ఉత్తరప్రదేశ్లో సంచలనం రేపిన తల్లి. తల్లితనానికి విరుద్ధంగా, ఓ మహిళ తన స్వంత కుమారుడిని బలిగొట్టి అమానుషంగా ప్రవర్తించింది. కాన్పూర్ దేహత్ జిల్లాలో చోటుచేసుకున్న ఈ ఘటన ఆలస్యంగా వెలుగులోకి వచ్చింది. మమత అనే మహిళ తన భర్తను కొన్నేళ్ల క్రితం కోల్పోయింది. భర్త మృతితో కుటుంబంలో తీవ్ర ఆర్థిక ఇబ్బందులు మొదలయ్యాయి. ఆ సమయంలో ఆమె పరిచయం అయిన రిషీ కతియార్ అనే వ్యక్తితో ప్రేమలో పడింది. అయితే ఈ సంబంధాన్ని ఆమె కుమారుడు ప్రదీప్ అంగీకరించలేదు. తల్లిని పలుమార్లు హెచ్చరించాడు. ప్రియుడితో సంబంధం కొనసాగించవద్దని కఠినంగా చెప్పాడు. దీంతో మమతకు కోపం వచ్చింది. తన స్వంత కొడుకే తన జీవితానికి అడ్డుగా మారాడనే ఆలోచనతో ఆమె మనసు మారిపోయింది.
Breaking News -Cyclone Montha : తుఫాను వల్ల రూ.5,265 కోట్ల మేర నష్టం – సీఎం చంద్రబాబు
అక్కడినుంచి తల్లి, ప్రియుడు కలిసి దారుణానికి పూనుకున్నారు. ముందుగా ప్రదీప్ పేరుతో రూ.40 లక్షల విలువైన ఇన్సూరెన్స్ పాలసీలు తీసుకున్నారు. ఆ తర్వాత హత్యకు పథకం రచించారు. రిషీ కతియార్ తన తమ్ముడు మయాంక్ సహాయంతో ప్రదీప్ను ఇంటి సమీపాన సుత్తెతో దారుణంగా హత్య చేశాడు. అనంతరం రోడ్డుపై శరీరాన్ని పడేసి, “రోడ్డు ప్రమాదంలో మరణించాడు” అనే రూపంలో సన్నివేశాన్ని సృష్టించారు. అక్టోబర్ 27వ తేదీన బల్హరామౌ ప్రాంతంలో ప్రదీప్ మృతదేహం కనిపించడంతో స్థానికుల్లో కలకలం రేగింది. పోలీసులు మృతదేహాన్ని స్వాధీనం చేసుకుని అనుమానాస్పద మృతి కేసు నమోదు చేశారు. అయితే మొదట్లో ఈ ఘటనను యాక్సిడెంట్గా భావించిన పోలీసులు, తర్వాత ఫోరెన్సిక్ రిపోర్టులు, సాక్ష్యాల ఆధారంగా హత్య అని నిర్ధారించారు.
ఇక అసలు నిజం బయటకు తెచ్చింది ప్రదీప్ తాత జగదీష్ నారాయణ్ చేసిన ఫిర్యాదే. తన మనవడిని రిషీ, మయాంక్లు హత్య చేశారని ఆయన నేరుగా పోలీసులకు తెలిపారు. గ్రామస్థులు కూడా ఈ ఆరోపణలను సమర్థించడంతో కేసు మలుపు తిరిగింది. విచారణలో రిషీ, మయాంక్లు హత్యను అంగీకరించారు. “మమత సూచనల మేరకే హత్య చేశాం” అని ఒప్పుకున్నారు. దీంతో మమతపై పోలీసులు మర్డర్ కేసు నమోదు చేశారు. ప్రస్తుతం ఆమె పరారీలో ఉండగా, సోదాలు కొనసాగుతున్నాయి. ఈ ఘటన రాష్ట్ర వ్యాప్తంగా తీవ్ర ఆందోళన కలిగిస్తోంది. తల్లితనానికి మచ్చతెచ్చిన ఈ సంఘటన సమాజాన్ని కలచివేస్తోంది. ప్రేమ, లోభం, ద్రవ్యదాహం — ఈ మూడు కలిసి మానవత్వాన్ని ఎలా నాశనం చేస్తున్నాయో ఈ కేసు స్పష్టంగా చూపిస్తోంది.
Read hindi news: https://hindi.vaartha.com
Epaper : https://epaper.vaartha.com/