క్యాసినో, గ్యాంబ్లింగ్లను లీగల్ చేస్తూ ప్రతిపాదించిన బిల్లుకు థాయిలాండ్ కేబినెట్ ఆమోదం కల్పించింది. అయితే ఈ క్రమంలోనే ఇప్పటివరకు చట్ట వ్యతిరేకంగా ఉన్న క్యాసినో, గ్యాంబ్లింగ్లను చట్టబద్ధం చేసింది. ఈ బిల్లు అమల్లోకి వస్తే థీమ్, వాటర్ పార్కులు, హోటళ్లు, షాపింగ్ మాల్స్ వంటి పర్యాటక ప్రాంతాల్లో క్యాసినోలు ఏర్పాటు చేసేందుకు.. గ్యాంబ్లింగ్ ఆడేందుకు అనుమతించేందుకు వీలు ఉంటుంది. క్యాసినో, గ్యాంబ్లింగ్ చట్టబద్ధతకు సంబంధించిన బిల్లు వివాదాస్పదం అయినప్పటికీ.. పర్యాటకానికి మరింత ఊతం ఇవ్వడంతోపాటు దేశంలో ఉద్యోగాల కల్పన కోసం ఈ నిర్ణయం తీసుకున్నట్లు థాయిలాండ్ ప్రభుత్వం స్పష్టం చేసింది. ఈ నిర్ణయం కారణంగా 9 వేల నుంచి 15 వేల వరకు కొత్త ఉద్యోగాలు వస్తాయని ప్రభుత్వం అంచనా వేస్తోంది.
థాయ్లాండ్లో ప్రభుత్వం నిర్వహించే గుర్రపు పందేలకు మాత్రమే ఇప్పటివరకు అనుమతి ఉంది. కానీ థాయిలాండ్లో అక్రమ బెట్టింగ్ మాత్రం దేశవ్యాప్తంగా భారీ స్థాయిలో జరుగుతూనే ఉంది. ఇలాంటి అక్రమ జూదం సమస్యను పరిష్కరించడంతోపాటు ఆదాయాన్ని పెంచుకోవడం.. థాయ్లాండ్లో పెట్టుబడులను ఆకర్షించడం.. వంటి లక్ష్యాలతో తాజా నిర్ణయం తీసుకున్నామని ప్రధానమంత్రి పేటోంగ్టార్న్ పేర్కొన్నారు. ఈ ప్రతిపాదిత బిల్లు ప్రకారం.. 20 ఏళ్ల కంటే తక్కువ వయసు ఉన్న వారికి మాత్రం క్యాసినోలకు అనుమతి లేదని తెలుస్తోంది. అంతేకాకుండా థాయిలాండ్కు వచ్చే విదేశీయులకు ఉచితంగా ప్రవేశం ఉంటుంది. కాగా.. థాయిలాండ్ పౌరులకు మాత్రం ఎంట్రీ ఫీజు చెల్లించాల్సి ఉంటుందని పేర్కొంది.