యంగ్ టైగర్ ఎన్టీఆర్ నటించిన అదుర్స్ సినిమాలోని చారీ పాత్రలో ఆయన చెప్పిన తెలీదు, గుర్తు లేదు, మర్చిపోయా అనే డైలాగ్ ఇప్పటికీ ప్రేక్షకులకు గుర్తుండే ఉంటుంది. ఇదే డైలాగ్ను శీర్షికగా తీసుకుని, నివాస్, అమిత శ్రీ జంటగా ఓ వినోదాత్మక సినిమా రూపొందుతున్నది. ఈ చిత్రంలో 30 ఇయర్స్ పృథ్వీ, వినోద్ కుమార్, రఘుబాబు, భరద్వాజ్, ఖయ్యూం వంటి ప్రఖ్యాత నటులు కీలక పాత్రల్లో నటిస్తున్నారు.ఈ సినిమాను చెన్నా క్రియేషన్స్ బ్యానర్పై శరత్ చెన్నా నిర్మిస్తుండగా, దర్శకుడు వెంకటేశ్ వీరవరపు ఫుల్-లెంగ్త్ కామెడీ ఎంటర్టైనర్గా తెరకెక్కిస్తున్నారు. హైదరాబాద్ రామానాయుడు స్టూడియోలో ఈ రోజు పూజా కార్యక్రమాలతో ఈ చిత్రం లాంఛనంగా ప్రారంభమైంది.
ముహూర్తపు సన్నివేశానికి నటుడు రఘుబాబు క్లాప్ ఇవ్వగా, సంగీత దర్శకుడు ఆర్.పి.పట్నాయక్ కెమెరా స్విచ్ చేశారు.నటుడు పృథ్వీ మాట్లాడుతూ, మంచి కథ, కథనాలతో ఈ సినిమా ప్రేక్షకులను అలరిస్తుంది. నా పాత్ర చాలా ఆసక్తికరంగా ఉంటుంది. నిర్మాత శరత్ చెన్నా గారు ప్యాషన్తో ఈ చిత్రాన్ని నిర్మిస్తున్నారు. దర్శకుడు వెంకటేశ్ ఈ చిత్రాన్ని నవ్వులు పూయించేలా రూపొందిస్తున్నారు అని అన్నారు. దర్శకుడు వెంకటేశ్ వీరవరపు మాట్లాడుతూ, ఈ చిత్రం వినోదాత్మకంగా, ఆసక్తికరమైన ట్విస్టులతో సాగుతుంది. ఈ నెల 18వ తేదీ నుంచి రెగ్యులర్ షూటింగ్ ప్రారంభమవుతుంది.
మా చిత్రానికి సహకరిస్తున్న ప్రతి ఒక్కరికీ ధన్యవాదాలు అని తెలిపారు.హీరోయిన్ అమిత శ్రీ మాట్లాడుతూ, ఈ సినిమాతో హీరోయిన్గా పరిచయం అవ్వడం ఆనందంగా ఉంది. మంచి అవకాశాన్ని అందించినందుకు దర్శకుడు, నిర్మాతలకు ధన్యవాదాలు అని పేర్కొన్నారు. హీరో నివాస్ తన ఆనందాన్ని వ్యక్తం చేస్తూ, ఈ సినిమాతో హీరోగా పరిచయం అవ్వడం నాకు గర్వంగా ఉంది. మా చిత్రాన్ని ఆదరిస్తారని ఆశిస్తున్నాను అని అన్నారు.నిర్మాత శరత్ చెన్నా మాట్లాడుతూ, సినిమా పేరులో ‘గుర్తు లేదు’ ఉన్నప్పటికీ, ఈ చిత్రం ప్రేక్షకులకు చిరస్థాయిగా గుర్తుండేలా ఉంటుంది. యంగ్ అండ్ ఎనర్జిటిక్ టీమ్తో ఈ సినిమా ఒక పెద్ద విజయాన్ని సాధిస్తుందని నమ్మకంగా ఉన్నాను అని తెలిపారు.