ఇజ్రాయెల్ దాడుల నేపథ్యంలో ఇరాన్(Iran)లోని భారతీయులు, ముఖ్యంగా వైద్య విద్యను అభ్యసిస్తున్న విద్యార్థులు తీవ్ర ఇబ్బందులు ఎదుర్కొంటున్నారు. ప్రస్తుత ఉద్రిక్త పరిస్థితుల కారణంగా వారి భద్రత, చదువుల భవిష్యత్తు ప్రశ్నార్థకంగా మారింది. కుటుంబ సభ్యులు తీవ్ర ఆందోళన చెందుతున్నారు.
వైద్య విద్యకు ఇరాన్ ఎందుకు గమ్యం?
విదేశీ వ్యవహారాల శాఖ రెండేళ్ల కిందటి (2022) అంచనాల ప్రకారం, ఇరాన్(Iran)లో సుమారు 2,050 మంది భారతీయ విద్యార్థులు వైద్య విద్య అభ్యసిస్తున్నారు. తాజా సమాచారం మేరకు ప్రస్తుతం దాదాపు 1,500 మంది విద్యార్థులు అక్కడ ఎంబీబీఎస్ చదువుతున్నట్లు తెలుస్తోంది. టెహ్రాన్, షాహిద్ బహెష్తి, ఇస్లామిక్ ఆజాద్, హమదాన్, గోలెస్థాన్, కెర్మన్ వంటి ప్రముఖ వైద్య విశ్వవిద్యాలయాల్లో వీరు ప్రవేశాలు పొందారు.
నీట్-యూజీ సీట్లు తక్కువగా ఉండటమే కారణం
భారత్లో వైద్య విద్యకు తీవ్రమైన పోటీ ఉండటం, ప్రైవేటు కళాశాలల్లో ఫీజులు అధికంగా ఉండటంతో అనేకమంది విద్యార్థులు విదేశాల వైపు చూస్తున్నారు. ఈ ఏడాది దేశవ్యాప్తంగా దాదాపు 23 లక్షల మంది నీట్-యూజీ పరీక్షకు హాజరుకాగా, అందుబాటులో ఉన్న ఎంబీబీఎస్ సీట్లు కేవలం 1.1 లక్షలు మాత్రమే. ప్రభుత్వ కళాశాలల్లో 55,000 సీట్లు మాత్రమే ఉన్నాయి. ఈ నేపథ్యంలో, తక్కువ ఖర్చుతో నాణ్యమైన వైద్య విద్యను అందించే దేశాలకు భారతీయ విద్యార్థులు ప్రాధాన్యత ఇస్తున్నారు.
ఫీజులు తక్కువ
ఇరాన్(Iran)లోని వైద్య విశ్వవిద్యాలయాల్లో ట్యూషన్ ఫీజులు ఐరోపా, అమెరికా దేశాలతో పోలిస్తే చాలా తక్కువ. ఐదేళ్ల వైద్య విద్యకు సుమారు రూ.14 లక్షల నుంచి రూ.15 లక్షల వరకు ఖర్చవుతుందని అంచనా. దీనికితోడు, ఇరాన్ ప్రభుత్వం విదేశీ విద్యార్థులను ఆకర్షించడానికి స్కాలర్షిప్లు కూడా అందిస్తోంది. అధునాతన మౌలిక సదుపాయాలు, సమగ్ర పాఠ్య ప్రణాళిక, వైద్య చికిత్సలో అనుభవానికి అవకాశాలు ఉండటం, ఇరాన్(Iran)లో పొందిన ఎంబీబీఎస్
పట్టాకు జాతీయ వైద్య కమిషన్ (ఎన్ఎంసీ) గుర్తింపు లభించడం వంటి కారణాలతో భారతీయ విద్యార్థులు ఇరాన్ను ఎంచుకుంటున్నారు. అక్కడ ఎంబీబీఎస్ పూర్తిచేసిన వారు భారత్లో ఫారిన్ మెడికల్ గ్రాడ్యుయేట్ ఎగ్జామినేషన్ (ఎఫ్ఎంజీఈ)లో ఉత్తీర్ణత సాధించి ప్రాక్టీస్ చేసుకోవచ్చు. అయితే, ప్రస్తుత ఉద్రిక్త పరిస్థితులు వారి ఆశలపై నీళ్లు చల్లుతున్నాయి.
భారత్ ప్రభుత్వం స్పందన అవసరం
ప్రస్తుత పరిస్థితుల్లో విద్యార్థులు విద్యను కొనసాగించాలా లేక సురక్షితంగా భారత్కి తిరిగి రావాలా అనే తార్కిక సమస్యలో ఉన్నారు. భవిష్యత్ వీసా, చదువు కొనసాగింపు, లేదా ట్రాన్స్ఫర్కి అవకాశం ఉందా? అనే అనేక ప్రశ్నలు తలెత్తుతున్నాయి. విదేశీ వ్యవహారాల శాఖ & భారత రాయబారి స్థానిక పరిస్థితులపై నేరుగా సమాచారం ఇవ్వాలి. అవసరమైతే విద్యార్థుల కోసం ఎవాక్యుయేషన్ ప్లాన్ సిద్ధం చేయాలని తల్లిదండ్రులు డిమాండ్ చేస్తున్నారు.
Read Also: F-35B: తిరువనంతపురంలో నిలిచిపోయిన బ్రిటన్ యుద్ధ విమానం