భారత ఉపరాష్ట్రపతి జగదీప్ ధనఖడ్ (Jagdeep Dhankhar) ఆకస్మికంగా రాజీనామా చేయడం రాజకీయ వర్గాల్లో పెద్ద చర్చనీయాంశంగా మారింది. పార్లమెంట్ సమావేశాల ప్రారంభదినానే ఆయన సాధారణంగా తన అధికార బాధ్యతలు నిర్వర్తిస్తూ బిజీగా ఉన్నారు. కానీ అదే రోజు సాయంత్రం అనారోగ్య కారణాలంటూ తన పదవికి రాజీనామా చేయడం చాలా మందిని ఆశ్చర్యానికి గురిచేసింది. ఈ నిర్ణయం కేంద్రంలో ఉన్న పెద్ద నేతలతో చర్చలేని నిర్ణయంగా కనిపించడం మరింత అనుమానాలకు తావిస్తుంది.
రాజకీయ విశ్లేషకుల అసమాధానం
జగదీప్ ధనఖడ్ ఉపరాష్ట్రపతిగా ఉన్న కాలంలో అధికార, విపక్షాల మధ్య సుబంధాన్ని కాపాడేందుకు ప్రయత్నించిన నేతగా గుర్తింపు పొందారు. స్పష్టంగా, ముక్కుసూటిగా వ్యవహరించే ధోరణితో ఆయన పనిచేశారు. కానీ ఈ రిజైన్ వెనుక నిజమైన కారణం ఏమిటన్నది ఇంకా స్పష్టంగా బయటపడలేదు. రాజకీయ విశ్లేషకులు మాత్రం ఈ రాజీనామా సాధారణ అనారోగ్య కారణాలతో జరిగిందన్న మాటను నమ్మటానికి ఇష్టపడడం లేదు. దీనికి రాజకీయ ఒత్తిళ్లు, అంతర్గత విభేదాలు వంటి అంశాలు కూడా కారణమైనా అయ్యుండవచ్చని అభిప్రాయపడుతున్నారు.
కొత్త ఉపరాష్ట్రపతి కోసం ప్రక్రియ ప్రారంభం
ధనఖడ్ రాజీనామాతో దేశానికి కొత్త ఉపరాష్ట్రపతి అవసరమైంది. ఈ నేపథ్యంలో ఎన్నికల ప్రక్రియ త్వరలోనే ప్రారంభమయ్యే అవకాశముంది. రాజ్యాంగ ప్రకారం, ఉపరాష్ట్రపతి పదవి ఖాళీ అయిన 60 రోజుల్లోగా ఎన్నిక జరగాలి. NDA మరియు I.N.D.I.A కూటముల మధ్య ఈ ఎన్నిక హోరాహోరీగా సాగనుంది. అయితే ధనఖడ్ ఎందుకు వాస్తవంగా రాజీనామా చేశారో స్పష్టత రానంతవరకూ, ఈ అంశం పై చర్చ కొనసాగుతూనే ఉంటుంది.
Read Also : Gita Gopinath : IMFను వీడనున్న గీతా గోపీనాథ్