హిందూ మతంలో నవరాత్రి అత్యంత పవిత్రమైన పండుగలలో ఒకటి. ఏటా జరిగే నాలుగు నవరాత్రులలో శారదీయ నవరాత్రి ప్రత్యేక స్థానం కలిగింది. ఈ పండుగను అత్యంత ఫలవంతమైనదిగా భావిస్తారు. భక్తులు ఈ తొమ్మిది రోజుల్లో దుర్గాదేవి తొమ్మిది రూపాలను ఆరాధిస్తారు.ఈసారి దేవీ నవరాత్రి ఉత్సవాలు (Devi Navratri celebrations) సోమవారం, సెప్టెంబర్ 22న ప్రారంభమయ్యాయి. మొదటి రోజు కొన్ని ప్రాంతాల్లో అమ్మవారిని బాల త్రిపుర సుందరిగా, మరికొన్ని చోట్ల శైలపుత్రిగా పూజిస్తున్నారు. ముఖ్యంగా ఇంద్రకీలాద్రిపై దుర్గమ్మ బాల త్రిపుర సుందరి రూపంలో భక్తులకు దర్శనమిస్తుంది. దేశవ్యాప్తంగా ఈ ఉత్సవాలు ఘనంగా ప్రారంభమయ్యాయి.
ఇంద్రకీలాద్రిపై దసరా ఘనత
అమ్మలగన్న అమ్మ, ముగ్గురమ్మ, మూలపుటమ్మ, కనక దుర్గమ్మ కొలువైన పవిత్ర క్షేత్రం ఇంద్రకీలాద్రిపై దసరా శరణ నవరాత్రులు నేడు ప్రారంభమయ్యాయి. మొదటి రోజున దుర్గమ్మ బాల త్రిపుర సుందరి రూపంలో దర్శనం ఇచ్చి భక్తులను ఆశీర్వదించింది.శారదా నవరాత్రులలో అమ్మవారిని నవదుర్గలుగా ఆరాధించే రెండు సంప్రదాయాలు ఉన్నాయి. మొదటి సంప్రదాయం పురాణోక్తం. ఈ ప్రకారం మొదటి రోజున అమ్మవారిని బాల త్రిపుర సుందరిగా భావించి పూజిస్తారు. త్రిపుర సుందరి అంటే ఈశ్వరుని భార్య గౌరీ దేవి. ఈ దేవి మనలోని మూడు అవస్థలు అయిన జాగృతి, స్వప్న, సుషుప్తి, అలాగే మనస్సు, బుద్ధి, చిత్తం, అహంకారాన్ని నియంత్రిస్తుందని నమ్మకం.
బాల త్రిపుర సుందరి ప్రాముఖ్యత
భక్తులు అభయహస్త ముద్రతో, అక్షమాల ధరించిన బాల త్రిపుర సుందరి రూపాన్ని ఆరాధిస్తారు. ఇలా పూజిస్తే మనోవికారాలు తొలగిపోతాయి. నిత్య సంతోషం కలుగుతుందని విశ్వసిస్తారు. త్రిపుర సుందరి శ్రీచక్రంలోని త్రిపురాత్రయంలో మొదటి దేవతగా నిలుస్తుంది. షోడశ విద్యకు అధిష్ఠన దేవత కూడా బాల త్రిపుర సుందరే. అందుకే ఉపాసకులు ఆమె అనుగ్రహం కోసం ప్రత్యేక బాలార్చన నిర్వహిస్తారు.
పూజల ద్వారా లభించే ఫలాలు
సత్సంతానం అనుగ్రహిస్తుంది.
జీవితంలో స్థిరత్వం, విజయాన్ని ప్రసాదిస్తుంది.
పితృదోషం, చంద్ర గ్రహ సమస్యలు తొలగిపోతాయి.
భక్తులలో విశ్వాసం, ధైర్యం పెరుగుతాయి.
కుటుంబంలో శాంతి, ఆనందం, శ్రేయస్సు నెలకొంటాయి.
చిన్నారుల పూజా ప్రాముఖ్యత
ఈ రోజు ప్రత్యేకంగా రెండు నుంచి పది సంవత్సరాల మధ్య వయస్సు ఉన్న బాలికలను అమ్మవారి స్వరూపంగా పూజిస్తారు. వారికి కొత్త బట్టలు తొడగించి గౌరవిస్తారు. అమ్మవారికి పాయసం నివేదించడం ఈ పూజలో ముఖ్యమైన భాగం.నవరాత్రి పండుగ ఆధ్యాత్మిక శక్తిని పెంపొందించే పవిత్ర కాలం. దుర్గాదేవి తొమ్మిది రూపాలను పూజించడం ద్వారా భక్తులు ఆత్మవిశ్వాసం, శాంతి, శ్రేయస్సు పొందుతారని నమ్మకం. ఈ ఏడాది కూడా దేశ వ్యాప్తంగా భక్తులు నవరాత్రి ఉత్సవాల్లో పాల్గొని అమ్మవారి కటాక్షాన్ని పొందుతున్నారు.
Read Also :