సినిమా రంగంలో ఎదుగుదల అనేది మౌనంగా సాగదు. ఎదుగుదల వెనుక ఎన్నో కష్టాలు, ఒడిదుడుకులు, విమర్శలు, విజయాలు, అపజయాలు దాగివుంటాయి. తెలుగు, తమిళ, కన్నడ, హిందీ చిత్ర పరిశ్రమలలో తనదైన గుర్తింపు పొందిన నటి రష్మిక మందన్న ఈ ప్రయాణాన్ని ఎంతో స్ఫూర్తిదాయకంగా కొనసాగిస్తున్నది. తాజాగా ఆమె తన జీవితం, కెరీర్ విషయాలపై ఓ ఇంటర్వ్యూలో ఓపికగా, నిజాయితీగా స్పందించారు. ఆమె తాజా చిత్రం ‘సికందర్’ ఆశించిన ఫలితాన్ని ఇవ్వకపోవడమే కాక, కొన్ని విమర్శలు ఎదురైన నేపథ్యంలో ఆమె చేసిన వ్యాఖ్యలు మరింత ప్రాధాన్యత సంతరించుకున్నాయి. అంతకుముందు ఆమె నటించిన ‘ఛావా’ చిత్రం మంచి విజయాన్ని సాధించిన సంగతి తెలిసిందే.
“ఏదీ శాశ్వతం కాదు” – రష్మిక దృక్పథం
ఇంటర్వ్యూలో రష్మిక మందన్న చేసిన ముఖ్యమైన వ్యాఖ్యలు, జీవితంలో ఏదీ శాశ్వతం కాదనే విషయం నాకు బాగా తెలుసు. గతంలో కూడా చాలాసార్లు ఈ అంశం గురించి మాట్లాడాను. ఒకరోజు మనకు అనుకూలంగా ఉంటే, మరుసటి రోజే పరిస్థితి మారిపోవచ్చు. ఇలాంటి సమయాల్లో నా కుటుంబం, స్నేహితుల నుంచి లభించే మద్దతు నా అదృష్టం. ఎలాంటి ఒడిదుడుకులనైనా ఎదుర్కోవడంలో వారు నాకు అండగా నిలుస్తారు అని తెలిపారు.
నటనలోకి అనుకోకుండా ప్రవేశం
అనుకోకుండానే నటనారంగంలోకి వచ్చానని రష్మిక గుర్తుచేసుకున్నారు. “నిజం చెప్పాలంటే, నటిని అవుతానని నేనెప్పుడూ ఊహించలేదు. ఈ రంగంలోకి రావడానికి ప్రత్యేకంగా ప్రణాళికలేమీ వేసుకోలేదు. ఇప్పుడు వెనక్కి తిరిగి చూసుకుంటే, నేనెంత అదృష్టవంతురాలినో అర్థమవుతోంది” అని ఆమె వివరించారు.
కెరీర్ విషయంలో స్థిరంగా ఉండాలని, మనసుకు నచ్చిన పని చేయాలని తాను అందరికీ సలహా ఇస్తానని రష్మిక చెప్పారు. “కూర్గ్ లాంటి ఒక చిన్న పట్టణంలో పుట్టిన నేను, ఈరోజు ఈ స్థాయిలో ఉన్నానంటే అందుకు కారణం అదే. వచ్చిన ప్రతి అవకాశాన్నీ సద్వినియోగం చేసుకుంటూ ముందుకు సాగాలి. ఈ ప్రయాణంలో ఎదురయ్యేవి కఠినమైన పాఠాలు కావు, అన్నీ విలువైన అనుభవాలే. ఎల్లప్పుడూ ఉత్తమంగా ఉండేందుకు ప్రయత్నించండి. కానీ, ఇతరులను సంతోషపెట్టాలనే భారాన్ని మాత్రం మోయకండి. మీ ఆనందంపై దృష్టి సారించండి” అంటూ రష్మిక యువతకు స్ఫూర్తిదాయకమైన సలహాలు ఇచ్చారు.
Read also: SJ Surya: నానికి ఎస్ జె సూర్య క్షమాపణలు