నైజీరియాలో ఓ స్కూల్లో జరిగిన ఘోర అగ్నిప్రమాదం తీవ్ర విషాదాన్ని మిగిల్చింది. జంఫారా రాష్ట్రంలోని కైరా నమోదాలో ఉన్న ఓ ఇస్లామిక్ పాఠశాలలో అకస్మాత్తుగా మంటలు చెలరేగడంతో 17 మంది చిన్నారులు ప్రాణాలు కోల్పోయారు. ఈ ప్రమాదంలో మరికొంత మంది విద్యార్థులు తీవ్రంగా గాయపడినట్లు సమాచారం.
ప్రమాదం సంభవించిన సమయంలో బడిలో సుమారు 100 మంది విద్యార్థులు ఉన్నట్లు అధికారులు వెల్లడించారు. స్కూల్ పక్కనే నిల్వ ఉంచిన కర్రలకు మంటలు అంటుకోవడంతో మంటలు వేగంగా వ్యాపించి, చిన్నారులు బయటకు రావడానికి అవకాశం లేకుండా పోయింది. ఈ ఘటన ఒక్కసారిగా ఊహించని విధంగా చోటుచేసుకోవడంతో అందరూ భయంతో పరుగులు తీశారు.
ప్రమాదం జరిగిన వెంటనే స్థానికులు, రెస్క్యూ సిబ్బంది సహాయ చర్యలు చేపట్టారు. అయితే మంటలు విపరీతంగా వ్యాపించడంతో చిన్నారులను రక్షించడంలో విఫలమయ్యారు. ఈ దుర్ఘటనపై స్థానిక పోలీసులు కేసు నమోదు చేసుకుని దర్యాప్తు ప్రారంభించారు. స్కూల్ నిర్వహణలో ఎలాంటి అలక్ష్యం చోటుచేసుకున్నదా? భద్రతా ప్రమాణాలు పాటించాయా? అనే కోణంలో అధికారులు విచారణ చేపట్టారు.
ఇలాంటి ప్రమాదాలు పునరావృతం కాకుండా స్కూల్ భద్రతా నిబంధనలను మరింత కఠినతరం చేయాల్సిన అవసరం ఉందని స్థానికులు డిమాండ్ చేస్తున్నారు. చిన్నారుల కోసం తగిన భద్రతా చర్యలు అమలు చేయకపోతే ఇలాంటి ఘోర ఘటనలు మళ్లీ జరగొచ్చని నిపుణులు హెచ్చరిస్తున్నారు.
ఈ అగ్నిప్రమాద ఘటనపై ప్రపంచవ్యాప్తంగా స్పందనలు వెల్లువెత్తుతున్నాయి. మృతి చెందిన చిన్నారుల కుటుంబాలకు పలువురు సంతాపం తెలియజేశారు. నైజీరియా ప్రభుత్వం బాధిత కుటుంబాలకు ఆర్థిక సాయంతో పాటు తగిన న్యాయం చేయాలని ప్రజలు కోరుతున్నారు.