News Telugu: ఆధునిక జీవనశైలి, ఒత్తిడి, వ్యాయామం లేకపోవడం, మరియు అనారోగ్యకరమైన ఆహారపు అలవాట్ల కారణంగా గుండె సంబంధిత వ్యాధులు రోజురోజుకీ పెరుగుతున్నాయి. గతంలో ఇవి ఎక్కువగా వృద్ధులలో కనిపించేవి, కానీ ఇప్పుడు యువతలో కూడా ఆందోళన కలిగించే స్థాయిలో పెరుగుతున్నాయి. గుండెపోటు ఒకసారి సంభవిస్తే ప్రాణాలకు ముప్పు కలుగుతుంది, కానీ ముందే కొన్ని సంకేతాలు కనిపిస్తాయి. వాటిని గుర్తించడం ద్వారా ప్రమాదాన్ని తగ్గించుకోవచ్చు.
ఛాతీ, భుజం, దవడ నొప్పి
గుండెపోటుకు ముందు కనిపించే ముఖ్యమైన లక్షణం ఛాతీ నొప్పి (Chest pain) లేదా ఒత్తిడి. కొంతమందికి ఇది ఛాతీతో పాటు భుజాలు, చేతులు లేదా దవడ వరకు వ్యాపించవచ్చు. బరువు వేసినట్టుగా, ఒత్తిడి ఉన్నట్టుగా అనిపిస్తే దాన్ని నిర్లక్ష్యం చేయకూడదు. వెంటనే డాక్టర్ను సంప్రదించడం అవసరం.
అలసట మరియు బలహీనత
సాధారణ పనులు చేసినా, ఎక్కువ శ్రమ చేయకపోయినా తరచూ అలసటగా అనిపించడం కూడా గుండె సమస్యలకు సంకేతం కావచ్చు. ముఖ్యంగా పదేపదే బలహీనత, శక్తి లేమి అనిపిస్తే ఇది గుండెపోటు రాబోతుందన్న ముందస్తు హెచ్చరిక కావచ్చు. ఇలాంటి పరిస్థితి వస్తే తక్షణం వైద్య పరీక్షలు చేయించుకోవాలి.
తలతిరగడం మరియు మూర్ఛలు
గుండెపోటు రాకముందు ఒక నెలలోపల కొందరికి తరచూ తల తిరగడం, తాత్కాలికంగా మూర్ఛపోవడం జరగవచ్చు. దీనికి తోడు తలనొప్పి, శ్వాస ఇబ్బందులు (breathing difficulties), రక్త ప్రసరణలో అంతరాయం వంటి సమస్యలు కూడా కనిపిస్తాయి. ఈ లక్షణాలు కనిపిస్తే పరిస్థితి తీవ్రమైపోయే ముందు వెంటనే వైద్యులను సంప్రదించాలి.
శ్వాస తీసుకోవడంలో ఇబ్బందులు
శారీరక శ్రమ లేకపోయినా శ్వాస ఇబ్బందిగా అనిపించడం, గుండె రక్తాన్ని సరిగా పంపించలేకపోతున్న సంకేతం. ఇది గుండెపోటు ముందస్తు సూచన కావచ్చు. ఈ లక్షణం కనిపించినప్పుడు దాన్ని లైట్గా తీసుకోవడం ప్రమాదకరం. తక్షణం డాక్టర్ సలహా తీసుకోవాలి.
సమయానికి జాగ్రత్తలు తీసుకోవడం ఎందుకు అవసరం?
గుండెపోటు ఒక్కసారిగా రాదు. దానికి ముందే శరీరం మనకు సంకేతాలు ఇస్తుంది. వాటిని గుర్తించి సకాలంలో చికిత్స తీసుకుంటే ప్రాణాలను కాపాడుకోవచ్చు. కాబట్టి గుండె సంబంధిత సమస్యలను లైట్గా తీసుకోకుండా, చిన్న లక్షణాలకే వైద్యులను సంప్రదించడం అత్యంత ముఖ్యం.
Read hindi news: hindi.vaartha.com
Read also:
