సంధ్య థియేటర్ వద్ద తొక్కిసలాటలో ఒకరి ప్రాణం కోల్పోవడం, మరొకరు గాయపడటం సినీ పరిశ్రమను దిగ్భ్రాంతికి గురిచేసింది. పుష్ప 2 ప్రీమియర్ సందర్భంగా చోటుచేసుకున్న ఈ దుర్ఘటనపై అల్లు అర్జున్ను కేసులో నిందితుడిగా పోలీసులు అరెస్ట్ చేయడం వివాదాస్పదంగా మారింది. ఈ చర్యపై అభిమానులు,రాజకీయ నాయకులు, సినీ ప్రముఖులు తీవ్ర విమర్శలు వ్యక్తం చేస్తున్నారు. సంధ్య థియేటర్ వద్ద పుష్ప 2 ప్రీమియర్ చూసేందుకు పెద్ద సంఖ్యలో అభిమానులు చేరుకున్నారు. అయితే, భద్రతా చర్యలలో లోపం కారణంగా తొక్కిసలాట చోటు చేసుకుంది. ఈ ఘటనలో రేవతి అనే మహిళ మరణించగా, ఆమె కుమారుడు శ్రీతేజ్ తీవ్ర గాయాలపాలయ్యాడు.ఈ నేపథ్యంలో పోలీసులు అల్లు అర్జున్పై కేసు నమోదు చేసి అరెస్ట్ చేశారు. అల్లు అర్జున్ అరెస్ట్పై సీనియర్ నటుడు సుమన్ ఘాటుగా స్పందించారు. “అల్లు అర్జున్ను అరెస్ట్ చేయడం పూర్తిగా తప్పు.హీరోలను థియేటర్కు పిలవడం తప్పేమీ కాదు.
భద్రతా బాధ్యతను నిర్వహించాల్సింది థియేటర్ యాజమాన్యం.ఒక తల్లిని కోల్పోయిన ఆ కుటుంబం బాధను మరెవరూ భరించలేరు, కానీ దీనికి బన్నీని బాధ్యుడిగా చేయడం సరైనది కాదు.భవిష్యత్తులో ఈ ఘటనలు పునరావృతం కాకుండా భద్రతా చర్యలు తీసుకోవాలి. కానీ, ఒకరి పట్ల ఒక నిబంధన,మరొకరి పట్ల మరొక నిబంధన ఉండకూడదు,”అంటూ ఆయన ఆగ్రహం వ్యక్తం చేశారు. ఈ ఘటనపై అల్లు అర్జున్ సోషల్ మీడియాలో తన స్పందనను తెలియజేశారు. శ్రీతేజ్ గురించి ఆందోళన వ్యక్తం చేస్తూ, ఆయన ట్వీట్లో,“ఈ దురదృష్టకరమైన ఘటన నా మనసును బాధిస్తుంది. శ్రీతేజ్ త్వరగా కోలుకోవాలని ప్రార్థిస్తున్నాను. లీగల్ కారణాల వల్ల ఆయనను కలవలేకపోయాను, కానీ అన్ని వైద్య, కుటుంబ అవసరాలను తీర్చేందుకు నాకు వీలైన సహాయం అందిస్తున్నాను. త్వరలోనే శ్రీతేజ్ కుటుంబాన్ని కలిసి మరింత మద్దతు అందిస్తాను” అని పేర్కొన్నారు.ఈ ఘటనపై సామాజిక మాధ్యమాల్లో అభిమానులు బన్నీకి మద్దతు తెలుపుతున్నారు. అల్లు అర్జున్ అరెస్ట్ను ఖండిస్తూ హ్యాష్ట్యాగ్లు ట్రెండ్ అవుతున్నాయి.