ఇటీవల కాలంలో బరువు తగ్గడానికి అనేక మంది వివిధ రకాల డైట్లు పాటిస్తున్నారు. వాటిలో క్రాష్ డైట్లు, వాటర్ ఫాస్టింగ్ వంటి పద్ధతులు ఎక్కువ ప్రజాదరణ పొందుతున్నాయి. అయితే, ఈ విధానాలు శరీరానికి తీవ్ర నష్టం కలిగించవచ్చని వైద్యులు హెచ్చరిస్తున్నారు. సరైన వైద్య పర్యవేక్షణ లేకుండా ఇటువంటి ప్రయోగాలు చేయడం ప్రాణాంతకంగా మారే అవకాశం ఉందని సూచిస్తున్నారు.కేరళలోని తలస్సేరీలో ఓ హృదయవిదారక సంఘటన చోటుచేసుకుంది. బరువు తగ్గాలనే తపనతో 18 ఏళ్ల యువతి తీవ్రమైన వాటర్ ఫాస్టింగ్ పాటించింది. దీని ఫలితంగా అనారోగ్యానికి గురై చివరకు ప్రాణాలు కోల్పోయింది.
ఆన్లైన్ ప్రభావం
ఆ యువతి ఆన్లైన్ పోర్టల్స్, సోషల్ మీడియా ట్రెండ్స్ ప్రభావంతో కఠినమైన వాటర్ ఫాస్టింగ్ ప్రారంభించింది. ఆమె దాదాపు ఆరు నెలలుగా ఆహారం పూర్తిగా మానేసి, కేవలం నీటితోనే జీవించింది. ఇది ఆమె ఆరోగ్యాన్ని పూర్తిగా క్షీణింపజేసింది.పెద్దగా ఆహారం తీసుకోకపోవడం వల్ల ఆమె శరీరం బలహీనమైంది. బరువు గణనీయంగా తగ్గిపోయి కేవలం 24 కిలోలకు చేరుకుంది. బ్లడ్ షుగర్ లెవల్స్, సోడియం, రక్తపోటు పూర్తిగా తగ్గిపోయాయి. ఎప్పటికప్పుడు శరీరంలో పోషకాలు తగ్గిపోవడంతో ఆమె శరీరం క్రమంగా స్పందించకుండా మారింది.
ప్రాణాపాయం
ఆ యువతి ఆరోగ్య పరిస్థితి పూర్తిగా విషమించడంతో తలస్సేరీ కో-ఆపరేటివ్ హాస్పిటల్లోని ఐసియూలో చేర్చారు. డాక్టర్లు తీవ్రంగా శ్రమించినప్పటికీ ఆమెను కాపాడలేకపోయారు. వెంటిలేటర్పై ఉంచినప్పటికీ ఆమె ఆరోగ్యం మెరుగుపడలేదు.చివరికి, తీవ్రమైన పోషకాహార లోపం, నీరసం, శరీర పనితీరు పూర్తిగా క్షీణించడంతో ఆమె మరణించింది. ఈ విషాదకరమైన సంఘటనపై స్పందించిన ఆసుపత్రి కన్సల్టెంట్ వైద్యుడు డాక్టర్ నాగేష్ మనోహర్ ప్రభు – “వేగంగా బరువు తగ్గాలని కొందరు ప్రాణాంతకమైన పద్ధతులను అవలంభిస్తున్నారు. ఇది శరీరానికి తీవ్రంగా ప్రభావితం చేస్తుంది. వైద్య పర్యవేక్షణ లేకుండా దీన్ని చేయడం ప్రమాదకరం” అని తెలిపారు.
వైద్య నిపుణుల ప్రకారం, వేగంగా బరువు తగ్గే పద్ధతులు శరీరాన్ని నీరసపరచడంతో పాటు, కీలకమైన అవయవాల పనితీరును దెబ్బతీస్తాయి. ప్రత్యేకంగా, వాటర్ ఫాస్టింగ్ వంటి విధానాలను ఎక్కువ రోజులు పాటిస్తే జీవనానికి ముప్పు ఏర్పడొచ్చు.పోషకాహార లోపం: శరీరానికి అవసరమైన విటమిన్లు, ఖనిజాలు లేకపోవడంతో లోపాలు ఏర్పడతాయి.రోగనిరోధక శక్తి తగ్గిపోతుంది: దీని వల్ల అనేక అనారోగ్య సమస్యలు వస్తాయి.శరీర బరువు హఠాత్తుగా తగ్గడం హానికరం: ఇది కేవలం తాత్కాలిక పరిష్కారం మాత్రమే.
దీర్ఘకాలిక అనారోగ్య సమస్యలు: గుండె జబ్బులు, లివర్, కిడ్నీ సమస్యలు వచ్చే అవకాశం ఉంటుంది.
డైట్ చేయాలంటే సరైన మార్గం పాటించాలి
వైద్యులు సూచించినట్లు, బరువు తగ్గాలంటే సరిగ్గా ఆహార నియమాలు పాటించాలి. మితిమీరిన డైటింగ్, ఉపవాసాలు శరీరానికి హాని చేస్తాయి. శరీరానికి కావాల్సిన పోషకాలను సమతులంగా అందించడంతో పాటు, నియమిత వ్యాయామం, ఆరోగ్యకరమైన జీవనశైలి పాటించాలి.కాబట్టి, బరువు తగ్గడం కంటే ఆరోగ్యాన్ని పరిరక్షించుకోవడం ముఖ్యం. ఇటువంటి ప్రమాదకరమైన డైట్లకు లోనయ్యే ముందు తప్పకుండా వైద్యులను సంప్రదించాలని, ఆరోగ్యంపై అవగాహన పెంచుకోవాలని నిపుణులు హెచ్చరిస్తున్నారు.