పశ్చిమాసియాలో ముదురుతున్న యుద్ధ మేఘాలు భారతీయ స్టాక్ మార్కెట్లను కోలుకోలేని దెబ్బ తీశాయి. ఇరాన్పై అమెరికా-ఇజ్రాయెల్ దాడులు ఐదో రోజుకు చేరుకోవడం, ప్రపంచ చమురు రవాణాకు కీలకమైన హార్ముజ్ జలసంధిని ఇరాన్ మూసివేయడంతో ముడిచమురు ధరలు ఒక్కసారిగా భగ్గుమన్నాయి. ఈ పరిణామాల నేపథ్యంలో ద్రవ్యోల్బణం పెరిగిపోతుందన్న భయం మదుపర్లలో నెలకొంది. దీనివల్ల అటు అమెరికా ఫెడ్ రిజర్వ్, ఇటు భారత రిజర్వ్ బ్యాంక్ (RBI) వడ్డీ రేట్లను తగ్గించకపోవచ్చన్న అంచనాలు మార్కెట్లను కుదిపేస్తున్నాయి. ఫలితంగా మార్చి 4వ తేదీన దేశీయ సూచీలు భారీ పతనాన్ని మూటగట్టుకున్నాయి.
Aga Syed Ruhullah Mehdi: శ్రీనగర్ ఎంపీ అగా సయ్యద్ పై కేసు నమోదు? సోషల్ మీడియా పోస్టులే కారణమా!
స్టాక్ మార్కెట్ గణాంకాలను పరిశీలిస్తే పరిస్థితి ఎంత తీవ్రంగా ఉందో అర్థమవుతుంది. సెన్సెక్స్ ఒకానొక దశలో 1700 పాయింట్లకు పైగా కుప్పకూలి, చివరకు 1122 పాయింట్ల నష్టంతో 79,116 వద్ద ముగిసింది. అటు నిఫ్టీ కూడా 385 పాయింట్లు కోల్పోయి 24,480 స్థాయికి పడిపోయింది. ఈ కనిష్ట స్థాయిల వల్ల ఇన్వెస్టర్ల సంపదగా పిలిచే బీఎస్ఈ (BSE) మార్కెట్ క్యాపిటలైజేషన్ ఏకంగా రూ. 10 లక్షల కోట్లు ఆవిరైపోయింది. భారతీ ఎయిర్టెల్, ఇన్ఫోసిస్ వంటి కొన్ని ఐటీ షేర్లు మినహా, టాటా స్టీల్, ఎల్ అండ్ టీ, బజాజ్ ఫైనాన్స్ వంటి దిగ్గజ కంపెనీల షేర్లు భారీగా నష్టపోయాయి. విదేశీ సంస్థాగత పెట్టుబడిదారులు (FIIs) పెద్ద ఎత్తున అమ్మకాలు జరపడం, రూపాయి విలువ పడిపోవడం మార్కెట్ను మరింత అగాధంలోకి నెట్టాయి.
ముఖ్యంగా అంతర్జాతీయ మార్కెట్లో బ్రెంట్ క్రూడ్ ఆయిల్ ధర బ్యారెల్కు 82 డాలర్లకు చేరడం భారత్ వంటి దేశాలకు పెను సవాలుగా మారింది. మన దేశ చమురు అవసరాల్లో 85 శాతం దిగుమతుల ద్వారానే తీరుతుండటంతో, ధరల పెరుగుదల వల్ల కరెంట్ ఖాతా లోటు పెరిగి ఆర్థిక వృద్ధి మందగించే ప్రమాదం ఉంది. దీనికి తోడు, యుద్ధం మరో నాలుగు నుండి ఐదు వారాల పాటు లేదా అంతకంటే ఎక్కువ కాలం కొనసాగవచ్చని అమెరికా అధ్యక్షుడు డొనాల్డ్ ట్రంప్ చేసిన ప్రకటన మదుపర్లలో భయాందోళనలను రెట్టింపు చేసింది. యుద్ధం సుదీర్ఘ కాలం కొనసాగితే మార్కెట్లు మరింత అనిశ్చితిలోకి వెళ్లే అవకాశం ఉందని విశ్లేషకులు హెచ్చరిస్తున్నారు.
Read Also hindi news: hindi.vaartha.com
Read Also Epaper : epaper.vaartha.com
Read Also :