AI Layoffs : కృత్రిమ మేధ ప్రభావం.. 1100 మందికి ఉద్యోగాల కోత

కృత్రిమ మేధ ప్రభావంతో ఉద్యోగాల కోత

AI Layoffs : ప్రపంచవ్యాప్తంగా పేరొందిన ఓ సైబర్ భద్రతా సంస్థ సంచలన నిర్ణయం తీసుకుంది. కృత్రిమ మేధ ఆధారిత కొత్త వ్యవస్థలకు సిద్ధమవుతున్న నేపథ్యంలో 1,100 మందికి పైగా ఉద్యోగులను తొలగిస్తున్నట్లు ప్రకటించింది. ఇది సంస్థ మొత్తం ఉద్యోగుల్లో దాదాపు 20 శాతానికి సమానం. త్రైమాసిక ఆర్థిక ఫలితాలు ప్రకటించిన అనంతరం ఉద్యోగులకు ఈ విషయాన్ని సంస్థ యాజమాన్యం తెలియజేసింది.

ఖర్చుల కోత కాదన్న యాజమాన్యం

ఈ నిర్ణయం ఖర్చులను తగ్గించడానికి కాదని సంస్థ స్పష్టం చేసింది. భవిష్యత్తులో కృత్రిమ మేధ ఆధారంగా పనిచేసే వ్యవస్థలకు అనుగుణంగా సంస్థ నిర్మాణాన్ని మార్చడమే ప్రధాన లక్ష్యమని తెలిపింది. గత మూడు నెలల్లోనే కృత్రిమ మేధ వినియోగం 600 శాతానికి పైగా పెరిగిందని వెల్లడించింది. ఇంజినీరింగ్, ఆర్థిక విభాగాలు, మానవ వనరుల విభాగాల్లో వేల సంఖ్యలో కృత్రిమ మేధ ఆధారిత కార్యకలాపాలు కొనసాగుతున్నాయని పేర్కొంది.

ఇకపై కోతలు ఉండవన్న హామీ

ప్రస్తుత ఉద్యోగాల తొలగింపు ఒకేసారి తీసుకున్న నిర్ణయమని, భవిష్యత్తులో మళ్లీ ఇలాంటి కోతలు ఉండవని యాజమాన్యం ఉద్యోగులకు హామీ ఇచ్చింది. పదేపదే చిన్నచిన్న ఉద్యోగ కోతలు విధించడం వల్ల ఉద్యోగుల్లో అనిశ్చితి పెరుగుతుందని, అందుకే ఒకేసారి కఠిన నిర్ణయం తీసుకున్నామని తెలిపింది. తొలగించిన ఉద్యోగులకు అత్యుత్తమ పరిహార ప్యాకేజీలు అందిస్తున్నట్లు సంస్థ వెల్లడించింది.