కన్నడ సోయగం పూజా హెగ్డే, ఒకప్పుడు టాలీవుడ్ అగ్ర కథానాయికగా వెలుగొందుతూ భారీ స్టార్ హీరోల సరసన నటించి, తెలుగు సినీప్రేక్షకుల మనసు దోచిన ఆమె, ప్రస్తుతం అవకాశాల కోసం ఎదురుచూస్తూ కాస్త వెనుకబడి పోయింది. పలు తమిళ చిత్రాల నుంచి ఆఫర్లు వస్తున్నప్పటికీ, టాలీవుడ్లో మాత్రం ఆమెకు పెద్దగా అవకాశాలు రాలేదు. తాజాగా పూజా హెగ్డే గురించి ఒక ఆసక్తికరమైన వార్త సోషల్ మీడియాలో వైరల్ అవుతోంది—హిందీ సీరియల్ నటుడు, బిగ్ బాస్ ఫేమ్ రోహన్ మెహ్రాతో ఆమె ప్రేమలో ఉందని వినిపిస్తోంది. పూజా తరచుగా తన ప్రియుడితో బయట తిరుగుతుండగా, పలు సందర్భాల్లో ఈ జంట మీడియా కంటికి కూడా చిక్కింది.
ఇక పూజా కెరీర్ విషయానికి వస్తే, ఆమె టాలీవుడ్లో జూనియర్ ఎన్టీఆర్, మహేశ్ బాబు, ప్రభాస్, అల్లు అర్జున్ వంటి స్టార్ హీరోలతో సినిమాలు చేస్తూ మంచి క్రేజ్ సంపాదించుకుంది. అయితే, వరుస ఫ్లాప్లతో ఆమె గ్రాఫ్ ఒక్కసారిగా కిందకు పడిపోయింది. “గుంటూరు కారం” సినిమాలో మొదట ఆమెను తీసుకున్నప్పటికీ, ఆ తర్వాత ఆమెను ప్రాజెక్ట్ నుంచి తప్పించారు. ఈ ఘటన తర్వాత పూజా టాలీవుడ్లోకి పెద్దగా కొత్త అవకాశాలు రాలేదు.
ఇటీవలి కాలంలో, అవకాశాలు తగ్గిన నేపథ్యంలో పూజా తన రెమ్యునరేషన్ను భారీగా తగ్గించిందని సమాచారం. కోలీవుడ్ స్టార్ హీరో విజయ్ సినిమా కోసం ఆమె తక్కువ పారితోషికం తీసుకొని ఒప్పందం కుదుర్చుకుందట. అలాగే, సూర్యతో కూడా ఆమె నటించే అవకాశం వచ్చింది. ఈ రెండు సినిమాలు తన కెరీర్ను తిరిగి పుంజుకునే దిశగా నడిపిస్తాయని, పూర్వ వైభవం తెచ్చిపెడతాయని పూజా ఎంతో ఆశగా ఎదురుచూస్తోంది.