తిరుమల తిరుపతి దేవస్థానం (TTD) ట్రస్ట్ బోర్డు మంగళవారం ఒక చారిత్రాత్మక నిర్ణయం తీసుకుంది. గతంలో పెదజీయర్ మఠం ఉద్యోగి రవికుమార్ 900 అమెరికన్ డాలర్లు (సుమారు రూ.75 వేలు) దొంగిలించిన కేసును లోక్అదాలత్లో రాజీ చేసుకుని, అందుకు ప్రతిగా నిందితుడు రూ. 14.5 కోట్ల విలువైన ఆస్తుల్ని టీటీడీకి విరాళంగా ఇచ్చిన వ్యవహారంపై ప్రస్తుత బోర్డు తీవ్రంగా దృష్టి సారించింది. రూ.75 వేల దొంగతనం కోసం రూ.14.5 కోట్ల ఆస్తిని ఎందుకు ఇచ్చాడు? అనే కీలక ప్రశ్న ఆధారంగా, ఈ రాజీ వెనుక భారీ కుట్ర దాగి ఉందని బోర్డు గుర్తించింది. అందుకే పాత రాజీ వ్యవహారాన్ని పక్కనపెట్టి, ఈ మొత్తం కుట్రను లోతుగా బయటపెట్టే ఉద్దేశంతో కొత్త క్రిమినల్ ఫిర్యాదు నమోదు చేయాలని ట్రస్ట్ బోర్డు ఏకగ్రీవంగా తీర్మానించింది.
Maoist Hidma Encounter : హిడ్మాది ఫేక్ ఎన్కౌంటర్ – ఎమ్మెల్యే కూనంనేని వ్యాఖ్యలు
ఈ వ్యవహారం ఇప్పటికే ఆంధ్రప్రదేశ్ హైకోర్టు పరిధిలో విచారణలో ఉంది. 2025 అక్టోబర్ 7న హైకోర్టు ఆదేశాల మేరకు ఏపీ సీఐడీ డీజీపీ ఈ కేసుపై పూర్తి విచారణ జరిపి సీల్డ్ కవర్లో నివేదిక సమర్పించాల్సి ఉంది. ఈ రాజీకి కారకుడైన అప్పటి అసిస్టెంట్ విజిలెన్స్ అధికారి సతీష్ ఇటీవల అనుమానాస్పదంగా మృతి చెందడంతో కేసులో అనేక అనుమానాలు మరింత బలపడ్డాయి. పాత కేసును తిరిగి తెరిస్తే దొంగతనం విచారణ పరిధి పరిమితం అవుతుందని, దాని వెనుక ఉన్న కుట్ర మొత్తం బయటపడదని బోర్డు గుర్తించింది. అందుకే లోక్అదాలత్ రాజీని “కుట్రపూరితమైనది”గా పూర్తిగా పక్కన పెట్టేందుకు, గతంలో దాచిపెట్టిన ఇతర దొంగతనాలు, దుర్వినియోగాలన్నీ బయటకు వచ్చేలా కొత్తగా క్రిమినల్ ఫిర్యాదు చేయాలని నిర్ణయించారు.
2023 సెప్టెంబర్ 9న జరిగిన లోక్అదాలత్ రాజీని పక్కన పెట్టేందుకు నిర్ణయించిన బోర్డు, ఈ చర్య వల్ల ‘ఒకే నేరానికి రెండుసార్లు శిక్ష’ అనే ఆరోపణ రాకుండా న్యాయపరమైన జాగ్రత్తలు తీసుకుంటున్నట్లు స్పష్టం చేసింది. స్వామివారి హుండీలో పడిన ప్రతి రూపాయి భక్తుల విశ్వాసానికి ప్రతీక అని, ఆ విశ్వాసాన్ని దెబ్బతీసే ఏ చర్యనూ సహించబోమని టీటీడీ బోర్డు ప్రకటించింది. ఈ నిర్ణయం పూర్తిగా పరిపాలనాపరంగా, భక్తుల భావాలను మరియు సనాతన ధర్మ పవిత్రతను కాపాడే ఉద్దేశంతోనే తీసుకున్నామని బోర్డు సభ్యులు ఏకగ్రీవంగా పేర్కొన్నారు. ఈ కుంభకోణం వెనుక ఉన్న ఉన్నతాధికారుల పాత్రను కూడా కొత్త ఫిర్యాదు ద్వారా బయటపెట్టేందుకు మార్గం సుగమమైంది.
Read hindi news: https://hindi.vaartha.com
Epaper : https://epaper.vaartha.com/
