Illegal Belt Shops: మద్యం దుకాణాల్లో అధిక ధరలు, ఆపై అక్రమ బెల్టు షాపులు నిర్వహణ యథేచ్ఛగా సాగుతోంది. అడుగడుగునా బెల్టు షాపులు, సందు సందుల్లో అక్రమ మద్యం దుకాణాలు సాక్షాత్కరిస్తూనే ఉన్నాయి. లైసెన్సెడ్ షాపులు కంటే అధిక ధరలకి మద్యం అమ్మకాలు ఆయా బెల్టు షాపుల్లో సాగుతున్నాయన్న ఆరోపణలు బాహాటంగా వినిపిస్తున్నాయి. యథేచ్ఛగా మద్యం షాపుల్లో అక్రమాలు చోటుచేసుకుంటున్నా సంబంధిత అధికారులు పట్టించుకోకపోవడంపై అనేక అనుమానాలు వ్యక్తమవుతున్నాయి. బాటిల్ పై ఎంఆర్పీ కంటే పది రూపాయలు అదనంగా అమ్మకాలు సాగిస్తున్నా అధికారులు కిమ్మనకపోవడంపై విమర్శలు వెల్లువెత్తుతున్నాయి.
Read Also: Bar License Allocation: నెల్లూరు జిల్లా లో 21 బార్ లకు లైసెన్స్
అధికారుల మౌనంపై విమర్శలు
నేతల అండదండలు, ఆమ్యామ్యాలకు అలవాటు పడి అధికారులు బెల్టు షాపులు నియంత్రించేందుకు ముందుకు వెళ్లడం లేదని ఆరోపణలు వినిపిస్తున్నాయి. అన్ని చోట్లా బెల్టు షాపులు యథేచ్ఛగా నడుస్తూనే ఉన్నాయి. మద్యం షాపుల నుండే మద్యం ఆయా బెల్టు షాపులకి యథేచ్ఛగా రవాణా జరుగుతున్నప్పటికీ సంబంధిత అధికారులు మిన్నకుండిపోతుండటంతో అధికారులు, షాపు యజమానులు ఒక్కటై ఈ అక్రమానికి పాల్పడుతున్నారన్న ఆరోపణలు వ్యక్తమవుతున్నాయి. కాసులకు కక్కుర్తి పడి అధికారులు మౌనం వహిస్తున్నారని ఆక్షేపణలు ప్రజల నుండి బలంగా వినిపిస్తున్నాయి.
షాపు యజమానుల సిండికేట్
అన్ని ప్రాంతాల్లోనూ, ఆయా షాపు యజమానులు తమకు అనుకున్నంత వ్యాపారం జరగడం కోసం బెల్టు షాపులకి మద్యం(Illegal Belt Shops) అమ్మకాలు చేస్తున్నారన్న వాదనలు వినిపిస్తున్నాయి. అలాగే షాపుల నిర్వహణ భారం పెరిగిందని, నష్టాల్లో షాపులు నడుస్తున్నాయని, లాభాల కోసం ఎంఆర్పీ కంటే కొంత పెంచక తప్పదని షాపు యజమానులు పేర్కొంటూ అధిక ధరలకు మద్యం అమ్మకాలు సాగిస్తున్నారని సిబ్బంది పేర్కొంటున్నారు. మద్యం షాపు యజమానులు అంతా సిండికేట్ గా ఏర్పడి అన్ని షాపుల్లోనూ ఒకే మద్యం పాలసీ నడిపిస్తూ మద్యం ప్రియులను పిండేస్తున్నారని విమర్శలు వినిపిస్తున్నాయి.
నిబంధనల ఉల్లంఘన – క్షేత్రస్థాయి పరిస్థితి
అన్ని చోట్లా ఇదే విధానం, అవే అదనపు ధరలు, అనుమతులు లేని బెల్టు షాపుల నిర్వహణ నిత్యకృత్యమైందన్నది జగద్వితం. అక్రమ బెల్టు షాపులు నిర్వహిస్తే సహించేది లేదు, అటువంటి వారిపై చర్యలు తప్పవు, లైసెన్స్ రద్దు చేస్తామనే నేతల ప్రకటనలు వట్టి బూటకమన్నది క్షేత్ర స్థాయిలో పరిస్థితి చూస్తే ఇట్టే ద్యోతకమవుతోంది. ఎంఆర్పీ ధరలకు మద్యం అమ్మకాలు జరపాలన్న నిబంధన తుంగలోకి తొక్కినా అధికారులు కిమ్మనకపోవడంలో ఆంతర్యమేమిటో అని విమర్శలు వెల్లువెత్తుతున్నాయి. ఇప్పటికైనా అధికారులు బెల్టు షాపుల నియంత్రణకు ప్రయత్నిస్తారని, ఎంఆర్పీ ధరలకు మద్యం అమ్మకాలు జరిపిస్తారని కొనుగోలుదారులు ఆశిస్తున్నారు.
Read hindi news: hindi.vaartha.com
Read Also Epaper : epaper.vaartha.com
Read Also: