డ్రైవర్ లేకుండానే దూసుకెళ్లే బస్సు (A bus that runs without a driver) చూశారా? ఇకపై ఆ అద్భుతం కేవలం సినిమాల్లో కాదు, నిజ జీవితంలోనూ కనపడనుంది. హైదరాబాద్లో ఈ కల సాకారమైంది.ఇండియన్ ఇనిస్టిట్యూట్ ఆఫ్ టెక్నాలజీ (IIT) హైదరాబాద్ (IIT Hyderabad) క్యాంపస్ ఇప్పుడు నూతన యుగానికి నాంది పలికింది. దేశంలో తొలిసారిగా విద్యాసంస్థ ప్రాంగణంలో పూర్తిగా డ్రైవర్ లేని బస్సులు రవాణా సేవలు అందించటం గర్వకారణం.ఈ అత్యాధునిక డ్రైవర్రహిత బస్సుల వెనుక ఉన్న శక్తి – ‘టెక్నాలజీ ఇన్నోవేషన్ హబ్ ఆన్ అటానమస్ నావిగేషన్ (టీహన్)’. IIT హైదరాబాద్లో ఈ ప్రత్యేక విభాగం పూర్తిగా దేశీయంగా ఈ టెక్నాలజీని అభివృద్ధి చేసింది.ప్రస్తుతం క్యాంపస్లో రెండు మోడళ్ల బస్సులు నడుస్తున్నాయి. ఒకటి ఆరు సీట్ల సామర్థ్యం గలది. మరొకటి పద్నాలుగు మందికి సరిపడే బస్సు. ఇవి విద్యార్థులు, అధ్యాపకులు, సిబ్బందికి క్యాంపస్లో రవాణా సేవలు అందిస్తున్నాయి.
విద్యార్థులకు ఎంతో ఉపయోగకరంగా మారింది
వర్సిటీ మెయిన్ గేటు నుంచి ఇతర విభాగాలకు వెళ్లేందుకు ఇప్పుడు ఈ బస్సులు వినియోగంలో ఉన్నాయి. గత కొన్ని రోజులుగా ప్రయాణిస్తున్న విద్యార్థుల స్పందన అద్భుతంగా ఉంది.ఈ డ్రైవర్లెస్ బస్సులు ఆర్టిఫిషియల్ ఇంటెలిజెన్స్ ఆధారంగా పనిచేస్తాయి. మార్గం మధ్యలో అడ్డంకులు ఉన్నా, అవి తక్షణమే గుర్తించి, సురక్షిత దారిలో ప్రయాణాన్ని కొనసాగిస్తాయి.ఈ బస్సుల్లో ‘అటానమస్ ఎమర్జెన్సీ బ్రేకింగ్’ వ్యవస్థ ఉంది. అదనంగా ‘అడాప్టివ్ క్రూయిజ్ కంట్రోల్’ వంటి ఫీచర్లు వేగాన్ని సమర్థంగా నియంత్రిస్తాయి. ప్రయాణం సాఫీగా, సురక్షితంగా సాగేందుకు ఇవి కీలకం.
ప్రయాణికుల నుంచి విశేష స్పందన
టీహన్ ప్రతినిధుల ప్రకారం, ఇప్పటివరకు ప్రయాణించిన వారిలో 90 శాతం మంది కొత్త టెక్నాలజీపై సంతృప్తిగా ఉన్నారు. ఇది భవిష్యత్తు రవాణా మార్గదర్శకంగా నిలుస్తుందనే నమ్మకాన్ని పెంచింది.ప్రస్తుతం ఇవి కేవలం క్యాంపస్కే పరిమితమైనా, రానున్న రోజుల్లో నగర రవాణాలోనూ ఇవే ప్రధానంగా మారే అవకాశం ఉంది. బస్సులు నడిచే తీరులో, ప్రయాణం అనుభవంలో పూర్తిగా విప్లవాత్మక మార్పు రానుందని నిపుణుల అభిప్రాయం.దేశీయంగా అభివృద్ధి చేసిన టెక్నాలజీతో డ్రైవర్ లేని బస్సులు నడిపించగలగటం ఎంతో గర్వకారణం. ఇది ‘మేక్ ఇన్ ఇండియా’కి నిజమైన ఉదాహరణగా నిలిచింది.
Read Also :