సలార్, కల్కి వంటి భారీ విజయాలతో దూసుకుపోతున్న పాన్ ఇండియా స్టార్ ప్రభాస్ ప్రస్తుతం మరో అంచనాల సినిమాతో రాబోతున్నాడు. అది కూడా రొమాంటిక్ హారర్ కామెడీ జానర్లో తెరకెక్కుతున్న‘ది రాజా సాబ్’. ఈ చిత్రాన్ని క్రియేటివ్ డైరెక్టర్ మారుతి తెరకెక్కిస్తుండగా, గ్లామరస్ హీరోయిన్స్ మాళవిక మోహనన్, నిధి అగర్వాల్ ప్రభాస్తో స్క్రీన్ షేర్ చేసుకుంటున్నారు. భారీ బడ్జెట్తో పీపుల్ మీడియా ఫ్యాక్టరీ ఈ సినిమాను అత్యంత ప్రతిష్టాత్మకంగా నిర్మిస్తోంది.ఇటీవలి కాలంలో ప్రభాస్ ఏడాదికి ఒక్క సినిమా మాత్రమే చేస్తూ తన అభిమానులను నిరీక్షణలో ఉంచుతున్నాడు.కానీ 2023లో ఆయన ‘ఆదిపురుష్’,‘సలార్’ వంటి రెండు సినిమాలతో ప్రేక్షకులను ఆకట్టుకున్నాడు.
2024లో ‘కల్కి 2898 A.D.’ సినిమా మాత్రమే విడుదల కాగా,2025లో రెండు సినిమాలు వస్తాయని ఫ్యాన్స్లో భారీ అంచనాలు ఉన్నాయి.అందులో ముందుగా విడుదల కానున్న చిత్రం ‘ది రాజా సాబ్’.ఈ చిత్రాన్ని ఏప్రిల్ 10 న విడుదల చేస్తామని అధికారికంగా ప్రకటించారు.కానీ తాజా సమాచారం ప్రకారం,సినిమాకు సంబంధించిన పోస్ట్ ప్రొడక్షన్ పనులు ఎక్కువగా ఉండటంతో విడుదల వాయిదా పడే అవకాశాలు కనిపిస్తున్నాయి.
సినిమా గ్రాఫిక్స్, VFX పనులు అధికంగా ఉండటంతో మేకర్స్ త్వరపడకుండా సమయాన్ని కేటాయించాలనే నిర్ణయానికి వచ్చారని సమాచారం.ఈ కారణంగా ముందుగా ప్రకటించిన తేదీ కంటే కనీసం మూడు నెలలు ఆలస్యంగా విడుదలయ్యే అవకాశం ఉందని టాక్ వినిపిస్తోంది. ఇది ఫ్యాన్స్ను కొంత నిరాశపరిచినప్పటికీ, ప్రభాస్ను మళ్లీ ఓ నూతన పాత్రలో చూడాలనే ఆసక్తి తగ్గడం లేదు.ఈ సినిమాలో ప్రభాస్ రెండు విభిన్న పాత్రల్లో కనిపించనున్నాడట. థమన్ సంగీతం అందిస్తున్న ఈ సినిమా పాటలు ఇప్పటికే సిద్ధమయ్యాయని సమాచారం. అంతేకాకుండా, చిత్రబృందం జపాన్ లో గ్రాండ్గా ఆడియో ఫంక్షన్ నిర్వహించేందుకు ప్లాన్ చేస్తోంది.