పశ్చిమాసియాలో (In West Asia) శుక్రవారం ఉద్రిక్తతలు మరోసారి ఉధృతం అయ్యాయి. ఇరాన్లోని అణు, సైనిక కేంద్రాలే లక్ష్యంగా ఇజ్రాయెల్ (Israel) తీవ్రమైన వైమానిక దాడులు జరిపింది. ఇరాన్ అణుబాంబు తయారీకి చాలా దగ్గరగా ఉందని, దీనిని ఆపాల్సిన అవసరం ఉందని ఇజ్రాయెల్ అధికారికంగా ప్రకటించింది. ఈ దాడులు యుద్ధ విమానాలు, డ్రోన్ల ద్వారా రహస్యంగా జరిగాయి. కొన్ని కీలక కేంద్రాలు పూర్తిగా ధ్వంసమయ్యాయి. ఈ దాడుల్లో పలువురు ప్రముఖ శాస్త్రవేత్తలు, సైనికాధికారులు ప్రాణాలు కోల్పోయినట్లు సమాచారం.ఇరాన్ యురేనియంను ఆయుధంగా మార్చే విషయంలో ప్రమాదకర దశను చేరుకున్నట్టు ఇటీవల వచ్చిన రహస్య నివేదికలు సూచించాయి. దీనినే ఆధారంగా చేసుకుని ఇజ్రాయెల్ ఈ దాడులకు పూనుకుంది. “పాయింట్ ఆఫ్ నో రిటర్న్” వద్ద ఉన్న అణు కార్యకలాపాలను ఆపేందుకు ఇదే సరైన సమయమని భావించినట్టు తెలుస్తోంది.
ఇజ్రాయెల్పై కౌంటర్ దాడి చేసిన ఇరాన్
ఇజ్రాయెల్ దాడులకు వెంటనే తీవ్రంగా స్పందించిన ఇరాన్ శుక్రవారం రాత్రి ప్రతీకార దాడులకు దిగింది. 150కి పైగా బాలిస్టిక్ క్షిపణులు, 100కు పైగా డ్రోన్లను ప్రయోగించినట్లు సమాచారం. ఈ దాడులతో టెల్ అవీవ్, జెరూసలెం నగరాల్లో భారీ పేలుళ్ల శబ్దాలు మోగాయి. ప్రజలు భయంతో షెల్టర్లలోకి పరుగులు తీశారు. కనీసం రెండు క్షిపణులు టెల్ అవీవ్లో నేలపై పడ్డాయని మీడియా పేర్కొంది.ఈ దాడుల్లో టెల్ అవీవ్లో ఏడుగురికి గాయాలయ్యాయి. గాయపడిన వారిలో ఒకరి పరిస్థితి విషమంగా ఉన్నట్టు ఫైర్ అండ్ రెస్క్యూ సర్వీసెస్ తెలిపింది. ఒక భవనంపై క్షిపణి పడటంతో వీరు గాయపడ్డారు. శనివారం తెల్లవారుజామున జెరూసలెం ఆకాశంలో మళ్లీ పేలుళ్ల శబ్దాలు వినిపించాయి. ఇవి ఇజ్రాయెల్ యాంటీ మిసైల్ ఇంటర్సెప్షన్ చర్యల వల్ల కావచ్చని అనుమానిస్తున్నారు.
టెహ్రాన్ విమానాశ్రయంలో అగ్ని ప్రమాదం
ఇరాన్ రాజధాని టెహ్రాన్లోని మెహరాబాద్ అంతర్జాతీయ విమానాశ్రయంలో శనివారం అగ్ని ప్రమాదం చోటుచేసుకుంది. తస్నీమ్ వార్తా సంస్థ తెలిపిన వివరాల ప్రకారం విమానాశ్రయంలో మంటలు ఎగిసిపడ్డాయి. ఆ మంటల వీడియో ఒకటి సోషల్ మీడియా ‘ఎక్స్’లో పోస్ట్ అయింది. మంటలతో పాటు నల్ల పొగలు, నారింజ రంగు అగ్ని కనిపించింది.
భవిష్యత్లో ఘర్షణ ముదిరే అవకాశాలు
ఇజ్రాయెల్ చేపట్టిన ఈ హఠాత్ దాడుల ద్వారా మరోసారి మిడిల్ ఈస్ట్లో ఉద్రిక్తతలు పెరిగే సూచనలు కనిపిస్తున్నాయి. ఇరాన్ను చర్చలకు రప్పించడం లేదా అణు ప్రణాళికను అడ్డుకోవడం ఇజ్రాయెల్ లక్ష్యంగా పెట్టుకున్నా, దీని ఫలితంగా రెండు దేశాలు పొడవైన ఘర్షణకు సిద్ధమవుతున్నట్టే కనిపిస్తోంది. రాబోయే రోజుల్లో పరిస్థితి మరింత ఉద్రిక్తతను సంతరించుకునే అవకాశం ఉందని అంతర్జాతీయ విశ్లేషకులు చెబుతున్నారు.
Read Also : KTR : 352 కింద కేటీఆర్పై కేసు నమోదు చేసిన హైదరాబాద్ పోలీసులు