా అధికారులకు ఫిర్యాదు చేయాలని సూచించింది.
లింగ అసమానత – మూల సమస్య, బాధితులకు సూచనలు
ఈ సమస్య వెనుక ఉన్న అసలు మూల కారణం చైనాలోని లింగ సంబంధిత ధోరణులే. బంగ్లాదేశ్ యాంటీ-హ్యూమన్ ట్రాఫికింగ్ చట్టం మరియు పీనల్ కోడ్ ప్రకారం, మానవ అక్రమ రవాణాకు పాల్పడే వారికి కనీసం ఏడేళ్ల జైలు శిక్ష, కొన్ని సందర్భాల్లో జీవిత ఖైదు లేదా మరణశిక్ష కూడా విధించే అవకాశం ఉంది. ఇలాంటి కార్యకలాపాలకు సహకరించినా, ప్రోత్సహించినా మూడు నుంచి ఏడేళ్ల జైలు శిక్షతో పాటు 20,000 టాకా (సుమారు $185) వరకు జరిమానా విధిస్తారు. గతంలో టిక్టాక్ వంటి మాధ్యమాలను ఉపయోగించి బంగ్లాదేశ్ మహిళలను పొరుగున ఉన్న భారతదేశంలో లైంగిక వృత్తిలోకి నెట్టిన ఘటనలు కూడా జరిగాయని అల్ జజీరా పేర్కొంది. ఈ తప్పుడు సంబంధాలు చివరికి మహిళలపై లైంగిక వాంఛల నెరవేరుస్తూ, వారికి బాధలు తెచ్చే ఘటనలుగా మారుతున్నాయి.
Read also: Pakistan: పాత చైనా సైనిక చిత్రాన్ని ప్రధానికి బహుమతిగా ఇచ్చిన పాక్ ఆర్మీ చీఫ్
