ఐపీఎల్ మాజీ చైర్మన్ లలిత్ మోదీ (Lalit Modi) సోదరుడు, వ్యాపారవేత్త సమీర్ మోదీ పై తీవ్రమైన నేర ఆరోపణలు వచ్చాయి. ఈ కేసులో భాగంగా ఢిల్లీ పోలీసులు ఆయనను అరెస్ట్ చేసినట్లు సమాచారం. శుక్రవారం సాయంత్రం ఢిల్లీలోని ఇందిరాగాంధీ అంతర్జాతీయ విమానాశ్రయంలో సమీర్ మోదీని అదుపులోకి తీసుకున్నట్లు ఓ సీనియర్ పోలీస్ అధికారి వెల్లడించారు.
ఐదు రోజుల క్రితం ఓ మహిళ సమీర్ మోదీ (Sameer Modi) పై పోలీసులకు ఫిర్యాదు చేసింది. గతంలో తాను లైంగిక దాడి, క్రిమినల్ బెదిరింపులకు గురయ్యానని ఆమె ఆరోపించింది. తనపై సమీర్ మోదీ లైంగిక దాడి చేశాడని, తర్వాత తనను బెదిరించాడని పేర్కొంటూ ఆమె ఇచ్చిన ఫిర్యాదు ఆధారంగా ఢిల్లీ పోలీసులు అత్యాచారం, క్రిమినల్ ఇంటిమిడేషన్ సెక్షన్ల కింద కేసు నమోదు చేశారు.
ఆయన తన తల్లి బినా మోదీతో ఆస్తి వివాదం
సమీర్ మోదీ, ప్రముఖ డైరెక్ట్ సెల్లింగ్ సంస్థ ‘మోదీకేర్’ వ్యవస్థాపకుడు, మేనేజింగ్ డైరెక్టర్గా ఉన్నారు. గత కొంతకాలంగా ఆయన తన తల్లి బినా మోదీ (Bina Modi) తో ఆస్తి వివాదం కారణంగా కూడా వార్తల్లో నిలుస్తున్నారు. వారి కుటుంబ పెద్ద కేకే మోదీ 2019లో మరణించిన తర్వాత, సుమారు రూ.11,000 కోట్ల వారసత్వ ఆస్తి పంపకాల విషయంలో తల్లితో ఆయనకు విభేదాలు తలెత్తాయి.
తన తండ్రి రాసిన ట్రస్ట్ డీడ్ ప్రకారం ఆస్తులు పంచడంలో తల్లి విఫలమయ్యారని ఆరోపిస్తూ సమీర్ సుప్రీంకోర్టును కూడా ఆశ్రయించారు. ఈ కుటుంబ కలహాల నేపథ్యంలో తన తల్లి నుంచి తనకు ప్రాణహాని ఉందని, రక్షణ కల్పించాలంటూ గతంలో ఆయన ఢిల్లీ పోలీసులను ఆశ్రయించడం గమనార్హం.
Read hindi news: hindi.vaartha.com
Read Also:
