నేటి ఆధునిక ప్రపంచంలో, మహిళలు తమ అందాన్ని మెరుగుపర్చుకోవడానికి అనేక రకాల ఉత్పత్తులను ఉపయోగిస్తున్నారు. అందులో నెయిల్ పాలిష్ ఒక ప్రధాన భాగం. వివిధ రంగులు, ఆకర్షణీయమైన డిజైన్లు అందుబాటులో ఉండటంతో, ప్రతి మహిళా గోళ్లను అందంగా అలంకరించుకోవడానికి నెయిల్ పాలిష్ను విస్తృతంగా ఉపయోగిస్తున్నారు. అయితే, దీని వినియోగం వల్ల కొన్ని ఆరోగ్య సమస్యలు తలెత్తే ప్రమాదం ఉందని చాలా మందికి తెలియదు.
హానికర రసాయనాలు
నెయిల్ పాలిష్ తయారీలో వివిధ రకాల రసాయనాలను ఉపయోగిస్తారు. ముఖ్యంగా ఫార్మాల్డిహైడ్, టోల్యూయీన్, డిబ్యూటైల్ ఫథాలేట్ (డీబీపీ), కెమికల్ రెజిన్స్, కెంపర్ లాంటి పదార్థాలు ఇందులో ఉంటాయి. వీటి ప్రభావం తక్షణం కనిపించకపోయినా, దీర్ఘకాలికంగా అనేక రకాల అనారోగ్య సమస్యలను కలిగించే ప్రమాదం ఉంది.ఇవి కొంతమందిలో అలర్జీ రియాక్షన్లు కలిగించవచ్చు. కొంతమంది నెయిల్ పాలిష్ వేసిన వెంటనే దద్దుర్లు, చర్మం ఎర్రబారటం, పొక్కులు వంటి సమస్యలను ఎదుర్కొంటారు. ముఖ్యంగా సున్నితమైన చర్మం ఉన్నవారికి ఈ రసాయనాలు హాని కలిగించవచ్చు. నెయిల్ పాలిష్ను తరచుగా వాడడం వల్ల గోర్లు బలహీనపడతాయి. పాలిష్లోని రసాయనాలు గోర్లలో తేమను తగ్గించి అవి పగిలిపోయేలా చేస్తాయి.
ఫార్మాల్డిహైడ్:
ఇది నెయిల్ పాలిష్ శీఘ్రంగా ఎండు పోవడానికి సహాయపడుతుంది. కానీ దీని వాసన చాలా బలంగా ఉండటమే కాకుండా, దీర్ఘకాలం ఇది శ్వాస ద్వారా శరీరంలోకి వెళ్లినట్లయితే ఊపిరితిత్తుల సంబంధిత సమస్యలు, అలర్జీ, క్యాన్సర్ వంటి తీవ్ర సమస్యలు వచ్చే అవకాశం ఉంది.
టోల్యూయీన్:
ఇది పాలిష్కు స్మూత్ నెస్ ఇవ్వడానికి ఉపయోగిస్తారు. అయితే దీని వాసన ఎక్కువగా పీల్చినట్లయితే తలనొప్పి, విరేచనాలు, మైకం, చర్మసంబంధిత అలర్జీ సమస్యలు కలుగుతాయి. గర్భిణీ స్త్రీలు దీన్ని ఉపయోగించడంలో మరింత జాగ్రత్త వహించాలి.
డిబ్యూటైల్ ఫథాలేట్ :
ఇది పాలిష్ సాగేలా, బలంగా ఉండేలా చేయడానికి కలుపుతారు. దీని ప్రభావం వలన హార్మోన్ల అసమతుల్యత, గర్భసంభంధిత సమస్యలు తలెత్తే అవకాశం ఉంది.
చర్మ సమస్యలు:
నెయిల్ పాలిష్ ఎక్కువగా వాడటంవల్ల గోళ్ల సహజ రంగు మారిపోతుంది. కొన్నిసార్లు గోర్లు పసుపు రంగులోకి మారిపోవడం, చీలిపోవడం, నాజూకుగా మారిపోవడం జరుగుతుంది. గోళ్లకు ఆక్సిజన్ అందకుండా నిరోధించబడుతుంది. దీని వలన గోర్లు బలహీనపడిపోతాయి.
నెయిల్ పాలిష్ రిమూవర్ వల్ల హానికరం:
నెయిల్ పాలిష్ తొలగించడానికి ఉపయోగించే రిమూవర్లో అసిటోన్ అనే పదార్థం ఎక్కువగా ఉంటుంది. ఇది గోళ్లపై బలమైన ప్రభావాన్ని చూపుతుంది. తరచుగా రిమూవర్ వాడటం వలన గోర్లు పొడిబారిపోవడం, చిట్లిపోవడం, చర్మం పొడిగా మారడం జరుగుతుంది. కొంతమందికి అసిటోన్ వాసన వల్ల మైకం, తలనొప్పి వంటి సమస్యలు కలుగుతాయి.
జాగ్రత్తలు:
నాణ్యమైన బ్రాండ్ నెయిల్ పాలిష్, రిమూవర్ మాత్రమే ఉపయోగించాలి.
నెయిల్ పాలిష్ అప్లై చేసిన తర్వాత గోళ్లకు విశ్రాంతి ఇవ్వాలి.
అసిటోన్ ఫ్రీ రిమూవర్ ఉపయోగించడం మంచిది.
గోళ్ల ఆరోగ్యాన్ని కాపాడుకునేందుకు ప్రతిరోజూ కొబ్బరి నూనె లేదా విటమిన్ ఈ ఆయిల్ మర్దనా చేయాలి.