ప్రపంచ ఆరోగ్య రంగం నేడు ఒక విప్లవాత్మక మార్గంలో ముందుకు సాగుతోంది. అత్యాధునిక సాంకేతికతలైన ఆర్టిఫిషియల్ ఇంటెలిజెన్స్ (AI), ఇంటర్నెట్ ఆఫ్ థింగ్స్ (IoT), బయోటెక్నాలజీ లాంటి మార్గాలు వైద్యశాస్త్రాన్ని కొత్త ఎత్తులకు తీసుకెళ్తున్నాయి. ఈ దిశలో ప్రముఖ జీర్ణవ్యవస్థ నిపుణుడు, పద్మవిభూషణ్ గ్రహీత డాక్టర్ నాగేశ్వర్ రెడ్డి చేసిన తాజా ఆధునిక వైద్య విధానాలు, ఆరోగ్యకరమైన జీవనశైలిపై పలు ఆసక్తికర విషయాలు పంచుకున్నారు.
స్మార్ట్ టాయిలెట్లు
డాక్టర్ నాగేశ్వర్ రెడ్డి వెల్లడించిన సమాచారం ప్రకారం, త్వరలోనే స్మార్ట్ టాయిలెట్లు ప్రజలకు అందుబాటులోకి రానున్నాయి. ఇవి మన మూత్రం, మలంలో ఉన్న రసాయనాలను, సూక్ష్మజీవులను, శరీర పదార్థాలను విశ్లేషించి, ఆరోగ్య సమాచారం అందించగలవు. ఉదాహరణకు షుగర్, ప్రోటీన్ లెవల్స్, ఇన్ఫెక్షన్లు, అవయవ ఫంక్షన్ సూచికలు, గట్ హెల్త్ సూచనలు ఇవి AI ఆధారంగా డేటాను విశ్లేషించి, డాక్టర్కు పంపించి, వ్యక్తిగత ఆరోగ్య సూచనలను సకాలంలో అందించగలవు. ఇది ప్రీవెంటివ్ మెడిసిన్లో ఒక భారీ పురోగతి.
గట్ హెల్త్: ఆరోగ్యానికి మూల స్థంభం
గుండె, కిడ్నీ, కాలేయం వంటి అవయవాలే ఆరోగ్యాన్ని నిర్దేశిస్తాయని భావించేవారని, కానీ ఇప్పుడు సంపూర్ణ ఆరోగ్యానికి “గట్ హెల్త్” (జీర్ణవ్యవస్థ ఆరోగ్యం) కీలకమని స్పష్టమైందని డాక్టర్ నాగేశ్వర్ రెడ్డి వివరించారు. మన శరీరంలోని మైక్రోబయోమ్.. బ్యాక్టీరియా, వైరస్లు, ఫంగస్ వంటి సూక్ష్మజీవుల సమూహం. శరీర విధులను నియంత్రిస్తూ గట్ హెల్త్ను, తద్వారా పూర్తి శారీరక ఆరోగ్యాన్ని ఇది కాపాడుతుందని తెలిపారు. ఈ సూక్ష్మజీవుల సమతుల్యత దెబ్బతిని, హానికారక బ్యాక్టీరియా పెరిగితే అనేక రోగాలు వచ్చే ప్రమాదం ఉందని చెప్పారు. గట్ హెల్త్ అనేది వైద్యశాస్త్రంలో ఒక సరికొత్త, కీలకమైన అంశంగా మారిందన్నారు. ‘టీఎంఏఓ’ అనే రసాయనం శరీరంలో ఎక్కువైతే గుండెపోటు, గుండె వైఫల్యం వంటి సమస్యలు రావొచ్చని హెచ్చరించారు. ఈ బ్యాక్టీరియాను నియంత్రించడం ద్వారా గుండె జబ్బుల ముప్పు తగ్గించుకోవచ్చన్నారు.
ప్రోబయాటిక్స్ మరియు ప్రీబయాటిక్స్ ప్రాముఖ్యత
శరీరంలో మంచి బ్యాక్టీరియాను పెంచడానికి రెండు మార్గాలున్నాయని డాక్టర్ నాగేశ్వర్ రెడ్డి తెలిపారు. ప్రోబయాటిక్స్ ద్వారా నేరుగా మంచి బ్యాక్టీరియాను అందించవచ్చని, పెరుగు, మజ్జిగ వంటివి ఇందుకు ఉదాహరణలని చెప్పారు. ఇక ప్రీబయాటిక్స్ అంటే మనం తీసుకునే ఆహారం ద్వారా మంచి బ్యాక్టీరియా వృద్ధి చెందుతుందని, ఉల్లిపాయలు, అరటిపండ్లు, కొబ్బరి నీళ్లు వంటివి ప్రీబయాటిక్స్గా పనిచేస్తాయని వివరించారు. రోజూ రెండు గ్లాసుల కొబ్బరి నీళ్లు తాగడం వల్ల శరీరంలో మంచి బ్యాక్టీరియా వృద్ధి చెందుతుందని సూచించారు.
స్టూల్ క్యాప్సూల్స్ – కొత్త చికిత్సా దిశ
త్వరలోనే ఏఐ సాంకేతికతతో పనిచేసే స్మార్ట్ టాయిలెట్లు అందుబాటులోకి వస్తాయని, ఇవి మన మల, మూత్రాలను విశ్లేషించి ఎప్పటికప్పుడు ఆరోగ్యం గురించి సమాచారం అందిస్తాయని డాక్టర్ నాగేశ్వర్ రెడ్డి చెప్పారు. అలాగే, స్టూల్ క్యాప్సూల్స్ ద్వారా అనేక జబ్బులను నయం చేయవచ్చని తెలిపారు. ఆరోగ్యవంతుల మలాన్ని సేకరించి, దాన్ని శుద్ధి చేసి, పొడి రూపంలోకి మార్చి క్యాప్సూల్స్లో అందిస్తారని, దీనివల్ల పేగుల్లో మంచి బ్యాక్టీరియాను ప్రవేశపెట్టవచ్చని వివరించారు.
ఫాస్ట్ ఫుడ్స్ – పిల్లలపై పెరుగుతున్న ప్రమాదం
చిన్నపిల్లలలో ఎక్కువగా వినియోగించే చిప్స్, నూడిల్స్, ప్రాసెస్డ్ ఫుడ్స్ ఆరోగ్యానికి అత్యంత హానికరం. ఈ ఆహార పదార్థాల్లోని ప్రిజర్వేటివ్లు, కలరింగ్ ఏజెంట్ల వల్ల శరీరంలోని బ్యాక్టీరియా దెబ్బతింటోందని, ఇది కేవలం అధిక క్యాలరీల సమస్య కాదని స్పష్టం చేశారు. పాఠశాలల పరిసరాల్లో, క్యాంటీన్లలో ఇలాంటి ఫాస్ట్ ఫుడ్స్ అమ్మకాలను నిషేధించాలని, తద్వారా పిల్లల ఆరోగ్యాన్ని కాపాడవచ్చని ఆయన సూచించారు.
ఇండో-మెడిటరేనియన్ డైట్ – సేంద్రీయ ఆహారానికి ప్రాధాన్యం
ప్రపంచవ్యాప్తంగా ఏ ఆహారం ఆరోగ్యకరమైనదో, ఏది మంచి బ్యాక్టీరియాను పెంచుతుందో అనేదానిపై విస్తృత పరిశోధనలు జరుగుతున్నాయని డాక్టర్ నాగేశ్వర్ రెడ్డి తెలిపారు. గ్రీస్ వంటి దేశాల్లో పాటించే ‘మెడిటరేనియన్ డైట్’ చాలా ఆరోగ్యకరమైనదని, దీనిని భారతీయ ఆహారపు అలవాట్లకు అనుగుణంగా ‘ఇండో-మెడిటరేనియన్ డైట్’గా మార్చే ప్రయత్నాలు జరుగుతున్నాయని చెప్పారు. మంచి ఆరోగ్యం కోసం స్థానికంగా, సేంద్రియ పద్ధతుల్లో పండించిన ఆహారాన్ని తీసుకోవడం ఉత్తమమని ఆయన సలహా ఇచ్చారు. రసాయన ఎరువులు వాడిన పంటలు, ప్రాసెస్డ్ ఫుడ్స్, పాశ్చాత్య ఆహారపు అలవాట్లు ఆరోగ్యానికి హానికరం అన్నారు. సరైన మోతాదులో ప్రొటీన్లు, కార్బోహైడ్రేట్లు, నూనెలు కలిగిన, మన ప్రాంతంలో పండిన సహజ సిద్ధమైన ఆహారం తీసుకోవడం ద్వారా ఆరోగ్యాన్ని కాపాడుకోవచ్చని డాక్టర్ నాగేశ్వర్ రెడ్డి తెలిపారు.
