తెలుగు తెరపై రెండు దశాబ్దాలుగా తనకంటూ ప్రత్యేక స్థానాన్ని సంపాదించుకున్న నటి అనుష్క శెట్టి (Anushka Shetty), ఇప్పుడు కొత్త తరహా పాత్రలో ప్రేక్షకులను పలకరించబోతున్నారు. ‘అరుంధతి’, ‘రుద్రమదేవి’, ‘భాగమతి’ వంటి లేడీ ఓరియెంటెడ్ సినిమాలతో ప్రత్యేక గుర్తింపు తెచ్చుకున్న ఆమె, ఈసారి ‘ఘాటి’ (‘Ghati’) అనే చిత్రంతో తన కంఫర్ట్ జోన్ దాటి, పూర్తి స్థాయి యాక్షన్ రోల్లో కనిపించనున్నారు.ఈ చిత్రాన్ని తన కెరీర్లో ఒక ప్రత్యేక మైలురాయిగా అభివర్ణించిన అనుష్క, “ఇది నేను ఇంతవరకు చేయని పాత్ర. ఇందులోని శీలావతి పాత్ర చాలా శక్తివంతమైనది. ప్రేక్షకులు నన్ను కొత్త కోణంలో చూస్తారు” అని తెలిపారు. దర్శకుడు క్రిష్, రచయిత చింతకింది శ్రీనివాసరావు చెప్పిన కథ విన్న వెంటనే చేయాలని నిర్ణయించుకున్నానని చెప్పారు. “నేను సాఫ్ట్ పాత్ర కోరుకున్నా, క్రిష్ గారు యాక్షన్ రోల్ ఇచ్చారు. ఇది నాకు లభించిన ఉత్తమ స్క్రిప్టుల్లో ఒకటి” అని నవ్వుతూ గుర్తుచేసుకున్నారు.
వాస్తవిక కథాంశం
‘ఘాటి’ సినిమా ఫాంటసీ కాదని, వాస్తవిక నేపథ్యం కలిగిన కథ అని అనుష్క వివరించారు. ఆంధ్ర–ఒడిశా సరిహద్దులోని తూర్పు కనుమలలో గంజాయి సాగు, అక్కడి ప్రజల జీవన విధానం చుట్టూ కథ తిరుగుతుందని చెప్పారు. “శీలావతి, దేశీ రాజు (విక్రమ్ ప్రభు) మధ్య అందమైన ప్రేమకథతో పాటు, ఎన్నో సామాజిక అంశాలు ఇందులో ఉంటాయి. యాక్షన్ సన్నివేశాలు కేవలం ఫైట్లు కాదు, భావోద్వేగాలతో ముడిపడి ఉంటాయి” అని వివరించారు.తూర్పు కనుమల వాస్తవ లొకేషన్లలో షూటింగ్ చేసిన అనుభవం మరచిపోలేనిదని అనుష్క తెలిపారు. “అక్కడికి వెళ్లగానే కొత్త ప్రపంచంలో అడుగుపెట్టినట్టుగా అనిపించింది. ఆ ప్రాంత సంస్కృతి, ప్రకృతి అందాలను ప్రేక్షకులు పెద్ద తెరపై చూడబోతున్నారు. అక్కడ ఫోన్ సిగ్నల్ కూడా ఉండేది కాదు. స్థానికులతో గడిపిన క్షణాలు జీవితాంతం గుర్తుండిపోతాయి. 102 ఏళ్ల వృద్ధురాలిని కలిసినప్పుడు ఆమెలోని ఉత్సాహం, సజ్జనత్వం నాకు కొత్త శక్తి ఇచ్చాయి” అని అనుభవాలను పంచుకున్నారు.
బలమైన నటీనటులు
ఈ చిత్రంలో విక్రమ్ ప్రభు, జగపతిబాబు, చైతన్య రావు కీలక పాత్రల్లో కనిపించనున్నారు. కథలో ప్రతి పాత్రకూ ప్రత్యేకత ఉందని యూనిట్ చెబుతోంది.క్రిష్ జాగర్లమూడి దర్శకత్వంలో, ఫస్ట్ ఫ్రేమ్ ఎంటర్టైన్మెంట్స్ మరియు యూవీ క్రియేషన్స్ సంయుక్తంగా నిర్మిస్తున్న ఈ చిత్రం సెప్టెంబర్ 5న విడుదల కానుంది. తెలుగు మాత్రమే కాకుండా తమిళం, హిందీ, కన్నడ, మలయాళ భాషల్లో పాన్-ఇండియా స్థాయిలో ప్రేక్షకుల ముందుకు రానుంది.‘ఘాటి’తో అనుష్క తన కెరీర్లో మరో పెద్ద విజయాన్ని నమోదు చేసుకోవడం ఖాయమని సినీ విశ్లేషకులు భావిస్తున్నారు. కొత్త కాన్సెప్ట్, వాస్తవికత, బలమైన కథనం ఈ చిత్రానికి ప్రత్యేక ఆకర్షణగా నిలుస్తాయని అంచనాలు ఉన్నాయి.
Read Also :