పూజా ఖేడ్కర్కు సుప్రీంకోర్టు ఊరట – తప్పుడు ధృవపత్రాలతో ఐఏఎస్ ఎంపికపై హాట్ టాపిక్
సివిల్ సర్వీసెస్ పరీక్షల్లో తప్పుడు ధృవపత్రాలు సమర్పించి ప్రయోజనం పొందిన ఆరోపణలతో సంచలనంగా మారిన పూజా ఖేడ్కర్ కేసు మరో మలుపు తిరిగింది. ఐఏఎస్ ప్రొబేషనరీ అధికారిణిగా నియమితులైన పూజా ఖేడ్కర్కి సుప్రీంకోర్టు నుంచి ఊరట లభించింది. ఆమె దాఖలు చేసిన ముందస్తు బెయిల్ పిటిషన్ను బుధవారం సర్వోన్నత న్యాయస్థానం మంజూరు చేసింది. ఢిల్లీ పోలీసులు, యూపీఎస్సీ (UPSC) (యూనియన్ పబ్లిక్ సర్వీస్ కమిషన్) తీవ్రంగా వ్యతిరేకించినప్పటికీ, ధర్మాసనం కీలక వ్యాఖ్యలతో బెయిల్ మంజూరు చేసింది. ఈ కేసు దేశవ్యాప్తంగా ఆసక్తి రేకెత్తించిన ప్రాధాన్యమైన చర్చాంశంగా మారింది.
సుప్రీంకోర్టు కీలక వ్యాఖ్యలు – “ఆమె హంతకురాలా? ఉగ్రవాదినా?”
ఈ పిటిషన్పై జస్టిస్ బి.వి. నాగరత్న, జస్టిస్ సతీష్ చంద్ర శర్మలతో కూడిన ధర్మాసనం విచారణ జరిపింది. విచారణ సందర్భంగా ధర్మాసనం చేసిన వ్యాఖ్యలు చర్చనీయాంశంగా మారాయి. ‘‘ఆమె చేసిన ఘోరమైన నేరం ఏమిటి? హత్య చేయలేదే కదా. డ్రగ్ లార్డ్ కాదు, ఉగ్రవాది కాదు. మీ దగ్గర (UPSC) సరైన ధృవీకరణ వ్యవస్థ లేదా సాఫ్ట్వేర్ ఉండాలి. దర్యాప్తు కొనసాగించండి, కానీ ఆమె ఇప్పటికే సర్వం కోల్పోయింది. ఇక ఆమెకు ఉద్యోగ అవకాశం కూడా ఉండదు’’ అని వ్యాఖ్యానించింది. ఈ వ్యాఖ్యలతో ఆమెకు తాత్కాలిక న్యాయసహాయం లభించగా, ఇది వాస్తవాలకు వెలుగు చూపిస్తుందా అన్నది వేచి చూడాల్సిన అంశం.
యూపీఎస్సీ, ఢిల్లీ పోలీసులు గట్టి వ్యతిరేకత
పూజా ఖేడ్కర్ కమిషన్ను, ప్రజలను మోసం చేశారని ఆరోపిస్తూ ఢిల్లీ పోలీసులు, యూపీఎస్సీ ఆమె ముందస్తు బెయిల్ను తీవ్రంగా వ్యతిరేకించాయి. అంతకుముందు, ఢిల్లీ హైకోర్టు కూడా ఆమె ముందస్తు బెయిల్ పిటిషన్ను కొట్టివేసింది, మధ్యంతర రక్షణను తొలగించింది. యూపీఎస్సీ ఇప్పటికే ఆమె అభ్యర్థిత్వాన్ని రద్దు చేయడమే కాకుండా, భవిష్యత్తులో ఎలాంటి పరీక్షలు రాయకుండా నిషేధించింది. ఐఏఎస్ (ప్రొబేషన్) రూల్స్, 1954లోని రూల్ 12 ప్రకారం కేంద్ర ప్రభుత్వం కూడా ఆమెను ఇండియన్ అడ్మినిస్ట్రేటివ్ సర్వీస్ నుంచి అధికారికంగా తొలగించింది.
తప్పుడు ధృవపత్రాలతో అభ్యర్థిత్వం – వేరే పేర్ల వినియోగం కలకలం
పూజా ఖేడ్కర్ పలు తప్పుడు ధ్రువపత్రాలను యూపీఎస్సీ (UPSC)కి సమర్పించి అత్యంత పోటీ ఉండే సివిల్ సర్వీసెస్ పరీక్షల్లో ఉత్తీర్ణత సాధించారని ఆరోపణలు ఉన్నాయి. ఓబీసీ నాన్-క్రిమీలేయర్ (OBC Non-Creamy Layer)వర్గానికి చెందినట్లు, అలాగే మానసిక అనారోగ్యం, తక్కువ దృష్టి, లోకోమోటర్ సమస్యలతో సహా వివిధ వైకల్యాలు ఉన్నట్లు పలు సర్టిఫికెట్లను ఉపయోగించినట్లు సమాచారం. అంతేకాకుండా, దరఖాస్తు ప్రక్రియలో ఖేడ్కర్ పూజా దీలీప్రావ్, పూజా మనోరమ దిలీప్ ఖేడ్కర్ వంటి వేర్వేరు పేర్లను ఉపయోగించడం, ఆమె ఎన్నిసార్లు పరీక్ష రాశారనే దానిపై సందేహాలకు తావిచ్చింది. గరిష్ట పరీక్ష ప్రయత్నాల నిబంధనను దాటవేయడానికే ఆమె పేరు మార్పును ఉపయోగించారనేది మరో ప్రధాన ఆరోపణ.
వివాదాస్పద సేవా నేపథ్యం – పూణే నుంచి వాషిమ్ బదిలీ
ఈ వ్యవహారం ముందుగానే వెలుగులోకి వచ్చిందంటే, అది పూజా ఖేడ్కర్ పూణేలో ఐఏఎస్ ప్రొబేషనరీగా ఉన్నప్పుడు అధికార దుర్వినియోగ ఆరోపణల నేపథ్యంలో మహారాష్ట్ర ప్రభుత్వం ఆమెను వాషింకు బదిలీ చేయడమే. ఆమె ఓబీసీ నాన్-క్రిమీలేయర్ కేటగిరీకి చెందినదన్న వాదనపై రాష్ట్ర ఓబీసీ సంక్షేమశాఖ మంత్రి ప్రత్యేక దర్యాప్తును ఆదేశించారు. ఐఏఎస్కి ముందు ఆమె ఐఆర్ఎస్గా కూడా పని చేయడం, రెండూ వేర్వేరు ధృవపత్రాల ఆధారంగా జరిగాయని ఆరోపణలు కేసును మరింత క్లిష్టంగా మార్చాయి.
Read also: Bengaluru Metro: మహిళల ఫోటో తీసి సోషల్ మీడియాలో పోస్ట్..ఆపై కేసు నమోదు