నవంబర్ 20 నుండి 28 వరకు గోవాలో జరగబోయే 55వ అంతర్జాతీయ ఫిల్మ్ ఫెస్టివల్ ఆఫ్ ఇండియా (ఇఫీ) ఉత్సవాల్లో పలు ఆసక్తికర చిత్రాలు ప్రదర్శితమవుతాయి. ఈ వేడుకలో రెండు తెలుగు చిత్రాలు ప్రదర్శనకు ఎంపికయ్యాయి: ఒకటి భారీ పాన్-ఇండియా చిత్రం, మరొకటి చిన్న చిత్రం.
ప్రముఖ తెలుగు దర్శకుడు నాగ్ అశ్విన్ దర్శకత్వంలో, సి. అశ్వనీదత్ నిర్మించిన పాన్-ఇండియా చిత్రం ‘కల్కి’ మరియు నివేదా థామస్, విశ్వదేవ్, ప్రియదర్శిల కాంబినేషన్లో నందకిశోర్ ఈమాని దర్శకత్వంలో రానా నిర్మించిన ’35: చిన్న కథ కాదు’ ఈ చిత్రోత్సవాల్లో ప్రదర్శనకు ఎంపికయ్యాయి.
ఇఫీ చిత్రోత్సవం కోసం దేశ వ్యాప్తంగా పోటీలో నిలిచిన 384 ఫీచర్ ఫిల్మ్స్లో 25 చిత్రాలు ఎంపికయ్యాయి. వీటిలో 5 చిత్రాలు మెయిన్ స్ట్రీమ్ విభాగంలో, 20 చిత్రాలు ఇండియన్ పనోరమా విభాగంలో ప్రదర్శితం కానున్నాయి. ఈ విభాగాల్లో ‘కల్కి’ మెయిన్ స్ట్రీమ్లో, ’35: చిన్న కథ కాదు’ ఇండియన్ పనోరమా విభాగంలో ప్రదర్శనకు ఎంపికయ్యాయి. అలాగే, మలయాళ చిత్రం ‘మంజుమ్మెల్ బాయ్స్’ కూడా మెయిన్ స్ట్రీమ్ విభాగంలో ప్రదర్శనకు ఎంపికైంది.
‘కల్కి’ ఒక సైన్స్ ఫిక్షన్ థ్రిల్లర్గా రూపొందింది, ఇది కురుక్షేత్ర యుద్ధం నుంచి 6 వేల సంవత్సరాల తర్వాతి కథతో నిర్మించబడింది. దాదాపు రూ. 600 కోట్ల బడ్జెట్తో ఈ చిత్రం రూపొందింది. హాలీవుడ్ స్థాయి విజువల్స్తో ప్రేక్షకులను ఆకట్టుకుని, భారీ వసూళ్లు రాబట్టి ఘనవిజయం సాధించింది.
ఈ చిత్రం ఒక తల్లి తన కుమారుడు పాస్ మార్కులు సాధించాలనే తపన ఆధారంగా రూపొందిన కథ. ఎమోషనల్ టచ్తో రూపొందిన ఈ చిత్రం ప్రేక్షకుల హృదయాలను హత్తుకుని మంచి స్పందన తెచ్చుకుంది. ఈ ఫిల్మ్ ఫెస్టివల్ను హిందీ చిత్రం ‘స్వాతంత్య్ర వీర్ సావర్కర్’ తో ప్రారంభించనున్నారు. ఈ బయోపిక్ దేశ స్వాతంత్య్ర పోరాట యోధుడు వినాయక్ దామోదర్ సావర్కర్ జీవితం ఆధారంగా రూపొందించబడింది. రణ్దీప్ హుడా టైటిల్ పాత్రలో నటించారు. ఈ చిత్రం ప్రారంభంలో మహేశ్ మంజ్రేకర్ దర్శకత్వం వహించారు, కానీ క్రియేటివ్ విభేదాల కారణంగా మధ్యలో ప్రాజెక్ట్ నుండి తప్పుకున్నారు. ఆ తర్వాత, రణ్దీప్ హుడా స్వయంగా దర్శకత్వ బాధ్యతలు తీసుకుని, ప్రధాన పాత్రలో కూడా నటించారు. ఈ ఫిల్మ్ ఉత్సవం కోసం 12 మంది సభ్యులతో కూడిన ఫీచర్ ఫిల్మ్స్ జ్యూరీ, 6 మంది సభ్యులతో కూడిన నాన్ ఫీచర్ ఫిల్మ్స్ జ్యూరీ ఎంపికైంది. దేశంలోని వివిధ భాషలకు చెందిన సినీ ప్రముఖులు ఈ జ్యూరీలో ఉన్నప్పటికీ, దక్షిణాది ప్రముఖులు జ్యూరీలో చోటు సంపాదించకపోవడం గమనార్హం.
నాన్ ఫీచర్ ఫిల్మ్ విభాగంలో ప్రదర్శనకు ఎంపికైన బెంగాలీ చిత్రం ‘మొనిహార’ కూడా ప్రత్యేక ఆకర్షణగా నిలవనుంది. విశ్వకవి రవీంద్రనాథ్ ఠాగూర్ రచించిన కథ ఆధారంగా ఈ చిత్రం రూపొందింది. దీనికి కోల్కతా సత్యజిత్ రే ఫిల్మ్ ఇన్స్టిట్యూట్లో శిక్షణ పొందిన సుభాదీప్ బిస్వాస్ దర్శకత్వం వహించారు, అలాగే తెలంగాణకు చెందిన అన్వేష్ ఛాయాగ్రాహకుడిగా పనిచేశారు. ఈ 55వ ఇఫీ ఉత్సవాలు గోవా రాష్ట్ర ప్రభుత్వ సహకారంతో నవంబర్ 20న ప్రారంభమై 28న ముగుస్తాయి.