Sesame Oil: నువ్వులు మన ప్రాచీన ఆహార సంస్కృతిలో ఎంతో ప్రాముఖ్యత కలిగినవిగా నిలిచాయి. అయితే, నువ్వుల నుండి తయారయ్యే నూనెకు ఆయుర్వేదంలో ఉన్న స్థానం మరింత గొప్పది. నువ్వుల నూనెను తినడానికి ఉపయోగించడమే కాదు, ఆరోగ్య పరంగా, సౌందర్య పరంగా అనేక రకాలుగా వినియోగించవచ్చు. ఇది సహజ ఔషధ గుణాలతో నిండిన విలువైన ఆయిల్.
నువ్వుల నూనెలో పోషక విలువలు
నువ్వుల నూనె అనేది యాంటీ ఆక్సిడెంట్లు, ఒమేగా-6 ఫ్యాటీ యాసిడ్స్, విటమిన్ ఈ, బి, ఐరన్, జింక్, ఫాస్ఫరస్, మెగ్నీషియం, కాల్షియం వంటి అనేక పోషకాల సమ్మేళనం. ఈ పోషకాల వల్ల శరీరంలో రోగనిరోధక శక్తి పెరగడమే కాకుండా చర్మం, జుట్టు, శరీర ఆరోగ్యానికి విస్తృతమైన ప్రయోజనాలు కలుగుతాయి.
చర్మ సంరక్షణలో నువ్వుల నూనె ప్రాముఖ్యత
నువ్వుల నూనెను చర్మంపై మర్దన చేయడం వల్ల UV కిరణాల నుండి రక్షణ పొందవచ్చు. దీన్ని ముఖం, చేతులు, కాళ్లకు అప్లై చేసి మసాజ్ చేస్తే చర్మంలోని మృత కణాలు తొలగిపోతాయి. అలాగే రక్త ప్రసరణ మెరుగవడంతో ముఖ చర్మం సహజంగా ప్రకాశిస్తుంది. నువ్వుల నూనె యొక్క యాంటీబాక్టీరియల్, యాంటీఫంగల్ లక్షణాలు చర్మ ఇన్ఫెక్షన్లను దూరం చేస్తాయి.
పొడిబారిన చర్మానికి సహజ తేమ అందించే ఆయిల్
చర్మం పొడిగా మారినప్పుడు దానికి తేమను అందించడం అవసరం. నువ్వుల నూనె సహజ తేమ లక్షణాలను కలిగి ఉంటుంది. ఇది చర్మాన్ని మృదువుగా, మెరిసేలా మార్చుతుంది. రాత్రి నిద్రపోయే ముందు ముఖానికి మసాజ్ చేసి ఉదయం గోరువెచ్చని నీటితో కడిగితే ఉత్తమ ఫలితాలు పొందవచ్చు.
మొటిమలు మరియు మలినాల నివారణకు నువ్వుల నూనె
నువ్వుల నూనెలో యాంటీ ఇన్ఫ్లమేటరీ లక్షణాలు ఉండటం వల్ల మొటిమలు తగ్గేందుకు ఇది సహాయపడుతుంది. ఒక ఇంటి చికిత్సగా అర కప్పు నువ్వుల నూనె, అర కప్పు ఆపిల్ సైడర్ వెనిగర్, పావు కప్పు నీరు కలిపి స్ప్రే బాటిల్లో భద్రపరచాలి. ఈ మిశ్రమాన్ని ప్రతిరోజూ పడుకునే ముందు ముఖానికి అప్లై చేస్తే చర్మం మృదువుగా మారుతుంది. ఒక చెంచా నువ్వుల పొడి, పాలు లేదా తేనె కలిపి స్క్రబ్గా ఉపయోగించవచ్చు. ఇది చర్మంపై మృతకణాలను తొలగించి, నిగారింపు ఇవ్వడంలో సహాయపడుతుంది. అలాగే నువ్వుల నూనెను పెదవులకు రాసుకుంటే వాటికి తేమను అందించి నల్లదనాన్ని తగ్గిస్తుంది. నెమ్మదిగా పెదవులు గులాబీ రంగులోకి మారతాయి.
సూర్యరశ్ముల నుండి రక్షణ
నువ్వుల నూనె ఒక సహజ సన్స్క్రీన్లా పనిచేస్తుంది. ఇందులో ఉన్న యాంటీఆక్సిడెంట్లు, విటమిన్ ఇ వంటి పోషకాలు చర్మాన్ని UV కిరణాల దుష్ప్రభావం నుండి కాపాడతాయి. చర్మంపై ఫ్రీ రాడికల్స్ ఉత్పత్తిని అడ్డుకుంటూ వృద్ధాప్య సంకేతాలను దూరం చేస్తుంది.
జుట్టు ఆరోగ్యానికి నువ్వుల నూనె
నువ్వుల నూనెను తలకు రాసి మాడును మసాజ్ చేస్తే కుదుళ్లు బలపడతాయి. ఇది జుట్టును నయం చేస్తుంది, చుండ్రును తగ్గిస్తుంది. వారానికి కనీసం రెండు సార్లు నువ్వుల నూనెతో తలకి మర్దనా చేసి, నెమ్మదిగా వేడి నీటితో తలస్నానం చేయడం వల్ల జుట్టు ప్రకాశవంతంగా మారుతుంది. నువ్వుల నూనెను శరీరానికి అప్లై చేసి స్నానం చేయడం వల్ల మెనిచాయ మెరుగవుతుంది. ఇది శరీరానికి అవసరమైన పోషకాలను అందించి చర్మాన్ని ఆరోగ్యంగా ఉంచుతుంది. పుట్టిన పిల్లలకి కూడా నువ్వుల నూనెతో మసాజ్ చేయడం ఆనవాయితీగా ఉంది, ఇది చర్మాన్ని మృదువుగా చేయడమే కాకుండా శక్తిని అందిస్తుంది. నువ్వుల నూనె సాధారణంగా అందరికీ అనుకూలంగా ఉంటుంది, కానీ కొన్ని సందర్భాల్లో కొన్ని వ్యక్తులకు అలెర్జీ ఏర్పడే అవకాశం ఉంది. అందుకే ఉపయోగించే ముందు చిన్న ప్యాచ్ టెస్ట్ చేయడం లేదా చర్మ నిపుణుల సలహా తీసుకోవడం మంచిది.