సీనియర్ నటి, మాజీ ఎంపీ జయప్రద ఇంట్లో తీవ్ర విషాదం నెలకొంది. ఆమె సోదరుడు రాజబాబు కన్నుమూశారు. ఈ విషయాన్ని జయప్రద స్వయంగా తన ఇన్స్టాగ్రామ్ ఖాతా ద్వారా వెల్లడించారు. హైదరాబాద్లోని తన నివాసంలో నిన్న సాయంత్రం ఆయన తుదిశ్వాస విడిచారని, ఈ వార్త తనకు ఎంతో కలచివేసిందని జయప్రద భావోద్వేగంగా పేర్కొన్నారు.
జయప్రదకు తీరని లోటు
తన జీవిత ప్రయాణంలో అన్నగా, సహాయంగా నిలిచిన సోదరుడిని కోల్పోవడం తనకు తీరని లోటని ఆమె వెల్లడించారు. కుటుంబ సభ్యులు, బంధువులు, సన్నిహితులు రాజబాబు అకాల మరణంతో దిగ్భ్రాంతికి గురయ్యారు. సినీ పరిశ్రమకు దగ్గరగా ఉన్న వ్యక్తిగా ఆయన పలువురికి పరిచయమున్నవారని, ఆయన లేరనే వార్తను నమ్మలేకపోతున్నట్లు పలువురు వ్యాఖ్యానిస్తున్నారు.
సోదరుడి ఆత్మశాంతికి ప్రార్థనలు
ఈ కష్ట సమయంలో తన కుటుంబానికి మద్దతుగా ఉండాలని, తన సోదరుడి ఆత్మశాంతికి ప్రార్థించాలని జయప్రద అభిమానులను కోరారు. రాజబాబు అంత్యక్రియలు హైదరాబాద్లో నిర్వహించనున్నట్లు తెలుస్తోంది. జయప్రద సోదరుడి మృతి పట్ల పలువురు సినీ ప్రముఖులు, రాజకీయ నాయకులు తమ సంతాపాన్ని తెలియజేస్తున్నారు.