వేసవి అంటే ఎండలు, చెమటలు, డీహైడ్రేషన్, అలసట, తలనొప్పులు ఇలా ఎన్నో ఆరోగ్య సమస్యలకు తెరలేపే కాలం. ఈ కాలంలో శరీరాన్ని చల్లబరచుకోవాలనే ఆలోచనతో చాలామంది ఫ్రిజ్లో ఉన్న చల్లటి నీటిని ఎక్కువగా తాగుతుంటారు. కానీ ఇది ఆరోగ్యానికి నిజంగా మంచిదా? తాగాల్సిన నీటి ఉష్ణోగ్రత శరీరంపై ఎలాంటి ప్రభావం చూపుతుంది?
వేసవిలో వేడి నీరు తాగాలా… లేక చల్లటి నీరే మంచిదా?
వేసవిలో ఉష్ణోగ్రతలు పెరగడం వల్ల శరీరం ఎక్కువగా చెమటను విడుదల చేస్తుంది. ఇది శరీరం శీతలీకరణ కు సహాయపడుతుంది. కానీ చెమటతో పాటు శరీరంలోని ముఖ్యమైన ద్రవాలు , లవణాలు కూడా బయటికి వెళ్లిపోతాయి. వాటిని భర్తీ చేయకపోతే డీహైడ్రేషన్, అలసట, తలనొప్పులు, మానసిక స్థైర్యం తగ్గిపోవడం వంటి సమస్యలు వస్తాయి. అందుకే వేసవిలో నీటి తాగడం అత్యవసరం.
చల్లటి నీరు తాగితే ఏమవుతుంది?
బయటి వాతావరణం వేడిగా ఉన్నప్పుడు, చాలా మందికి చల్లటి నీరు తాగాలనే ఆకాంక్ష కలుగుతుంది. ఇది తాత్కాలికంగా తలనొప్పి, వేడి వల్ల కలిగే అసౌకర్యాన్ని తగ్గించవచ్చు. కానీ దీని వల్ల కొన్ని రకాల దుష్ప్రభావాలు కూడా ఉన్నాయి.
జీర్ణక్రియపై ప్రభావం: చల్లటి నీరు తాగితే జీర్ణక్రియ మందగిస్తుంది. శరీర ఉష్ణోగ్రతను సమతుల్యంగా ఉంచేందుకు శరీరం ఎక్కువ శ్రమ పడుతుంది.
రక్త నాళాల సంకోచం: చల్లటి నీరు రక్తనాళాలను సంకోచింపజేస్తుంది, ఇది రక్త ప్రసరణను నెమ్మదిపరచుతుంది.
శ్వాసకోశ సమస్యలు: కొన్ని సందర్భాల్లో చల్లటి నీరు తాగడం వల్ల గొంతు వాపు, దగ్గు వంటి సమస్యలు కలుగవచ్చు.
శరీర హైడ్రేషన్ ఆలస్యం: చల్లటి నీరు శరీరంలో బాగా కలవడానికి సమయం పడుతుంది, తద్వారా హైడ్రేషన్ ఆలస్యం అవుతుంది.
వేడి నీరు తాగడం వల్ల ప్రయోజనాలు
గోరువెచ్చని లేదా గది ఉష్ణోగ్రత నీరు తాగడం వల్ల శరీరానికి అనేక లాభాలు ఉన్నాయి. ముఖ్యంగా వేసవిలో ఇది చాలా ప్రయోజనకరం
వేగవంతమైన హైడ్రేషన్: వేడి నీరు శరీరానికి త్వరగా కలిసిపోతుంది, తక్కువ సమయంలోనే శరీరాన్ని హైడ్రేట్ చేయడంలో సహాయపడుతుంది.
జీర్ణక్రియకు సహకారం: వేడి నీరు జీర్ణ వ్యవస్థను ఉత్తేజపరచుతుంది, ఆహారాన్ని సులభంగా జీర్ణం చేయడంలో తోడ్పడుతుంది.
టాక్సిన్ల తొలగింపు: వేడి నీరు మూత్ర విసర్జనను పెంచి, శరీరంలోని మాలిన్యాలను బయటకు పంపిస్తుంది.
బరువు నియంత్రణ: ఉదయం గోరువెచ్చని నీరు తాగడం మెటబాలిజాన్ని వేగవంతం చేసి, బరువు తగ్గే ప్రక్రియకు సహాయపడుతుంది. మధుమేహం, కఫం సమస్యలకు ఉపశమనం: గోరువెచ్చని నీరు రక్తంలో షుగర్ స్థాయిని సమతుల్యం చేస్తుంది. అలాగే, శ్వాస సంబంధిత సమస్యలకు ఉపశమనం ఇస్తుంది.
ఎన్ని లీటర్లు తాగాలి?
ఒక సాధారణ వ్యక్తి రోజుకు 2.5 నుండి 3 లీటర్ల వరకు నీరు తాగాలి. వేసవిలో ఇది 3-4 లీటర్లకు పెంచాలి, ముఖ్యంగా ఎక్కువ చెమట వచ్చే వారు, బయట ఎక్కువ సమయం గడిపేవారు, శారీరక శ్రమ చేసే వారు. వేసవి కాలంలో శరీరాన్ని చల్లగా ఉంచాలన్న ఆశతో చల్లటి నీరు తాగడం తాత్కాలిక ఉపశమనం కలిగించవచ్చు. కానీ దీర్ఘకాలికంగా చూస్తే గోరువెచ్చని నీరు లేదా గది ఉష్ణోగ్రత నీరు తాగడం ఆరోగ్యానికి ఎంతో మేలుకలిగించగలదు. శరీరం సహజంగా తాపాన్ని తగ్గించుకునే విధానాన్ని మద్దతు ఇచ్చేందుకు వేడి నీరు ఉత్తమం.
Read also: Black pepper: నల్ల మిరియాల వల్ల కలిగే ఆరోగ్య ప్రయోజనాలు
