చార్ధామ్ యాత్రలో అత్యంత ప్రాముఖ్యత కలిగిన కేదార్నాథ్ ధామానికి ప్రయాణం మరింత సులభతరం కానుంది. తపోవన సమానమైన ఈ యాత్రను తేలిక చేయడానికి కేంద్ర ప్రభుత్వం కీలక నిర్ణయం తీసుకుంది. సోనప్రయాగ్ నుంచి కేదార్నాథ్ వరకు రోప్ వే నిర్మాణానికి ప్రధాని నరేంద్ర మోదీ నేతృత్వంలోని కేంద్ర క్యాబినెట్ ఆమోదం తెలిపింది. మొత్తం 12.9 కిలోమీటర్ల పొడవుతో ఈ ప్రాజెక్టును రూ.4,081 కోట్ల వ్యయంతో పూర్తి చేయనున్నారు. యాత్రికులు ఇప్పటి వరకు ఎదుర్కొంటున్న ప్రయాణ సమస్యలు త్వరలోనే తొలగిపోనున్నాయి.
ప్రయాణ సమయాన్ని తగ్గించే రోప్ వే
ప్రస్తుతం సోనప్రయాగ్ నుంచి కేదార్నాథ్ వరకు చేరుకోవడానికి 8-9 గంటల సమయం పడుతుంది. అయితే, రోప్ వే నిర్మాణం పూర్తయిన తర్వాత మొత్తం ప్రయాణాన్ని కేవలం 36 నిమిషాల్లో పూర్తి చేసుకోవచ్చు. ఈ రోప్ వే నిర్మాణంలో అత్యాధునిక 3S (ట్రై కేబుల్ డిటాచబుల్ గొండోలా టెక్నాలజీ)ను ఉపయోగించనున్నారు. ఇది అత్యంత భద్రతతో పాటు, వేగంగా ప్రయాణించేందుకు సహాయపడుతుంది. రోప్ వే ద్వారా సీనియర్ సిటిజన్లు, చిన్న పిల్లలు, వికలాంగులు ఎలాంటి ఇబ్బంది లేకుండా సులభంగా కేదార్నాథ్ ఆలయాన్ని సందర్శించగలరు.
ఆర్థిక వృద్ధికి బూస్ట్
కేదార్నాథ్ రోప్ వే నిర్మాణం వల్ల ప్రయాణికులకు మాత్రమే కాకుండా, స్థానిక ప్రజలకు ఉపాధి అవకాశాలు కూడా పెరగనున్నాయి. టూరిజం అభివృద్ధితో పాటు, స్థానిక వ్యాపారాలు, హోటళ్లు, గైడ్ల వంటి సేవలకు మరింత ప్రోత్సాహం లభించనుంది. ఉత్రఖండ్ రాష్ట్రానికి ఎంతో మైలురాయి కానున్న ఈ ప్రాజెక్టు పూర్తయితే, దేశం నలుమూలల నుంచి భక్తులు అధిక సంఖ్యలో రావడానికి అవకాశం ఉంటుంది. దీనివల్ల ప్రత్యక్షంగా, పరోక్షంగా వేలాది మంది ఉపాధి పొందే అవకాశముంది.
పర్యావరణానికి అనుకూలంగా రోప్ వే
ఇప్పటి వరకు భక్తులు కేదార్నాథ్ చేరుకోవడానికి క్రమంగా కాలినడకన లేదా ఖచ్చర్, గుర్రాల ద్వారా ప్రయాణించేవారు. అయితే, ఈ రోప్ వే ప్రాజెక్టు పూర్తయిన తర్వాత పర్యావరణంపై భారం తగ్గి, ప్రకృతి సమతుల్యతకు సహాయపడుతుంది. వాతావరణ కాలుష్యాన్ని తగ్గించడంలో ఇది ఎంతో ఉపయోగపడుతుంది. ప్రాజెక్టు నిర్మాణంలో పర్యావరణ పరిరక్షణకు ప్రత్యేక ప్రణాళికలు అమలు చేయనున్నారు. ప్రధానంగా భక్తులకు సౌకర్యంగా, సురక్షితంగా ఉండే విధంగా ఈ ప్రాజెక్టును నిర్మించనున్నారు. కేదార్నాథ్ రోప్ వే పూర్తయిన తర్వాత, ఇది ప్రపంచంలోనే అత్యంత పొడవైన రోప్ వేల్లో ఒకటిగా నిలిచే అవకాశం ఉంది.