మహారాష్ట్ర రైలు ప్రమాదం వేదనకు గురిచేసింది – పీఎం మోదీ

మహారాష్ట్రలో జలగావ్ జిల్లాలో జరిగిన భయానక రైలు ప్రమాదం దేశాన్ని శోకసాగరంలో ముంచెత్తింది. ఈ ఘటనలో 12 మంది ప్రాణాలు కోల్పోగా, పలువురు గాయపడ్డారు. ప్రధాని నరేంద్ర మోదీ ఈ ఘటనపై తన విచారాన్ని వ్యక్తం చేశారు. “ఈ ప్రమాదం నాకు గాఢమైన బాధను కలిగించింది. మృతుల కుటుంబాలకు నా ప్రగాఢ సానుభూతిని తెలియజేస్తున్నాను. గాయపడిన వారు త్వరగా కోలుకోవాలని ప్రార్థిస్తున్నాను” అని మోదీ ట్వీట్ చేశారు.

ఈ ఘటనలో పుష్పక్ ఎక్స్‌ప్రెస్‌లో మంటలు చెలరేగాయనే అనుమానంతో ప్రయాణికులు అప్రమత్తమయ్యారు. భయంతో వారు చైన్ లాగి రైలును ఆపి ట్రైన్ నుండి కిందకు దిగారు. అయితే, ఈ సమయంలో పక్క ట్రాక్‌పై వేగంగా వస్తున్న కర్ణాటక ఎక్స్‌ప్రెస్ వారిని ఢీ కొట్టింది. ఈ భయానక ఘటనలో 12 మంది మరణించగా, మరికొంత మంది తీవ్రంగా గాయపడ్డారు.

రైల్వే అధికారులు ఘటనపై సమగ్ర విచారణకు ఆదేశించారు. ప్రమాదానికి గల కారణాలను గుర్తించేందుకు ప్రత్యేక కమిటీని నియమించారు. గాయపడిన వారిని సమీప ఆసుపత్రికి తరలించి చికిత్స అందిస్తున్నారు. ప్రభుత్వ అధికారులు, సహాయ బృందాలు ఘటనాస్థలిలో సహాయక చర్యలు కొనసాగిస్తున్నారు. మృతుల కుటుంబాలకు తగిన ఆర్థిక సాయాన్ని ప్రభుత్వం ప్రకటించింది. అలాగే, గాయపడిన వారికి మెరుగైన వైద్య సేవలు అందించేందుకు చర్యలు తీసుకుంటున్నారు.